Yakoba 1 - Libuka Lya Kuyela

¹ Yakoba, mukakutendela milimo Nyambi na Mwene Yeshu Kilishitu. Ku mishobo ya likumi na yibili yinapanzana kwa kutali, shangwe.

² Bawushinda wami, labenu ngayi ku wahilila kwakunene oho mu kuwana byezeko bya mishoboshobo.

³ Na kulimuka eshe, ngayi kwezeka kwa kukulupila kwenu kukutenda lunzewe.

⁴ Ngoboni shashiwahe lunzewe lutende mulimo walwo wakulembulukisha, ngayi mulembuluke na kulingana, kowa sha kuyawila.

⁵ Ndi wamina kukwenu ukubula ngana, alombe kuli Nyambi, mukakupana na kuhetwila ku bantu nimwabo na kubula kwambila, zikapanikiwa kukwendi.

⁶ Ngoboni alombe na kukulupila na kubula kumatoka. Ndaba ou ukumatoka ukwinga ngo linkanyi lya liwate lya kupepoka na mpepo na kukwancana.

⁷ Muntu wanoho hinga ahanganika ngayi ukatambula shuma shamina kuli Mwene.

⁸ Muntu wa mitima yibili ukutalangila mu zinzila zendi nimwazo.

⁹ Kawushinda waku shepwa awahilile ngayi unatumpuku,

¹⁰ ngoboni mukakuheta, ndaba una shepeshiwi, ndaba nehi maluba a mwila ukapita.

¹¹ Ndaba oho mutena unatatumuku na ntukumina ya kulebukisha, wanguwangu ukulebukisha mwila na maluba awo yikuwa na wuwahe wayo ukanonga. Nahiyo kami mukakuheta ukabundala mu zinzila zendi.

¹² Wa kutandala muntu ou ukuzumanana mu byezeko, ndaba oho unezekiwi, ukatambula munana wa wumi, ou Nyambi anakulupishi kukwabo ba kumuhaka.

¹³ Muntu oho nezekiwi, hinga amba ngayi Nyambi unanyezeke, ndaba Nyambi kutwesha wufwako kwezekiwa na wubi, hinga kwezeka wufwako muntu wamina.

¹⁴ Ngoboni muntu nimwendi ukwezekiwa oho akukokiwa na lihungu lyendi na kukandikiziwa.

¹⁵ Oho lihungu linemiti, likuhema wubi, kami wubi oho unakulu, ukuhema kufwa.

¹⁶ Hinga mwongeziwa, bawushinda ba kuhakiwa!

¹⁷ Shishemo nimwasho shashiwahe na shishemo nimwasho sha kulembuluka shikufuma kuyilu, shikushulumuka kuli Nyambi Shakalenga wa mwana, kukwendi kowa mamfutumfutu, hinga kufutuka nihani.

¹⁸ Na shamutima wendi mwine watuhemuwishile na lizu lya kupwisha, ngayi twinge mbuto ya kutatika ya bibumbwabumbwa byendi.

¹⁹ Nohobene, bawushinda wami ba kuhakiwa, muntu nimwendi anyankupishe kuyuvwa, ehale kwamba, ehale kupilama.

²⁰ Ndaba wukali wa muntu wufwako kutenda kwoloka kwa Nyambi.

²¹ Nohobene yumbenu mazilo nimwawo na wingi wa wubi na kulilimbwilisha kuli Nyambi na kutambula lizu lya kubiwile mukati kenu, elye likutwesha kupulwisha myoyo yenu.

²² Ngoboni yingenu bakakutenda lizu, kaliha bakakuyuvwa tuhu na kulyongeza enubene.

²³ Ndaba ndi muntu wamina ukwinga mukakuyuvwa lizu, kaliha mukakutenda, ukufweka ngo muntu ukutilamina shifwekesha mu shimboni.

²⁴ Ndaba amanisha kulimona, ha kuya ku nzila yendi na kuvulama wanguwangu omu ekalila.

²⁵ Ngoboni ou ukuzilikisha ndayano za kulembuluka wakushoboloka na kuzaminamo, niye kaliha mukakuyuvwa na kuvulama, ngoboni mukakutenda mulimo, muntu ou ukatandala mu mulimo wendi.

²⁶ Ndi muntu wamina mukati kenu uku moneka ngo mukakukulupila, ngoboni ukubula kumanga lulimi lwendi, ngoboni ukwongeza mutima wendi mwine, kukulupila kwendi kwenga kwowa.

²⁷ Kukulupila kwa kuyela kwine na kubula mazilo ku meho a Nyambi na Tate kwenga eshe, kuzingula banginga na bamfwile mu makalikiza abo na kuliholeka wakubula libala ku kaye.