Shitatiko 47 - Libuka Lya Kuyela

¹ Niho Yoshefwa ayile kuli mwene Fwalo, wamutongwezele ngayi, “Batate na bayayizami banezi na matanga wabo a bambelele na zingombe, kufuma ku Kenaani na byuma nimwabyo biya bali nabyo. Hano bali mu Ngosheni mu litunga lya Engepita.”

² Hakati ka bayayizendi wahatileho ba mutanu pe wabatwalile kuli Fwalo.

³ Fwalo wabepwile ngayi, “Mulimo wenu unengi mulimo ngani?” Bakumbwile ngayi, “Hekulu, etu tuli balishani, ngonehe bengile batatizetu.

⁴ Hekulu etu tunezi mukwikala muno mu litunga, ndaba kapande kanengi kakanene mu Kenaani ngayi kowa liyembelelo lya kubuyila matanga wetu. Twitabilishe kuzika mu litunga lya Ngosheni.”

⁵ Fwalo wambile kuli Yoshefwa ngayi, “Haya tatiyobe na bayayizobe banakumu.

⁶ Litunga lya Engepita linengi lyabo. Balehe bazike mu Ngosheni litunga lya Engepita, niyo yenga mbalila ya litunga yayiwahe. Ndi kubali balume bamo hakati kabo, ba kutakalala ubayake ku wukulwane wa matanga a bimuna byami.”

⁷ Niho Yoshefwa atwalile tatiyendi kuli mwene Fwalo, pe Yakobo wafuywelele Fwalo.

⁸ Fwalo wamwipwile ngayi, “Kati obe uli na myaka yinga?”

⁹ Yakobo wakumbwile ngayi, “Myaka ya kuyoya kwami kwa kuyambangila yina kumu ku 130. Myaka eye yinengi yayishe kami yayikalu, kaliha ya kulifweka na myaka ya bankaka zami ya kuyambangila kwabo.”

¹⁰ Kami Yakobo wafuywelele Fwalo, wamushalishileho, pe wayile.

¹¹ Niho Yoshefwa azikishile tatiyendi na bayayizendi mu mbalila yayiwahe mu litunga lya Engepita, hahepi na munzi wa Lamashishi, ngonehe ambile Fwalo.

¹² Yoshefwa wapaninenga byakulya kuli tatiyendi na bayayizendi na ba lupashi lwa tatiyendi nimwabo, kufungilako na batwanuke babashe.

Kapande

¹³ Kapande kanenehele shikuma ngayi kwabulile byakulya hano hanci nimwaho, bantu ba mu Engepita na bamu Kenaani bashimbamine na nzala.

¹⁴ Yoshefwa wakungwile mali nimwawo, awa balandilenga byakulya bantu bamu litunga lya Engepita na Kenaani na kuwatwala ku musheke wa Fwalo.

¹⁵ Oho mali nimwawo amu litunga lya Engepita namu litunga lya Kenaani amanine, Baengepita nimwabo bezile kuli Yoshefwa na kwamba ngayi, “Tupeko byakulya. Hinga utulehelela na nzala tufwa. Mali wetu nimwawo anamana.”

¹⁶ Yoshefwa wakumbwile ngayi, “Letenu matanga a bimuna byenu. Nikamipanika byakulya bya kutambashana, ndi mali wenu anamana nimwawo.”

¹⁷ Nohobene baletele matanga a bimuna byabo kuli Yoshefwa, niho wabapanikilenga byakulya bya kutambashana na bambishi babo na bambelele na bampongo na zingombe na bambongolo. Mwaka uyo wabapaninenga byakulya mu kutambashana na matanga a bimuna byabo.

¹⁸ Pe mwaka oho wamanine, bezile kukwendi na kwamba ngayi, “Etu kukaholeka shambo kukwobe tufwako hekulyetu, ngayi mali wetu nimwawo anamana, kami matanga a bimuna anengi obe hekulu. Kowa shuma shinashalako sha kukupanika hekulu, ndele zinyutu zetu na limvu lyetu.

¹⁹ Hinga utuleha ngayi tufwe. Tendaho shuma shimo. Hinga witabila ngayi limvu lyetu libipe. Tulande hamo na limvu lyetu mu kutambashana na byakulya. Etu tukenga bandungo kuli Fwalo, pe ukaheta limvu lyetu. Tupeko na mbuto ya ku shanga mu mafuba wetu ngayi mwanga tubule kufwa ku nzala.”

²⁰ Niho Yoshefwa alandilile mwene litunga nimwalyo lya Engepita. Baengepita nimwabo balandishile mafuba wabo ndaba kapande kengile kakanene shikuma. Nohobene limvu nimwalyo lyengile lya Fwalo.

²¹ Yoshefwa wafutwile bantu nimwabo kwinga bandungo ba Fwalo kubalika kunkumo ya Engepita kutwala kunkumo yamina.

²² Limvu tuhu abulile kulanda ndele liya tuhu lya kundamine ku bakankombela. Nisho shuma bakankombela babulile kulandisha limvu lyabo, ndaba Fwalo wabapaninenga byakulya, ebye bayoyelenga.

²³ Yoshefwa wambile ku bantu ngayi, “Monenu, mutena walelo namilanda hamo na limvu lyenu kwinga ba Fwalo. Haya mbuto, mwanga mushange mumafuba wenu.

²⁴ Ha bikati bya kuteza, mu ku fwanina kupana mushiinzi nimwawo wa mutanu kuli Fwalo. Bya ku shalaho bikenga byenu bya mbuto ya mu mafuba wenu naya byakulya byenu na ba lupashi lwenu.”

²⁵ Bakumbwile ngayi, “Obe unapulwishi wumi wetu. Kami wunengi shiwahe kukwetu hekulu, pe etu tukenga bandungo ba Fwalo.”

²⁶ Nohobene Yoshefwa watendele ndayano mu litunga lya Engepita ngayi sha mutanu ku bya kuteza shikwinga sha Fwalo. Pe eze ndayano nikozishili kuleta naku mutena walelo, ndele tuhu limvu lya bakankombela nilyo lyabulile kwinga lya Fwalo.

Kulaya kwa Yakobo kwa mamanishililo

²⁷ Baishalela bazikile mu Engepita mu litunga lya Ngosheni, bengile ba kuheta, kami bekalile na bana babengi.

²⁸ Yakobo wekalile mu Engepita myaka 17, hantu noho engile myaka 147.

²⁹ Oho shikati sha Ishalela sha kufwa shahenyenene kwakwipi, wehanine mwanendi Yoshefwa pe wambile kukwendi ngayi, “Mwanami, ndi uku wahilila na nami pe kwata liboko lyobe mukati ka bilama byami Unkulupishe ngayi ukatenda byakwoloka na kupwisha ngayi hinga ukamfunda mu Engepita.

³⁰ Nikushinga kufundiwa oku kwa lala batatizami, ukafumishe muno mu Engepita na kumfunda ku binzimbi bya batatizami.” Yoshefwa wakumbwile ngayi, “Nikatenda ngonehe eshe unamba.”

³¹ Ishalela wambile ngayi, “Beza mbeza kukwami ngayi ukatenda noho.” Niho Yoshefwa abezele, pe Yakobo wayendaminine ha muhamino wa wulili wendi pe walemeshele Nyambi.