Shitatiko 43 - Libuka Lya Kuyela

Bayayizendi Yoshefwa ba kuboka ku Engepita na Mbenjamani

¹ Kapande mu litunga lya Kenaani kanenehele shikuma,

² pe oho ba lupashi lwa Yakobo balile byakulya nimwabyo ebye bakaletele ku Engepita, Yakobo wambile ku bana bendi babalume ngayi, “Yenunga kami mukatulandileko twa kulya.”

³ Yunda wambile kukwendi ngayi, “Muntu watubelele shikuma ngayi etu kukekala ku lupala lwendi tufwako, hantu tuye na mukonzowetu hamo.

⁴ Ndi mu kutwitabilisha ngayi tuye na mukonzowetu, pe tukuya na kumi landila byakulya.

⁵ Ngoboni ndi kushinga mufwako, pe kuyako tufwako, ndaba uya muntu wambile ngayi kukekala ku lupala lwendi tufwako hantu tuye na mukonzowetu hamo.”

⁶ Ishalela wambile ngayi, “Shumangani mukumoneshela makando amanene ha kutongweza uya muntu ngayi muli na mukonzowenu wamina?”

⁷ Bakumbwile ngayi, “Uya muntu watwipwizizile shikuma ha byetu na ba lupashi lwetu ngayi, ‘Kati tatiyenu ushili kuyoya ndi? Enu muli na mukonzowenu wamina ndi?’ ‘Twafwaninine kukumbula mayipu wendi. Shinga twalimukile nahiti ngayi ukatutongweza ngayi tukaye na mukonzowetu.”

⁸ Yunda wambile kuli tatiyendi Ishalela ngayi, “Panenu kanuke ku maboko wami, pe tukatuke na kuya, ngayi hinga kwikala umo hakatiketu eze akafwe ku nzala.

⁹ Ami nikayakamo wumi wami hahendi, mu kutwesha ku mushingila ku liboko lyami. Ndi kumubwesha kukwenu wamumi nifwako, mwanga nikekale na shihepwa mu matena akuyoya kwami nimwawo.

¹⁰ Shinga twabula kutatila shikati shashitali, shinga twayile mwaka na ku boka, hano shinga twabokamokale kawubili.”

¹¹ Tatiyabo Ishalela wambile kukwabo ngayi, “Ndi ngayi eshe nisho shekalakale, pe shimbenu mikabo yayiwahe ya litunga mu zimpamba zenu yikenge ntupu ku muntu owo. Kami mushimbe lemba na wushi na lukumba na mikabo ya nkaala na alimonde.

¹² Shimbenu mali kabili, ndaba mu ku fwanina kubwesha mali awa abokele hayilu ya zimpamba zenu. Kampe balubishile tuhu ha kulonga.

¹³ Katukenu, muyenga hamo na mukonzowenu Mbenjamani, muboke kuli owo muntu.

¹⁴ Mwanga Nyambi Mpandashilanga apane nceshe kuli owo muntu, nohobene ngayi mwanga akabweshe mukonzowenu wamina na Mbenjamani. Nehe ami ndi nikuyanguliwa bana bami, pe niyanguliwe bene.”

¹⁵ Nohobene bayayizendi Yoshefwa bashimbile ntupu na mali amengi, kami bashimbile Mbenjamani hamo nabo. Bakatukile na kuya ku Engepita, oku bakaliholwele kukwendi.

¹⁶ Oho Yoshefwa amonene Mbenjamani nezi nabo wambile kuli shamanga wamu litala lyendi ngayi, “Twala aba bantu ku litala lyami. Ukazihe shimuna, ndaba aba bantu bakalya hamo na nami shikati sha mwaana.”

¹⁷ Shamanga watendele ngonehe amutongwezele Yoshefwa, watwalile aba bantu ku litala lya Yoshefwa.

¹⁸ Nibo bekalile na bowa oho batwaliwile ku litala lyendi, pe bahanganikile ngayi, “Tunaletiwi kuno ndaba ya mali awa abokeshiwile mu zimpamba zetu ha shikati sha kutatika. Wuluno batulwishe na ku tu bazumuna na ku tu shimba kwinga bandungo zendi na ku shimba bambongolo betu.”

¹⁹ Nohobene bezile kwakwipi na shamanga wamu litala lya Yoshefwa, pe bambile kukwendi ku shipana sha litala ngayi,

²⁰ “Obe hekulyetu, twezile kuno ha kutatika mu kulanda byakulya.

²¹ Oho twakumine ha malanganino, twafukwilile zimpamba zetu, pe muntu na muntu wawanine mali ku kanwa ka mpamba yendi, mali wetu nimwawo hinga ekala. Tunaboko nawo kami.

²² Tunalete kami mali amina mu kulandilaho byakulya. Kulimuka tufwako ou wayakile mali mu zimpamba zetu.”

²³ Shamanga wambile ngayi, “Hinga mulikekula. Hinga mutina. Nyambi yenu, Nyambi wa tatiyenu, niyebene wafwaninine kumiyakilamo mali mu zimpamba zenu. Natambwile mali wenu a kutatika.” Niho aletele Shimiyoni kukwabo.

²⁴ Shamanga wengizile bayayizendi Yoshefwa na Mbenjamani mu litala lyendi. Wabapanikile mema akuyowela ku mawulu wabo, kami walishile bambongolo babo.

²⁵ Bawahishile zintupu za kupana Yoshefwa hakwiza kwendi ku shikati sha mutena mukati ka mutwe, ndaba bayuvwile ngayi bakwiza mu kulila kuyo.

²⁶ Oho Yoshefwa abokele ku litala batwalile zintupu kukwendi, niho balambile kumbili yendi.

²⁷ Yoshefwa wabepwile bya kupinduka kwabo, kami niho epwile ngayi, “Tatiyenu hapinduka shiwahe, mukulwane ou mwantongwezele? Ushili kuyoya shiwahe ndi?”

²⁸ Bakumbwile ngayi, “Mukamulimo wobe wakulishepesha, tatiyetu, unapinduku shiwahe, ushili kuyoya.” Kami bafunkamine hanci na kulamba kumbili yendi.

²⁹ Oho Yoshefwa ayimbwile meho wendi wamonene Mbenjamani mukonzo wendi, wambile ngayi, “Ou wafwanina kwinga mukonzowenu wa mukaala, ou mwantongwezele. Niho ambile ngayi Nyambi akuyamizize mwanami.”

³⁰ Niho Yoshefwa anyankupishile kukatuka ndaba mutima wendi wekalile na nceshe shikuma hali mukonzo wendi. Washingile kulila nohobene wenginine mu kampenci kendi na ku lililamo.

³¹ Oho alikupwile ku lupala lwendi, watutikilile ha munkanda wa kampenci kendi, kami walishumishile niyemwine, pe watongwezele shamanga ngayi, “Letenu byakulya.”

³² Yoshefwa bamuyakilile ha ninkayendi, pe bayayizendi babayakilile ha tebulu yashenge. Baengepita aba alilenga nabo balilenga haninkayabo, ndaba shengile sha lisheni kukwabo kulya hamo na Bahebelu.

³³ Bayayizendi Yoshefwa bekalile kutebulu kumbili ya Yoshefwa mu kukonka ku myaka yabo, kubalika ku wamukulwane kutwala kuwa kanuke. Oho bamonene eshe banekala, balitilaminine umo na wamina na kukomoka.

³⁴ Babapanikile byakulya bya ku tebulu ya Yoshefwa, pe Mbenjamani watambwile mutanu kupitakana nimwabo. Nohobene balile na kunwa hamo na Yoshefwa na kutangala nendi.