Shitatiko 39 - Libuka Lya Kuyela

Yoshefwa na mukaza Potifwa

¹ Haya Baishimaele batwalile Yoshefwa ku Engepita pe bamulandishile kuli Potifwa, umo ha babilolo ba Fwalo, ou wengile mukulwane wakulama musheke.

² Pe Nyambi ya Ngula wekalile hamo na Yoshefwa, kami watendele byuma nimwabyo shiwahe kukwendi. Wekalilenga mu litala lya hekulyendi wa Kaengepita,

³ kami hekulyendi wamonene ngayi Nyambi ya Ngula wekalile hamo na Yoshefwa, kami ngayi Nyambi ya Ngula watandalishile biya nimwabyo biya atendelenga.

⁴ Yoshefwa wawahilishile Potifwa, niho ahatile Yoshefwa kwinga mukulwane wakulama litala lyendi na kumukowezela nimwabyo biya ekalile nabyo.

⁵ Kufuma ku shikati shiyo na sha kumbili, Nyambi ya Ngula watandalishile bamu litala lya Kaengepita ndaba ya Yoshefwa. Nyambi ya Ngula watandalishile nimwabyo biya ekalile nabyo mu litala lyendi namu mafuba wendi.

⁶ Potifwa wayakile byuma byendi nimwabyo mu maboko a Yoshefwa kubilamanga, kami kaliha walifulankanine shuma shimo ndele byakulya tuhu alilenga. Yoshefwa wengile muntu waku moneka shiwahe na wakulubuluka.

⁷ Kwapitile matena mukaza hekulyendi watatikile kulishozela Yoshefwa, pe wamunyepele ngayi, aye akalale nendi.

⁸ Ngoboni Yoshefwa wakanine, wambile kukwendi ngayi, “Mona taha, hekulyami kulifulankana shuma shimo sha mu litala lyendi wufwako, ndaba nili muno. Unanyaka wukulwane wakulama byuma nimwabyo alinabyo.

⁹ Nili na ngovu shikuma mu litala lino ngonehe niye, kami kukanisha shuma shimo wufwako ndele tuhu obe, ndaba uli mukazendi. Haya nikutwesha kutenda nahiti wubi wanehe na Kubipisha kuli Nyambi?”

¹⁰ Hinge noho wayipwilenga Yoshefwa ha mutena ha mutena, ngoboni kaliha walanganine nendi.

¹¹ Ngoboni mutena umo oho Yoshefwa enginine mu litala na kutenda milimo yendi, mowa muntu wekalilemo.

¹² Mukaza Potifwa wamukwatile ku shivwalo shendi pe wambile ngayi, “Yeka nilale nobe.” Ngoboni Yoshefwa watutikile lubilo ha munkanda, washiyile shivwalo shendi mu liboko lyendi.

¹³ Oho amonene ngayi unashiyi shivwalo shendi na kwitukila ha munkanda,

¹⁴ mukaza Potifwa wabilikizile ku bakamilimo na kwamba ngayi, “Monenu taha, ou Kahebelu aleta mukokwami mu litala uli na kutuhandula. Nezi mu kunyinginina mu kampenci kami, pe nezeke kunkandikiza, ngayi nilale nendi. Ngoboni nabilikizi shikuma na lizu lyalinene.

¹⁵ Oho anayuvu ngayi nabilikizi, niho anashiyi shivwalo shendi kukwami, unetuku na kututikila ha munkanda.”

¹⁶ Mukaza Potifwa watentekele shivwalo shendi kutwala noho akumine hekulyendi Yoshefwa.

¹⁷ Niho amushimikilile shambo nimwasho ngayi, “Ou ndungo wa Kahebelu uya waletele kuno unezi mu litala mu kuhandula.

¹⁸ Ngoboni oho nabilikizi, niho anetukili ha munkanda na ku shiya shivwalo shendi kukwami.”

¹⁹ Hekulyendi Yoshefwa oho ayuvwile mazu awa amutongwezele mukazendi ngayi, “Eshe nisho anatende ndungo yobe kukwami,” Wapilamine shikuma.

²⁰ Wakwatile Yoshefwa naku muyaka mu tolongo omu bashinkililenga batuyili bamwene, pe nimo ekalilenga.

²¹ Ngoboni Nyambi ya Ngula wekalile hamo na Yoshefwa nohobene wamutandalishile, pe mukakulama tolongo wamuwahilishilenga ku mutima.

²² Niho ayakile Yoshefwa kwinga mukakulama batuyili nimwabo. Yoshefwa wekalile na ngovu ha byuma nimwabyo bya mu tolongo biya batendelenga batuyili.

²³ Mukakulama tolongo kaliha walifulankaninenga ha byuma bimo biya byekalile mu maboko a Yoshefwa ndaba Nyambi ya Ngula wekalile hamo na Yoshefwa, watangamishile byuma nimwabyo obyo atendelenga.