Shitatiko 46 - Libuka Lya Kuyela

Yakobo na ba lupashi lwendi bakuya ku Engepita

¹ Ishalela walongele nimwabyo ebye ekalile nabyo pe wayile ku Mbelishemba, oku akakombelelele zinkombela kuli Nyambi wa tatiyendi Ishaki.

² Pe Nyambi wambile kuli Ishalela na shimono ku wushiku, niho amwihanine ngayi, “Yakobo, Yakobo.” Wakumbwile ngayi, “Ami wuno Hekulu.”

³ Nyambi wambile ngayi, “Ami nenga Nyambi wa tatiyobe. Hinga wutina kuya ku Engepita, ndaba nikanenehesha bazukulyobe kwinga mushobo wawunene.

⁴ Nikaya hamo na nobe ku Engepita, pe kami nikabwesha bazukulyobe ku litunga lino. Pe Yoshefwa ukekala na nobe oho ukafwa.”

⁵ Ishalela wafumine ku Mbelishemba, kami bana bendi bayakile tatiyabo Yakobo na bana babo babashe na bakazabo mu makoloyi, awa atumine Fwalo ngayi akabashimbe.

⁶ Bashimbile matanga a bimuna byabo na ntutu eye bahetele mu Kenaani, pe bayile ku Engepita. Yakobo wayile na ba lupashi lwendi nimwalwo,

⁷ bana bendi babalume na bazukulyendi babalume na bana bendi babambuyama na bazukulyendi babambuyama, nimwabo wayile nabo ku Engepita.

⁸ Awa niwo mazina a bazukulya Ishalela ayile nabo ku Engepita.

⁹ Bengile Lubena, mweli wa Yakobo wa mulume na bana bendi babalume, Hanoki na Palu na Heziloni na Kalimi.

¹⁰ Shimiyoni na bana bendi babalume, bengile Yemuwele na Yamini na Ohandi na Yakini na Zohali na Shaule mwanendi wakuli mbuyama waku Kenaani.

¹¹ Levi na bana bendi babalume, bengile Ngeshona na Kohati na Melali.

¹² Yunda na bana bendi babalume, bengile Shila na Pelizi na Zela. Ngoboni bana bendi babalume bamina Ela na Onani bafwililile mu Kenaani. Bana ba Pelizi bengile Heziloni na Hamula.

¹³ Ishaka na bana bendi babalume, bengile Tola na Puwa na Lombu na Shimiloni.

¹⁴ Zembuloni na bana bendi babalume, bengile Shelendi na Eloni na Yalelu.

¹⁵ Aba nibo bana ba Leya babalume aba abelekelele kuli Yakobo mu Meshopotamiya, hamo na mwanendi wa mbuyama Ndayina. Bazukulyendi nimwabo balabiwile bengile 33.

¹⁶ Ngandi na bana bendi babalume bengile Zefwiyoni na Hangi na Shuni na Ezimboni na Eli na Alondi na Aleli.

¹⁷ Asha na bana bendi babalume bengile Imina na Ishiva na Ishivi na Mbeliya na mpanzabo Shela. Bana ba Mbeliya babalume bengile Hemba na Malikela.

¹⁸ Aba 16 bengile bazukulya Yakobo kuli Zilipa, ou Lambani apanikile kuli Leya mwanendi wa mbuyama.

¹⁹ Mukazendi Yakobo, Lakele wamubelekelele bana babili babalume, Yoshefwa na Mbenjamani.

²⁰ Manashe na Efulemu bahemuwile kuli Yoshefwa mu Engepita kuli Ashinati mwana Potifwela wa mbuyama, mukankombela wamu Oni.

²¹ Bana ba Mbenjamani babalume bengile Mbela na Mbeka na Ashembela na Ngela na Naamani, Ehi na Loshi, Mupimi na Hupimi na Andi.

²² Aba likumi na banaa bengile bazukulya Yakobo kuli Lakele.

²³ Ndani na mwanendi wa mulume Hushimu.

²⁴ Nafwitali na bana bendi babalume, bengile Yazilu na Nguni na Yeza na Shilema.

²⁵ Aba mutanu na babili bengile bazukulya Yakobo kuli Mbiliha ou apanikile Lambani kuli mwanendi wa mbuyama Lakele kwinga ndungo yendi.

²⁶ Wingi wabo aba ba kutoyiwa ngayi bazukulya Yakobo, aba bayile ku Engepita bengile 66, kubula kulabako bakowendi ba bambuyama.

²⁷ Kuyakaho bana babili babalume bahemuwilile kuli Yoshefwa mu Engepita, wingi wa ba lupashi lwa Yakobo bakumine ku 70, aba nibo bayile ku Engepita.

Yakobo na ba lupashi lwendi mu Engepita

²⁸ Yakobo watumine Yunda kuli Yoshefwa mu kumutongweza ngayi akabashimbawile ku Ngosheni. Oho Yakobo na ba lupashi lwendi bakumine ku litunga lya Ngosheni,

²⁹ Yoshefwa wakandamine mu koloyi yendi, pe wayile ku Ngosheni mu ku shimbawila tatiyendi Ishalela. Oho baliwanine, Yoshefwa wabumbatilile tatiyendi, pe walilile shikati shashitali,

³⁰ pe Ishalela wambile kuli Yoshefwa ngayi, “Haya shinawaha, aha naku monakale na kulimuka ngayi ushili kuyoya hinge nifwu howa ndaba.”

³¹ Niho Yoshefwa ambile kuli bayayizendi na kuli ba lupashi lwa tatiyendi ngayi, “Niku fwanina kuya na kutongweza Fwalo ngayi bayayizami na ba lupashi lwa batate, aba bekalilenga ku Kenaani, banezi kukwami.

³² Nikamutongweza bantu aba benga balishani babimuna, banalete matanga wabo a bambelele na matanga wabo a zingombe na byuma nimwabyo biya bekala nabyo.

³³ Oho Fwalo akamihana na kumipula ngayi mulimo wenu mulimo ngani,

³⁴ mu ku fwanina kumutongweza kupwisha ngayi, ‘Etu, hekulu, tuli balishani babimuna kubalika ku shikati sha wanuke wetu, ngonehe batendelenga batatizetu.’ Mu nzila eye ukutwesha kumitabila kuzika mu Ngosheni mu litunga lya Engepita.” Yoshefwa wambile eshe ndaba Baengepita bakendelenga bya kubuyisha.