Shitatiko 42 - Libuka Lya Kuyela

Bayayizendi Yoshefwa bakuya ku Engepita na kulanda byakulya

¹ Oho Yakobo ayuvwile ngayi mu Engepita muli byakulya, wambile kuli bana bendi ngayi, “Hinga mulipenza tuhu ku meho?

² Ami nayuvwu ngayi ku Engepita kuli byakulya. Yenuko mukalandeko byakulya ngayi twize tuyoye kutina tufwa ku nzala.”

³ Nohobene bayayizendi Yoshefwa likumi bayile ku Engepita mu kulandako byakulya.

⁴ Yakobo kaliha watumine Mbenjamani, mukonzo wa Yoshefwa wakumukonka mu likoshi, ndaba watinine ngayi kampe kukekala shuma shashikalu shikamwizilila.

⁵ Bana ba Ishalela bayile mu kulanda byakulya, hamo na bantu bamina, ndaba kwekalile kapande mu litunga lya Kenaani.

⁶ Yoshefwa wengile kalela mu litunga lya Engepita, walandishilenga byakulya ku bantu nimwabo ba hano hanci. Nohobene bayayizendi Yoshefwa bezile na ku shintama hanci na kulamba ku meho wendi.

⁷ Oho Yoshefwa amonene bayayizendi wabalimukile, ngoboni wengile ngo ku balimuka wufwako. Pe wabepwilenga na kukaliha ngayi, “Mukufuminina kuti?” Bamukumbwile ngayi, “Tukufuma ku litunga lya Kenaani, tunezi mu kulanda byakulya.”

⁸ Yoshefwa walimukile bayayizendi ngoboni nibo kaliha bamulimukile.

⁹ Pe Yoshefwa wanukile milo yiya abalotelelele, niho ambile ngayi, “Enu muli bakakuhokela, munezi mu ku mona wuboto wa litunga.”

¹⁰ Bamukumbwile ngayi, “Byo hekulu, etu bakamilimo bobe tunezi mu kulanda byakulya tuhu.

¹¹ Etu nimwetu twenga mulwetu, kaliha tuli bakakuhokela hekulu, etu tuli bantu bakulunga.”

¹² Yoshefwa wambile kukwabo ngayi, “Byo, munezi mu ku mona oku kuli wuboto wa litunga lyetu.”

¹³ Bambile ngayi, “Etu, twekalile likumi na babili mulwetu hekulu, bana ba muntu umo mu litunga lya Kenaani. Wamukala wetu unashala na tatiyetu, kami wamina mukonzowetu wafwa.”

¹⁴ Yoshefwa wakumbwile ngayi, “Eshe nisho nambili ngayi enu muli bakakuhokela.”

¹⁵ Eshe nisho mukezekiwa, nikubeza mu lizina lya Fwalo ngayi kukafuma kuno mufwako, hantu mukonzowenu wa mukaala unezi.

¹⁶ Tumenuho umo kukwenu akamulete. Aba ba kushalaho kukwenu ba kulamiwa hantu kupwisha kwanebye munamba kunezekiwi. Nikubeza mu lizina lya Fwalo, enu mwa shikuma muli bakakuhokela.

¹⁷ Pe wabayakile mu tolongo matena ahatu.

¹⁸ Ha mutena wawuhatu Yoshefwa wambile kukwabo ngayi, “Ami nili muntu wakutina Nyambi. Nohobene mukayoya ndi mukutenda eshe,

¹⁹ ku monesha ngayi muli bantu bakulunga, lehenu umo kukwenu ashale kuno mu tolongo, muyo munekalanga na kulamiwa. Enu nimwenu munashalaho mukaya mu kutwala byakulya ebye munalanda ku ba lupashi lwenu bali na kapande.

²⁰ Mu ku fwanina kukeza na mukonzowenu wa mukaala kukwami, shimoneke ngayi munamba bya kupwisha, pe kukamiziha nifwako.” Betabilile kuneshe.

²¹ Niho balyambishile ngayi, “Ee, etu tuli na mulandu kunebye twatendele hali mukonzowetu. Twamonene makando amanene awa ekalile nawo oho alambilile ngayi tumuyavwe, ngoboni kaliha twamuyuvwililile. Nisho shuma shiya tuli mu makando awa.”

²² Lubena wambile ngayi, “Nka namitongwezele ngayi hinga mutenda shibi kuli kanuke, ngoboni enu kaliha mwanyuvwile. Pe haya tuli na kuyumba mulandu wa lufu lwendi.”

²³ Yoshefwa wayuvwile ebye bambilenga, ngoboni nibo kaliha balimukile ndaba bambilenga kukwendi kupitila mu mukakutontolola.

²⁴ Yoshefwa wafumine kukwabo pe walilile. Oho atweshele kwamba kukwabo kami, wabokele pe washimbile Shimiyoni na kumumangila ha meho wabo.

Bayayizendi Yoshefwa ba kuboka ku Kenaani

²⁵ Yoshefwa walayile ngayi benzalishe zimpamba zabo na byakulya na kubwesha mali ku mpamba ya muntu na muntu na kubapana byakulya bya ha mukala. Eshe shatendiwile kukwabo.

²⁶ Bayayizendi balongele ha bambongolo byakulya ebye balandile, pe bayile.

²⁷ Ku matulilo okubalalile wushiku, umo kukwabo washobwele ku mpamba yendi ngayi alishe mbongolo yendi, pe wawanine mali ku kanwa ka mpamba yendi.

²⁸ Watongwezele bawushinda wendi ngayi, “Ami mali wami anaboko, amibene ali mumpamba yami.” Mitima yabo yapopele. Bekalile na bowa wawunene na kulipula umo na wamina ngayi, “Shumangani eshe anatende Nyambi kukwetu?”

²⁹ Oho bakumine kuli tatiyabo Yakobo mu Kenaani, bamutongwezele nimwabyo biya byamonekele kukwabo ngayi,

³⁰ “Kalela wambile kukwetu na wukali, pe watwambilile ngayi, ‘Munengi bakakuhokela litunga lyetu.’

³¹ Etu twamutongweza ngayi, ‘Tuli bantu ba kupwisha kaliha tuli bakakuhokela.

³² Twengile likumi na babili mulwetu, tatiyetu umo. Wamina wafwa pe wa mukaala uli kuli tatiyetu mu Kenaani.’

³³ Niho ou Kalela wa Engepita atukumbwile ngayi, ‘Eshe nisho shikandimukisha ngayi muli bantu ba kupwisha, ndi umo hakati kenu ukashala hamo na nami, pe wingi wabo bakatwale byakulya ku ba lupashi lwabo bali na nzala.

³⁴ Kaletenu mukonzowenu wa mukaala kukwami. Niho nikalimuke ngayi kati kaliha muli bakakuhokela. Niho nikabwesha mukonzowenu kukwenu. Mukatwesha kwikala na kulandishila mu litunga lino.’”

³⁵ Oho bashukumwinenga zimpamba zabo, shifundwa sha mali sha muntu na muntu shawaniwile mu mpamba yendi, pe oho bamonene bifundwa bya mali, nibo na tatiyabo batinine.

³⁶ Tatiyabo Yakobo wambile kukwabo ngayi, “Enu mu kunciya ninkayami wakubula bana. Yoshefwa waya na Shimiyoni unayi, pe haya kami mukushinga kunyangula na Mbenjamani. Ami haya nikenga muntu wakuyanda.”

³⁷ Lubena wambile kuli tatiyendi ngayi, “Enu tate mu kutwesha kuziha bana bami babalume babili, ndi kubwesha Mbenjamani kukwenu nifwako. Mupanenu ku maboko wami, pe nikamubwesha.”

³⁸ Ngoboni Yakobo wambile ngayi, “Mwanami kuya nendi mufwako, ndaba yayiyendi wafwa, pe unashalaho ninkayendi tuhu. Ami na kulumpala kale shikuma, ndi shuma shimo shashikalu shikamwizilila ha nzila, nikafwa mu wunginga pe nimwenu mukanyanciwa.”