Shitatiko 45 - Libuka Lya Kuyela

Yoshefwa ukulilubulula kuli bayayizendi

¹ Yoshefwa kaliha watweshele kulishumisha kumbili ya bakamilimo bendi, niho ambile ngayi batutwishe bantu nimwabo ha munkanda. Kowa muntu washenge ekalile nendi oho Yoshefwa atongwezelenga bayayizendi ngayi niye nengi yani.

² Walilile shikuma na kuhwizumuka ngayi Baengepita bayuvwileko na mbuzi yatwaliwile mu musheke wa Fwalo.

³ Yoshefwa wambile ku bayayizendi ngayi, “Ami Yoshefwa. Kati tate ushili kuyoya ndi?” Ngoboni bayayizendi bekalile na bowa shikuma kami kaliha batweshele ku mu kumbula.

⁴ Niho Yoshefwa ambile kukwabo ngayi, “Nikuminyepa ngayi muhenyene kwakwipi.” Bezile kwakwipi, pe wambile ngayi, “Ami mukonzowenu Yoshefwa, ou mwalandishile ku Baengepita.

⁵ Haya hinga mulikekula, hinge kulihepa enu bamwine ndaba ngayi mwandandishile kuno. Mwa shikuma wengile Nyambi, ou wantumine kumbili yenu mu kuyoyesha wumi wa bantu.

⁶ Ou niwo mwaka wawubili tuhu wa kapande mu litunga. Kukekala myaka mutanu kami eye ya kubula kulima hinge kuteza.

⁷ Nyambi wantumine kumbili yenu mu kulamwina mu nzila eye ya kukomokesha na ku mona ngayi enu na bazukulyenu mukayoye.

⁸ Nohobene, mwa shikuma kaliha enu mwantumine kuno, ngoboni Nyambi. Niye unanyingishi kwinga shilolo wa mukulwane kuli Fwalo. Nili na kulama litunga lyendi nimwalyo na kalela wa nimwabo bamu Engepita.

⁹ “Haya nyankupenu muboke kuli tate na kumutongweza ngayi, ‘Eshe nisho akwamba mwanobe Yoshefwa ngayi Nyambi unanyingishi kalela wa Engepita nimwayo, yekenu kukwami hinga mwihala boha.

¹⁰ Mukutwesha kuzika mu litunga lya Ngosheni mu Engepita, oku mu kutwesha kwikala hamo na nami, enu na bana benu na bazukulyenu na matanga a bambelele na bampongo na zingombe zenu na nimwabyo biya muli nabyo.

¹¹ Shinga muli mu Ngoshena nikutwesha kumifulankana. Kukekala myaka mutanu ya kapande, pe kushinga nifwako ngayi enu na ba lupashi lwenu na matanga enu mulanduke ku nzala na kwinga bancepwe.’”

¹² Yoshefwa wawezeleleko kwamba ngayi, “Nimwenu na nobe kami Mbenjamani, mu kutwesha ku mona ngayi mwa shikuma amibene Yoshefwa.

¹³ Tongwezenu tate ngayi ami nili na maleema amanene shikuma muno mu Engepita, kami mukamutongweze ha byuma munamono. Niho, mukanyankupishe mukalete batate kuno.”

¹⁴ Niho akilukilile mu ncingo ya mukonzo wendi Mbenjamani pe watatikile kulila, Mbenjamani kami walilile oho amubumbatilile.

¹⁵ Yoshefwa wabumbatalile bayayizendi kami nimwabo, oku hapwezuma kulila. Wabazupezele umo na wamina. Kufuma haya bayayizendi batatikile kwamba nendi.

¹⁶ Oho mbuzi ya kumine ku musheke wa mwene ngayi bayayizendi Yoshefwa banezi, Fwalo na babilolo bendi bawahililile shikuma.

¹⁷ Fwalo wambile kuli Yoshefwa ngayi, “Tongweza bayayizobe balonge byuma ha bimuna byabo, pe baboke ku litunga lya Kenaani.

¹⁸ Baye, bakashimbe tatiyobe na ba lupashi lwabo, pe baboke kuno kukwami. Nikabapanika litunga lyaliwahe mu Engepita, nohobene bakekala na byabingi bya kubayoyesha.

¹⁹ Kami ubatongweze ngayi bashimbe makoloyi aku Engepita, awa amanene ali na bilembalemba hayilu, bakendemo bakazabo na batwanuke babashe na kwiza hamo na tatiyabo.

²⁰ Hinga alifulankana bya ku shiya wuheti wabo, byabiwahe nimwabyo bya mu litunga lya Engepita bikenga byabo.”

²¹ Bana ba Ishalela babalume batendele nehe abatongwezele. Yoshefwa wabapanikile makoloyi amanene ali na bilembalemba hayilu, ngonehe ambile Fwalo, kami wabapanikile byakulya byaha mukala.

²² Ku muntu na muntu kami wabapanikile bivwalo byabipya, ngoboni Mbenjamani wamupanikile myanda yihatu ya shiliva na bivwalo mutanu byabipya.

²³ Watuminine tatiyendi bambongolo likumi bashimbile ntutu yayiwahe shikuma ya mu Engepita na bambishi kami likumi bashimbile byakulya na mankende na byakulya byamina bya ha mukala.

²⁴ Wafunzwile bayayizendi ha mukala wabo, pe oho bakatukilenga, wambile kukwabo ngayi, “Hinga mulyamba mu nzila.”

²⁵ Bafumine ku Engepita, bakumine ku Kenaani kuli tatiyabo Yakobo.

²⁶ Bambile ngayi, “Yoshefwa ushili kuyoya, unengi kalela wa litunga lya Engepita.” Yakobo walikomokele ndaba kaliha watweshele kuba kulupila.

²⁷ Ngoboni oho Yakobo bamutongwezele nimwabyo biya ambile Yoshefwa kukwabo, kami oho amonene makoloyi awa atumine Yoshefwa akumutwala ku Engepita, washumankanine.

²⁸ Niho Ishalela ambile ngayi, “Haya kunamana. Mwanami Yoshefwa ushili kuyoya. Niku fwanina kuyako ngayi nikamumone hano nishili kuyoya.”