Shitatiko 4 - Libuka Lya Kuyela

Kaina na Abele

¹ Andama walalile na Eva mukazendi ku wulili, pe mukazendi wemitile. Niho abelekele mwana wa mulume, pe Eva wambile ngayi, “Naliwaninakale mwana wa mulume ha kuyavwa kwa Nyambi ya Ngula.” Pe wamutumbile Kaina.

² Munyima ya matena niho kami abelekele mwana wa mulume ou atumbile ngayi, “Abele.” Mukonzo wa Kaina. Abele wengile mulishani wa bambelele, ngoboni Kaina wengile ndimi.

³ Munyima ya matena Kaina watwalile kuli Nyambi ya Ngula ntupu yanebye atezele.

⁴ Niho Abele naye kami atwalile kuli Nyambi ya Ngula ntupu ya mweli wa mwana mbelele wamu litanga lyendi. Wamuzihile pe wapanine bimamo byabiwahe hamo na mazi wendi. Nyambi ya Ngula wawahililile pe watambwile nkombela ya Abele,

⁵ ngoboni wakanine Kaina na ntupu yendi. Pe Kaina wapilamine shikuma na lupala lwakakabalile na wukali.

⁶ Nyambi ya Ngula wambile kuli Kaina ngayi, “Kati shumangani unapilamini? Shumangani unakakabalili ku lupala?

⁷ Shinga watenda shiwahe, kati shinga kutambuliwa wufwako ndi? Ngoboni ndaba unatende shibi, wubi ukushinga kukukoneneka, unakubelamini ku shipana shobe ngo shimbwi ukushinga ku kukwata. Ngoboni uku fwanina kuwukoma.”

⁸ Mutena wamina Kaina wambile kuli Abele mukonzo wendi ngayi, “Tuye na kwenda enda mu mfuba.” Oho bekalile mu mfuba Kaina wafutulukilile mukonzo wendi pe wa muzihile.

⁹ Pe Nyambi ya Ngula wepwile Kaina ngayi, “Mukonzowobe Abele ulikuti?” Kaina wakumbwile ngayi, “Nami kulimuka nifwako. Kati ami nengi mukakulama mukonzowami ndi?”

¹⁰ Niho Nyambi ya Ngula ambile ngayi, “Unatende shumangani? Mukeza wa mukonzowobe unazihi mponde uli na kulilila hanci kukwami.

¹¹ Haya uli wa kukutiwa ku limvu, pe ukatandiwa ha limvu elye linazaba na mukeza wa mukonzowobe ngonehe linayahamishi kanwa kalyo na kuwumina oho wamuzihile.

¹² Wakashanga mbuto yobe, limvu kukakumeneshela mbuto lifwako, kami ukenga wakubula munzi na nyambangizi hano hanci.”

¹³ Kaina wambile kuli Nyambi ya Ngula ngayi, “Aka kashushwilo kanengi kakanene shikuma kukwami.

¹⁴ Haya uli na kuntanda muno mu litunga kufuma ku meho wobe. Nikenga wakubula munzi na nyambangizi hano hanci, kami muntu nimwendi ukangwana ukanziha.”

¹⁵ Ngoboni Nyambi ya Ngula wambile kukwendi ngayi, “Byo, ndi muntu ukakuziha bantu mutanu na babili bakazihiwa kubweshela wubi na wubi.” Niho Nyambi ya Ngula ayakile limango hali Kaina lya ku monesha ngayi muntu nimwendi ukamuwana hinga akamuziha.

¹⁶ Niho Kaina afumine ku meho a Nyambi ya Ngula, wakazikile ku litunga lya Nondi, ku mushamuko wa mfuba ya Endeni.

Bazukulya Kaina

¹⁷ Kaina walalile na mukazendi ku wulili, wemitile niho abelekele mwana lizina lyendi Inoki. Niho Kaina azikile munzi wawutumbile lizina lya mwanendi Inoki.

¹⁸ Inoki wabelekele mwana wa mulume wamutumbile ngayi Ilandi. Ilandi wabelekele Mehuyale. Mehuyale wabelekele Metushayela. Metushayela wabelekele Lameki.

¹⁹ Lameki wayekele bakazi babili, Anda na Zila.

²⁰ Anda wabelekele Yambalu, ou wengile nkaka ya balishani babimuna, bekalilenga mu zintanda.

²¹ Mukonzo wendi wengile Yumbalu, ou wengile tata bangomba bambetelenga tumbuli na tunamitolilo.

²² Zila wabelekele Tumbalu Kaina, ou wengile mfuzi wa bishebezesho nimwabyo ha lubemba naha byondo. Mpanza Tumbalu Kaina wengile Naama.

²³ Lameki wambile ku bakazendi ngayi, “Bakazami, Anda na Zila, nyuvwililenu. Ami nazihi muntu ndaba wandemeka, namuzihi ou ndumbana ndaba wankama.

²⁴ Ndi myoyo mutanu na yibili yikuyumbiwa ha kuziha Kaina, pe myoyo 77 yika yumbiwa ndi muntu ukunziha.”

Sheta na Inoki

²⁵ Andama walanganine na mukazendi kami ku wulili, pe wabelekele mwana wa mulume wamina. Niho amutumbile ngayi, “Sheta, kutontolola ngayi Nyambi unampana mwana wa mulume wa kuhingisha muli Abele ou azihile Kaina.”

²⁶ Sheta wabelekele mwana wa mulume wamutumbile ngayi Enoshi. Ha shikati shiyo bantu batatikile kulemesha Nyambi ya Ngula.