Shitatiko 37 - Libuka Lya Kuyela

Yoshefwa na Bayayizendi

¹ Yakobo wazaminine kuzika mu litunga lya Kenaani, omu bazikilenga batatiyendi.

² Kami owe niwo mukoka wa lupashi lwa Yakobo. Yoshefwa wengile ndumbana wa myaka 17, oho alaminenga matanga a bambelele na bampongo hamo na bayayizendi, bana ba Mbiliha na Zilipa babalume, bakaza tatiyendi bakwinginina. Pe wabuzikile kuli Tatiyendi byuma byabibi ebye batendelenga bayayizendi.

³ Ishalela wahakile shikuma Yoshefwa kupitakana bana bendi nimwabo babalume, ndaba wamubelekelele mu wukulwane. Pe wamutungilile shikobelo shashitali maboko.

⁴ Oho bayayizendi bamonene ngayi tatiyabo unahaka shikuma Yoshefwa kupitakana shiya abahakile, bazimbile mukonzowabo shikuma ngayi kaliha batweshelenga kwamba nendi shiwahe.

⁵ Wushiku umo Yoshefwa walotele mulo, kami oho awutontwelele ku bayayizendi, pe bayayizendi bamuzimbile shikuma.

⁶ Wambile ngayi, “Yuvwenu taha ku mulo ou naloto.

⁷ Nimwetu twekala mu mfuba ya loto, hitumanga mihwa. Haya muhwa wami wakatuka na kwimana lwii, pe mihwa yenu yazinguluka ku muhwa wami na kulamba.”

⁸ Niho bayayizendi bambile kukwendi ngayi, “Kati obe ukuhanganika ngayi ukenga mwene wetu na kutulela ndi?” Nohobene bamuzimbile shikuma kupitakana ndaba yanebye alotele.

⁹ Niho Yoshefwa alotele mulo wamina, pe wawutongwezele bayayizendi ngayi, “Naloto mulo wamina. Mu mulo owe namono mutena na ngonda na nyenye likumi na lumo hibilamba kukwami.”

¹⁰ Watongwezele mulo wendi kuli tatiyendi, pe tatiyendi wamwambilile ngayi “Kati ou mulo unaloto wanahiti? Kati obe ukuhanganika ngayi mandiyobe na bayayizobe na nami tukeza kukwobe na kulamba ndi?”

¹¹ Bayayizendi Yoshefwa bamuyuvwilile mwili, ngoboni tatiyendi wayakile shambo eshe mu mutima wendi.

Yoshefwa Bakumulandisha na kutwaliwa ku Engepita

¹² Bayayizendi Yoshefwa bayile ku Shekemu mu kubuyisha litanga lya tatiyabo.

¹³ Pe Ishalela wambile kuli Yoshefwa ngayi, “Nikushinga ngayi uye ku Shekemu oku bayayizobe ba kubuyishila litanga lya bambelele.” Yoshefwa wakumbwile ngayi, “Naliwahishilakale. Nikuya.”

¹⁴ Tatiyendi wamutongwezele ngayi, “Haya yanga mu ku mona bayayizobe ndi balishiwahe, kami litanga ndi lilishiwahe nimwalyo, pe wize untongwezeko.” Nohobene tatiyendi wamutumine ku Shekemu oho ushili ku mukulo wa Hembuloni.

¹⁵ Oho akumine ku Shekemu, pe muntu wamuwanine hayambangila mu mbuwa, pe wamwipwile ngayi, “Kati uli na kushinga bishini?”

¹⁶ Wakumbwile ngayi, “Nili na kushinga bayayizami, aba bali na kubuyishila litanga lyabo lya bambelele. Kati ukutwesha kuntongweza oku ba kubuyishila ndi?”

¹⁷ Pe uya muntu wambile ngayi, “Bayakale. Nabayuvwa hibamba ngayi, bali na kuya ku Ndotana.” Niho Yoshefwa wakonkele bayayizendi pe wakabawanine ku Ndotana.

¹⁸ Ngoboni oho bamumonene ushili kwendela hahatali, kami oho shilolo akume kwakwipi nabo, bamubebele pe bashingile ngayi bamuzihe.

¹⁹ Niho bambile umo na wamina ngayi, “Monenu uya mukamilo uli na kwiza.

²⁰ Yekenu kuno tumuzihe na kumuyumbila ku limo lya nawa mashima anyuminine. Tukatwesha kwamba ngayi kanzama ka mu lishaka niko kamuzihi, mwanga tukamone eshe shikaholoka mu milo yendi.”

²¹ Lubena wabayuvwile bamba, pe wezekele kulamwina Yoshefwa. Wambile kukwabo ngayi,

²² “Hinga tumuziha boha. Tumuyumbilenu tuhu mu lishima lino lya mu libelelengwa, ngoboni hinga mu mulemeka.” Wambile nehe ndaba wekalile na bihanganiko bya kumupulwisha na kumubwesha kuli tatiyendi.

²³ Oho Yoshefwa akumine kuli bayayizendi, bamuvulile shikobelo shendi shashitali maboko.

²⁴ Bamukatwile, pe bamuyumbilile mu lishima lyanyuminine.

²⁵ Oho balilenga, babazumukile tuhu litanga lya Baishimaele bafuminenga ku Ngiliyande. Makamela wabo bawatwikile mazi akunuka shiwahe na lemba, batwalilenga ku Engepita.

²⁶ Yunda wambile ku bayayizendi ngayi, “Tukawanaho bishini ndi tukupununa mukonzowetu na kulimba lufu lwendi?

²⁷ Tokonoko tumulandishe tuhu ku Baishimaele aba. Ndi tukutenda nehe, pe kukamulemeka tufwako, ha kuwana kami ngayi nengi mukonzowetu, nengi lutu lwetu na mukeza wetu.” Bayayizendi betabilile.

²⁸ Oho bakakulandisha bamo ba Bamindiyani bakumine hahepi bayayizendi bakokele Yoshefwa na kumufumisha mu lishima, pe bamulandishile ku Baishimaele na makumi abili a mali a muwayawaya wa shiliva. Aba bamutwalile ku Engepita.

²⁹ Oho Lubena abokele ku lishima, wawanine ngayi Yoshefwa mowa, watabwele bivwalo byendi mu wunginga.

³⁰ Wabokele ku bakonzobendi na kwamba ngayi, “Ou kanuke muyo mowa, Ami haya, nikwinga nahiti?”

³¹ Niho bapunwine mpongo pe bazubikile shikobelo sha Yoshefwa mu mukeza wa mpongo.

³² Batwalile shikobelo kuli tatiyabo. Bambile ngayi, “Tunawana eshe shikobelo. Nisho shinengi shikobelo sha mwanobe ndi?”

³³ Yakobo washilimukile pe wambile ngayi, “Ee, shinengi shendi. Kanzama wa lishaka wamupununakale. Yoshefwa mwanami waliwakale.”

³⁴ Yakobo watabwile bivwalo byendi, pe wavwalile bincancolo mu wunginga wendi. Walilile mwanendi shikati shashitali.

³⁵ Bana bendi nimwabo babalume naba ba bambuyama bezile na kumubengezeka, ngoboni wakanine kubengezekiwa. Wambile ngayi, “Nikalila mwanami lilee, kutwala shikati sha kuya mu kalunga.” Kami wazaminine kulila mwanendi Yoshefwa.

³⁶ Oho shikati shiyo Bamindiyani balandishakale Yoshefwa mu Engepita kuli Potifwa, ou wengile umo ku babilolo ba Fwalo mu Engepita, nkongo wa bakakulama ku musheke.