Shitatiko 50 - Libuka Lya Kuyela

¹ Niho Yoshefwa aliwishililile hali tatiyendi ha wulili, walilile na kumuzupeza ku lupala.

² Niho Yoshefwa ambile ngayi lutu lwa tatiyendi Ishalela baluwabe wanga wakukanisha ku bola.

³ Pe bamanishile matena makumi anaa ashingiwanga ha kuwaba wanga ha mutuntu ngayi uyume. Niho Baengepita bamulilile matena makumi mutanu na abili.

⁴ Oho matena a malila a tatiyendi apitile, Yoshefwa wambile ku babilolo ba Fwalo ngayi, “Ndi hano muli na nceshe bahekulu, twalenu lizu elye kuli Fwalo,

⁵ ‘Oho tate ekalile hahepi na kufwa, wandayile ngayi nikamufunde mu shinzimbi eshe akabile niyemwine mu litunga lya Kenaani. Nohobene bahekulu nyintabilishenu nikafunde tate, pe nikaboka kami.’”

⁶ Fwalo wakumbwile ngayi, “Yanga, ukafunde tatiyobe, ngonehe akulayile.”

⁷ Nohobene Yoshefwa wayile mu kufunda tatiyendi. Babilolo ba Fwalo nimwabo na bakulwane ba nkuta yendi na bakakutwaminina bantu nimwabo ba litunga lya Engepita bayile nendi hamo.

⁸ Balupashi lwa Yoshefwa na bayayizendi na ba lupashi lwa tatiyendi nimwabo bayile nendi. Mu Ngosheni mwashalile tuhu bana babo babashe na matanga a bambelele babo na bampongo na zingombe zabo.

⁹ Pe kami baka makoloyi na bakakukandama ha bambishi bayile hamo nendi, lyengile likunge lyalinene shikuma.

¹⁰ Oho bakumine ku likotwelo ku Atandi, ku mushamuko wa Yondana, niko bawungikilile zintande zazinene za wunginga, pe Yoshefwa watendele malila a matena mutanu na abili.

¹¹ Oho bamwine litunga lya Kenaani bamonene malila ku Atandi, bambile ngayi, “Eze zintande za malila a Baengepita zazinene.” Nohobene mbalila iyo nisho bayitumbilile ngayi Abele Mizilamu.

¹² Kami bana ba Yakobo batendele ngonehe abalayile taytiyabo.

¹³ Bamutwalile ku Kenaani na kumufunda mu linzolongoma lyamu mfuba ya ku Makapela ku mushamuko wa Mamele, elye alandile Abulahama kuli Efweloni wa kahita ngayi linge binzimbi.

¹⁴ Oho Yoshefwa afundile batatiyendi, wabokele ku Engepita na bayayizendi na nimwabo baya ayile nabo mu kufunda tatiyendi.

Yoshefwa ukutulisha bayayizendi mitima

¹⁵ Kunyima ya kufwa kwa tatiyabo, bayayizendi Yoshefwa bambile ngayi, “Haya nahiti ndi Yoshefwa ushili kutuzimba na kuhanganika kutubweshela wubi ku wubi ou nimwawo twamutendele?”

¹⁶ Nohobene batumine ntumwana kuli Yoshefwa ngayi, “Batatiyobe oho shilolo bafwe,

¹⁷ batutongwezele mwanga tukwipule ngayi, ‘Mwanami, mwanga uyatile wubi wa bayayizobe uya ba kubipishilile.’ Haya obe hekulu uyatile wubi wa bakamilimo ba Nyambi ya batatiyobe, ou batendele.” Pe Yoshefwa walilile oho atambwile olu lushango.

¹⁸ Niho bayayizendi bezile nibo bamwine na kulamba kumbili yendi. Bambile ngayi, “Etu tuli kumbili yobe kwinga bakamilimo bobe.”

¹⁹ Ngoboni Yoshefwa wambile kukwabo ngayi, “Hinga mutina, ami kutwesha kuliyaka mu mwanya wa Nyambi nifwako.

²⁰ Enu mwafwungwile kukwami byabibi, ngoboni Nyambi washifutwilile ku wuwahe, ngayi mwanga alamwine wumi wa bantu bendi ngonehe eshe bali lelo, ndaba ya biya byatendiwile.

²¹ Haya hinga mutina. Nikamilela na bana benu babashe.” Nohobene nisho abatulishile mitima na kubabengezeka noho na mazu a shishemo aya ashumishile mitima yabo.

Lufu lwa Yoshefwa

²² Yoshefwa wazikilenga mu Engepita hamo na ba lupashi lwa batatiyendi. Wayoyele myaka 110.

²³ Pe Yoshefwa wamonene bana ba Efulemu na bana ba bazukulu. Kami oho bana ba Makiya mwana Manashe wa mulume bahemuwile, Yoshefwa wabamonene na kubalela.

²⁴ Pe Yoshefwa wambile ku bayayizendi ngayi, “Ami wuluno nifwe, ngoboni Nyambi ukamilama na kumifumisha ku litunga elye na kumibwesha ku litunga liyo a kulupishile kuli Abulahama na kuli Ishaki na kuli Yakobo.”

²⁵ Niho Yoshefwa anyepele bana ba Ishalela ngayi balibeze. Wambile ngayi, “Nkulupishenu ngayi oho Nyambi akamibwesha ku litunga liyo, mwanga mukafumishe bifupa byami kuno.”

²⁶ Nohobene Yoshefwa wafwilile mu Engepita hinga ekala na myaka 110. Bawabishile wanga ku lutu lwendi wakukanisha ku bola, pe bamuyakile mu likwati.