Shitatiko 36 - Libuka Lya Kuyela

Bazukulya Ishau

¹ Aba nibo bazukulya Ishau, ou kami watumbiwile Endoma.

² Ishau wayekele bambuyama ba Bakenaani, bengile Anda mwana Eloni wa Kahita na Oholimbama mwana Anahi wa mbuyama, ou wengile mwana Zimbeyoni wa Kahivi wa mulume,

³ na Mbashamati mwana Ishimaele wa mbuyama mpanza Nebayoti.

⁴ Pe Anda wabelekele kuli Ishau Elifwazi, Mbashamati wabelekele Leule,

⁵ pe Oholimbama wabelekele Yeushi na Yalamu na Kola. Nimwabo aba bana ba Ishau babalume bahemuwilile mu litunga lya Kenaani.

⁶ Ishau niho ashimbile bakazendi na bana bendi babalume naba bambuyama na bantu bendi nimwabo bamu litala lyendi na bimuna byendi nimwabyo na wuheti nimwawo ou ahetele mu litunga lya Kenaani, pe washiyile mukonzo wendi Yakobo na kuya ku litunga lyashenge.

⁷ Wayile ndaba litunga oku bazikilenga na Yakobo kaliha lya bakonkanine, ndaba bekalile na bimuna babengi, pe kaliha batweshele kami kwikala hamo.

⁸ Nohobene Ishau wazikile ku litunga lya binkanda lya Endoma.

⁹ Aba nibo bazukulya Ishau, nkaka Baendoma, aba bekala mu litunga lya binkanda lya Sheya.

¹⁰ Mazina a bana babalume ba Ishau bengile aba, Elifwazi mwana Anda mukaza Ishau na Leule mwana Mbashamati mukaza Ishau.

¹¹ Bana babalume ba Elifwazi bengile ba Temani na Omala na Zefwo na Ngatama na Kenazi.

¹² Elifwazi kuli mukazendi wamina wakwinginina Timina, wabelekeleleko kami mwana umo wa mulume Amaleki.

¹³ Bana babalume ba Leule bengile aba, Nahati na Zela na Shama na Miza. Aba bengile bazukulya Mbashamati mukaza Ishau.

¹⁴ Bana babalume ba Oholimbama mukaza Ishau bengile aba, Yeushi na Yalamu na Kola. Olihabama wengile mwana Anahi, Anahi mwana Zimbeyoni.

¹⁵ Mazina a bamyene babazukulya Ishau bengile aba, Elifwazi mwana Ishau wa mweli, wengile nkaka mishobo eye ya ba Temani na Omala na Zefwo na Kenazi,

¹⁶ na Kola na Ngatama na Amaleki. Aba bengile bamyene ku bana ba Elifwazi mu litunga lya Endoma. Nimwabo aba bengile bazukulya mukaza Ishau Anda.

¹⁷ Kuli mwana Ishau wa mulume Leule mu litunga lya Endoma, mazina a bamyene bengile aba ou wengile nkaka mishobo ya Nahati na Zela na Shama na Miza. Mishobo eye nimwayo yinengi bazukulya Mbashamati, mukaza Ishau.

¹⁸ Mu livumo lya Oholimbama mukaza Ishau mwana Anahi wa mbuyama, mazina a bamyene bengile aba, ba Yeushi na Yalamu na Kola

¹⁹ Aba nibo bazukulya Ishau hinge Endoma, hamo na bamyene babo.

Bazukulya Sheya

²⁰ Aba nibo bazukulya Sheya Kaholi, Nibo bakutatika kuzika mu litunga lya Endoma. Nibo bengile Lotana na Shobala na Zibeyoni na Anahi,

²¹ na Ndishani na Eza na Ndishoni. Aba bazukulya Sheya bana ba Holi bengile bamyene mu litunga lya Endoma.

²² Lotana wengile nkaka ya mavumo a Baholi na Hemani. Timina niye wengile mpanzendi.

²³ Shobala wengile nkaka ya mavumo aba Alivani na Manahati na Embalu na Shefwo na Onama.

²⁴ Aba nibo bana babalume babili abelekele Zibeyoni, Aiya na Anahi. Anahi ou wawanine mema akutukuma a kaheloke mu libelelengwa, oho abuyishilenga bambongolo batatiyendi Zibeyoni.

²⁵ Anahi wabelekele Ndishoni, kami wabelekele mwanendi wa mbuyama watumbiwile Oholimbama.

²⁶ Ndishoni wengile nkaka ya mavumo aba Hemundani na Eshimbani na Itilani na Kelani.

²⁷ Eza wengile nkaka ya mavumo a Mbilihani na Zaavani na Akani.

²⁸ Ndishani wengile nkaka ya mavumo a Uzi na Alani.

²⁹ Eye niyo mishobo ya Holi mu litunga lya Endoma, niyo Lotana na Shobala na Zibeyoni na Anahi,

³⁰ na Ndishoni na Eza na Ndishani.

Bamyene ba Endoma

³¹ Aba nibo bamyene balelele litunga lya Endoma ha shikati kwa bulilenga bamyene mu Ishalela, ba shwaninenga umo kufwa, wamina pe aku hingaho.

³² Mbela mwana Mbeyola wa mulume lukena lwendi lwa tumbiwile Ndinihamba.,

³³ Oho Mbela afwile, pe Yombambu mwana Zela wa mulume waku Mbozila wa mu shwanine.

³⁴ Oho Yombambu afwile, pe Hushami waku litunga lya Temani wamushwanine.

³⁵ Oho Hushami afwile, pe Handandi mwana Mbendandi wa mulume, ou wakomene Bamindiyani mu litunga lya Mowambi wamushwanine. Lukena lwendi lwatumbiwile ngayi Aviti.

³⁶ Handandi wafwile, pe Shamila waku Mesheleka wamushwanine.

³⁷ Oho Shamila afwile, Shaulu waku Lehomboti ku shibumbo sha mushinzi wa Yufuleti wamushwanine.

³⁸ Oho Shaulu afwile, Mbaalu Hanani mwana Akimbo wa mulume wamushwanine.

³⁹ Oho Mbaalu Hanani mwana Akimbo afwile, Handa wamushwanine. Lukena lwendi lwatumbiwile Pau. Lizina lya mukazendi Mahatambela mwana Matelandi, muzukulya Mezahaba wa mbuyama.

⁴⁰ Ishau wengile nkaka ya mishobo eye ya Baendoma, ba Timina na Aliva na Yeteti,

⁴¹ na Oholimbama na Ela na Pinoni,

⁴² na Kenazi na Temani na Mimbiza,

⁴³ na Mangindiyele na Ilama. Aba bengile bamyene ba ku Endoma. Endoma wengile tata Ishau. Zimbalila eze mwekalilenga mushobo na mushobo zatumbiwile na lizina lya mushobo owo wazikilengamo.