Shitatiko 40 - Libuka Lya Kuyela

Yoshefwa ukutontolola milo ya batuyili

¹ Oho kwapitile shikati, kawaba ka mwene wa Engepita na kankemba wendi wa mukulwane babipishilile mwene.

² Niho Fwalo apilamine nanaba babilolo babili,

³ kami wabayakile mu tolongo yamu litala lya mukulwane waku musheke, omu bashinkililile Yoshefwa.

⁴ Bekalile shikati shashitali mu tolongo, mukulwane waku musheke wabayakile ku maboko a Yoshefwa ngayi abalamenga.

⁵ Wushiku umo, muyo mu tolongo, wubili wabo bakawaba na kankemba bamwene wa Engepita balotele milo. Muntu na muntu walotele mulo wendi na mulo nimwawo wekalile na kutontoloka kwawo.

⁶ Oho Yoshefwa ezile kukwabo ku lumenemene, wamonene ngayi banahombo.

⁷ Pe wabepwile babilolo ba Fwalo ngayi, “Shumangani mu ku moneka kulikekula?”

⁸ Bakumbwile ngayi, “Etu nimwetu tunaloto milo pe kowa umo kuno wakututongweza kutontoloka kwa yino milo.” Yoshefwa wambile kukwabo ngayi, “Unengi Nyambi ou wapananga ngana za kutontolola milo.” Pe niho ambile ngayi, “Haya ntongwezenu tuyuvwe milo yenu.”

⁹ Nohobene kawaba wambile kuli Yoshefwa ngayi, “Mu mulo wami namona mukolobozi wa shinyanca kumbili yami,

¹⁰ wekala na myahi yihatu. Mabizi oho aku zobela tuhu, ntemo zatutika na mikabo ya shinyanca ya hoka.

¹¹ Ami na kwata nkomoki ya Fwalo, kami nabuya mikabo ya shinyanca na kuyizongela mu nkomoki, pe nayipana kukwendi.”

¹² Yoshefwa wambile kukwendi ngayi, “Niwo ukutontoloka nehe, myahi yihatu yinengi matena ahatu.

¹³ Kwapita matena ahatu Fwalo ukakututwisha mu tolongo, kami ukakuyatila na kukubwesha mu mwanya wobe. Ukapanikanga mwene nkomoki yendi ngonehe watendelenga mwaka, oho wengilenga mwaka kawaba kendi.

¹⁴ Haya ukekale na nceshe shikuma na kuntoya kuli Fwalo na kunyavwa kufuma muno mu tolongo.

¹⁵ Ndaba nayibiwile ku litunga lya Bahebelu, kami hinge kuno kaliha natende shuma shimo eshe bananyakili mu tolongo.”

¹⁶ Oho kankemba wa mukulwane amonene ngayi kutontoloka kwa mulo wa kawaba ku nawaha naye kami niho ambile kuli Yoshefwa ngayi, “Nami kami naloto nashimbi zintumba zihatu za mankende ha mutwe wami.

¹⁷ Mu ntumba ya hayilu mwekala byakulya bya kuhoka bya Fwalo, ngoboni tuyoni twapupula na kubilya.”

¹⁸ Yoshefwa wakumbwile ngayi, “Oku niko kutontoloka kwawo. Zintumba zihatu zinengi matena ahatu.

¹⁹ Kwapita matena ahatu Fwalo ukakututwisha na kuketula mutwe wobe. Niho ukapatika lutu lwobe ha shitondo, pe tuyoni tukalya lutu lwobe.”

²⁰ Oho kwapitile matena ahatu, ha mutena wakwanuka kuhemuwa kwendi, Fwalo wapingile shimbo ku babilolo bendi nimwabo. Watutwishile kawaba wendi na kankemba wendi wa mukulwane kumbili ya babilolo bendi.

²¹ Niho abweshele kawaba wendi mu mwanya wendi,

²² ngoboni kankemba wamukulwane wayatiwilile kufwa. Nisho shengile ngonehe atontwelele milo yabo Yoshefwa.

²³ Ngoboni Kawaba kaliha wahanganikile Yoshefwa, wamuvulamine.