Shitatiko 38 - Libuka Lya Kuyela

Yunda na Tamale

¹ Ha shikati shiyo Yunda wafumine ku bayayizendi, wayile mukwikala na Hila, mulume wamu munzi wa Andulama.

² Niho Yunda akamonene mbuyama wamu Kenaani mwana Shuwa. Wamuyekele,

³ pe wamubelekelele mwana wa mulume, ou atumbile ngayi Ela.

⁴ Wemitile kami, wabelekele mwana wamulume, wamutumbile ngayi Onani.

⁵ Kami wabelekele mwana wa mulume, wamutumbile ngayi Shila. Yunda wekalile ku Kezimbu oho Shila ahemuwile.

⁶ Yunda wayekelele Ela mwanendi mbuyama lizina lyendi Tamale.

⁷ Nyinkalo ya Ela mwana Yunda wakutatika yengile yayibi ku meho a Nyambi ya Ngula, pe Nyambi ya Ngula wamuzihile.

⁸ Niho Yunda ambile kuli Onani mukonzo wa Ela ngayi, “Yanga ukalangane na mfwile wa yayiyobe. Tenda mulimo kukwendi ndaba nengi mukaza yayiyobe ngayi yayiyobe mwanga ekale na bazukulu.”

⁹ Ngoboni Onani walimukile ngayi bana kaliha bakenga bendi, pe oho alalilenga na mfwile wa yayiyendi wayitililenga hanci, kutina mwaka kukekala bana kuli yayiyendi.

¹⁰ Eshe atendelenga shapilamishile Nyambi ya Ngula, pe wamuzihile.

¹¹ Niho Yunda ambile kuli mukowendi ngayi, “Boka ku litala lya tatiyobe hinga wenga mfwile hantu mwanami Shila unakulu.” Wambile eshe ndaba watinine ngayi Shila ukazihiwa ngonehe bengile bayayizendi. Nohobene Tamale wabokele ku litala lya tatiyendi.

¹² Oho kwapitile matena, mukaza Yunda mwana Shuwa wafwile, oho Yunda amanishile zintande, niye na muhoni wendi Hila waku Andulama bayile ku Timina, oku bashehelenga bambelele bendi.

¹³ Muntu wamina watongwezele Tamale ngayi, “Mukowobe uli na kuya ku Timina mu ku sheha matanga a bambelele bendi.”

¹⁴ Nohobene Tamale watambashanine bivwalo byendi bya wumfwile ebye avwalilenga. Walifwikile likwiza lya shitokesha pe wekalile hanci ku lipangati lya ku Enaimu, ku munzi ou wekala ha nzila ya kuya ku Timina. Tamale walimukile ngayi Shila wakulakale, ngoboni kaliha napanikiwi kukwendi ngayi amuyeke.

¹⁵ Oho Yunda amumonene wahanganikile ngayi ou mbuyama walwiholwiho ndaba ngayi walifwikile ku lupala lwendi.

¹⁶ Wamwihanine kunkumo ya nzila pe wambile ngayi, “Nikushinga nilangane nobe.” Ngoboni Yunda kaliha walimukile ngayi mukowendi Tamale. Niho Tamale ambile ngayi, “Ukampana bishini ha kulangana na nami?”

¹⁷ Yunda wakumbwile ngayi, “Nikakutumina kana ka mpongo ku litanga lyami.” Tamale wambile ngayi, “Nimwasho shashiwahe, mpane taha kalamisho ndele unakakalete.”

¹⁸ Yunda wamwipwile ngayi, “Kalamisho ngani?” Wakumbwile ngayi, “Limango na mukali walyo uli na lizina lyobe na muwana ou unashimbi.” Pe wamupanikilebyo. Walalile nendi pe wemitile.

¹⁹ Niho Tamale ayile ku munzi, pe wavulile likwiza lya shitokesha shendi na kuvwala makwiza wendi a wumfwile.

²⁰ Yunda watumine muhoni wendi Hila ku Andulama na kana ka mpongo mu kubwesha kalamisho ku mbuyama, ngoboni kaliha wakamuwanine.

²¹ Wepwile bantu bekalilenga kuyo ngayi, “Ulikuti ou mbuyama walwiholwiho ou wekalilenga kunkumo ya nzila yikuya ku Enaimu?” Bakumbwile ngayi, “Hinga kwatanga kuno, shilolo kwikale mbuyama walwiholwiho.”

²² Hila wabokele kuli Yunda, pe wamutongwezele ngayi, “Kaliha nakamuwana, bantu ba kuyo bambile ngayi hinga kwatanga kwikala mbuyama walwiholwiho.”

²³ Yunda wambile ngayi, “Mulehele biya byuma, kushinga tufwako ngayi tukahepiwe ku bantu. Nashinga ku mupana kana ka mpongo ngoboni kaliha wamuwana.”

²⁴ Oho zingonda zihatu zapitile muntu umo watongwezele Yunda ngayi, “Mukowobe Tamale unatende wumambe, pe haya uli na livumo.” Yunda walayile ngayi, “Mututwishenu mukamuhokeshe afwe.”

²⁵ Oho bamututwishilenga ha munkanda, Tamale watumine lizu kuli mukowendi ngayi, “Mwine byuma ebye, niye unampana livumo. Tilaminenubyo na ku mona ngayi binengi byayani, elye limango na mukali walyo na nou muwana.”

²⁶ Yunda wabilimukile pe wambile ngayi, “Nengi shiwahe. Ngoboni ami nashobolo kulimanga kwetu nafwaninine ku mupana kuli mwanami Shila ngayi amuyeke.” Kufuma haya Yunda kaliha walalile nendi kami.

²⁷ Oho shikati sha kubeleka kwendi sha kumine, kwawaniwile ngayi Tamale ukubeleka bambuyu.

²⁸ Oho ayendukile, umo watutwishile liboko lyendi, pe mboshwa walikwatile, wamangileko kawutonge kakufubila, wambile ngayi, “Ou niye wakutatika kuhemuwa.”

²⁹ Ngoboni wabweshele liboko lyendi, pe mukonzo wendi walimenekele kuhemuwa. Niho mboshwa wambile ngayi, “Eshe nisho ukutibulula nzila yobe.” Nohobene wamutumbile ngayi Pelizi.

³⁰ Niho mukonzo wendi wahemuwile na kawutonge kakufubila ku liboko lyendi. Pe wamutumbile ngayi Zela.