Taitashi 3 - Libuka Lya Kuyela

Nyinkalo ya Bakakilishitu

¹ Anukisha bantu ngayi benge ba kubomba ku bamyene na bakakutwaminina, babombatale kami benge bakakuliwahishila kutenda milimo nimwayo yayiwahe.

² Hinga bamba byabibi ha muntu wamina, mwanga babule kulyamba na muntu, ngoboni benge ba kubomba, pe bamoneshe shishemo ku bantu nimwabo.

³ Ndaba nanetu kami, ha shikati sha kunyima twengile bakuyeba, bakakubula kwombatala, bakakwongeziwa na bakakutenda milimo ya bifungo bya kulishiyashiya na bya myelembo. Twengile bakankwela na bakamwili, bantu batuzimbile nanetu kami twabazimbile.

⁴ Ngoboni oho nceshe na shishemo sha Nyambi Mulamwini wetu byamonekele,

⁵ watupulwishile, kaliha ndaba ya milimo twatendele ya kulunga, ngoboni ndaba ya shikeketima shendi, watuyoweshele mu Moyo wa Kuyela, watupanine kuhemuwa kwakupya, pe twawanine wumi wawupya.

⁶ Nyambi watupanine Moyo wa Kuyela mu wingi kupitila muli Yeshu Kilishitu Mulamwini wetu,

⁷ ngayi mwanga tutweshe kwinga bakwoloka na nceshe zendi na kwinga bakakukona wumi wa mwaya myaka ou tukulumbeza.

⁸ Eye nyambilo yenga ya kupwisha. Nikushinga obe ushumishe ku longesha byuma ebye, ngayi baya banakulupili muli Nyambi bazundamine kutenda milimo yayiwahe. Byuma ebye byabiwahe kami bikuyavwa bantu nimwabo.

⁹ Ngoboni obe hinga utenda nkani za kuyeba, nkani za bya mikoka na byakulyamba amba na kukananganisha ha bya Ndayano za Moshesha, ndaba nkani zanoho zenga zowa, kami kuyavwa zifwako.

¹⁰ Shiwulula kabili muntu uya uku longesha bya mahalo, ndi kuyuvwa wufwako, pe mushiye nahiya.

¹¹ Limuka ngayi muntu wanoho wakukontama, kami uli na wubi, pe unaliyata niye mwine nanebye akutenda.

Mazu amamaninino

¹² Oho nikatuma Atemashi kukwobe, hinge Tikikashi, ukanyankupe kwiza kukwami ku Nikopolishi, ndaba nisho ninahanganiki ngayi nikekala kuyo mupepo.

¹³ Ezeka shikuma kuyavwa Zenashi mukakwimanina byambo na Apoloshi ha mukala wabo, ngayi bekale na byuma nimwabyo bya kuliyavwa nabyo.

¹⁴ Na bantu betu kami balilongeshe kuzamina kutenda milimo yayiwahe, ya kuliyavwa, ngayi hinga babula kuyima mbuto.

¹⁵ Nimwabo bali na nami kuno baku kushangwisha. Shangwisha aba ba kutuhaka mu kukulupila. Nceshe zikale nenu nimwenu.