Shitatiko 48 - Libuka Lya Kuyela

Yakobo ukutandalisha Efulemu na Manashe

¹ Oho kwapitile shikati, Yoshefwa wayuvwile ngayi, “Tatiyobe uli na kukola.” Wayile na bana bendi babili babalume, Manashe na Efulemu, kuya mu ku mona tatiyendi Yakobo.

² Oho Ishalela ayuvwile ngayi, “Mwanobe Yoshefwa unezi na kuku mona,” walishumishile pe wakonkomanine ha wulili.

³ Yakobo wambile kuli Yoshefwa ngayi, “Nyambi Mpandashilanga waliholwele kukwami ku Luzi mu litunga lya Kenaani na kumfuywela.”

⁴ Wambile kukwami ngayi, “Nikakupanika bana babengi, ngayi bazukulyobe bakavule na kwinga mikoka yayingi. Nikapana litunga elye ku bazukulyobe kwinga likona lyabo mwaya myaka.”

⁵ Yakobo wawezeleleko na kutongweza Yoshefwa ngayi, “Bana bobe babalume babili, aba wabelekelele mu Engepita oho shilolo nikume kuno kukwobe, banengi bami kami. Efulemu na Manashe bakenga bami ngonehe Lubena na Shimiyoni.

⁶ Ndi ukekala na bana bashenge bakenga bobe kaliha bami. Bakatambula likona ha myongo ya Efulemu na Manashe bayayizabo.

⁷ Nikutenda nehe ndaba ya mandiyobe Lakele, ou wandetelele wunginga wawunene oho afwililile mu litunga lya Kenaani, oho tuli hahepi na Efulata, oho nafuminenga ku Meshopotamiya. Pe namufundile kunkumo ya nzila yikuya ku Efulata.” Efulata ukutumbiwa lelo ngayi Mbetelehema.

⁸ Oho Ishalela amonene bana ba Yoshefwa wabepwile ngayi, “Aba batwanuke bayani?”

⁹ Yoshefwa wakumbwile ngayi, “Aba banengi bana bami anampana Nyambi kuno ku Engepita.” Yakobo wambile ngayi, “Balete kuno kukwami mwanga nibafwuywele.”

¹⁰ Kami meho a Ishalela azininikile ndaba ya myaka yendi, pe kaliha watweshele ku mona. Yoshefwa waletele bandumbana kukwendi, niho wababumbatilile na ku bazupeza.

¹¹ Pe Ishalela wambile kuli Yoshefwa ngayi, “Kaliha nahanganikile ngayi nika ku mona kami, ngoboni Nyambi unetabili ngayi nimone na banabobe.”

¹² Pe Yoshefwa wabafumishile ha bilama bya Yakobo, wafunkamine ku manungo na ku nyongamina lupala hanci kumbili yendi.

¹³ Yoshefwa wayakile Efulemu ku liboko lya Ishalela lya shimoho na Manashe ku liboko lya shilyo.

¹⁴ Ngoboni Ishalela washempakanine maboko wendi na kukambika liboko lyendi lya shilyo ha mutwe wa Efulemu ou wengile wa kanuke na liboko lyendi lya shimoho ha mutwe wa Manashe ou wengile wa mukulwane.

¹⁵ Niho afwuywelele Yoshefwa “Mwanga Nyambi. Ou balemeshelenga batate, ba Abulahama na Ishaki afwuywele aba bandumbana. Mwanga Nyambi, ou wandamine kuleta na ku mutena walelo, abatandalishe.

¹⁶ Mwanga lingeloyi, ou wandamwinine ku malamo nimwawo, abatandalishe, lizina lyami na lizina lya batate, ba Abulahama na Ishaki mwanga akayoyenga mumwabo aba bandumbana. “Mwanga bakekale na bana babengi na bazukulu babengi.”

¹⁷ Yoshefwa wapilamine oho amonene ngayi tatiyendi wakambikile liboko lyendi lya shilyo ha mutwe wa Efulemu nohobene wakwatile ku liboko lya tatiyendi na kulihenyesha kufumisha ha mutwe wa Efulemu na kuliyaka ha mutwe wa Manashe.

¹⁸ Wambile kuli tatiyendi ngayi, “Kaliha nehe tate. Ou niye mukulwane, kambika liboko lyobe lya shilyo ha mutwe wendi.”

¹⁹ Ngoboni tatiyendi wakanine, pe wambile ngayi, “Mwanami hinilimuka, nikulimuka ngayi bazukulya Manashe kami bakenga babengi. Ngoboni mukonzo wendi ukenga wamunene kumupitakana, kami bazukulyendi bakenga mushobo wawunene.”

²⁰ Nohobene wabafwuywelele ha mutena uyo na kwamba ngayi, “Baishalela bakaliyavwisha mazina wenu oho bakamba habya mfuywezi. Nibo bakamba ngayi, ‘Mwanga Nyambi aminge ngo Efulemu na Manashe.’” Mu ntendelo eye Yakobo wayakile Efulemu kumbili ya Manashe.

²¹ Niho Ishalela ambile kuli Yoshefwa ngayi, “Mona, nili hahepi na kufwa, ngoboni Nyambi ukekala hamo na nobe, kami ukakubwesha ku litunga lya batatizobe.

²² Napana litunga lya Shekemu kukwobe tuhu, kaliha ku bayayizobe. Inengi mbalila ya wilo iya nayangile Baamoli na mukwale wami na shipando shami sha mukunzi.”