Shitatiko 35 - Libuka Lya Kuyela

Nyambi ukutandalisha Yakobo ku Mbetele

¹ Nyambi wambile kuli Yakobo ngayi, “Katuka uyenga ku Mbetele na kuzikako. Ukanzikileko kaala ka mamanya, Ami Nyambi ou waliholwele kukwobe, oho watinine kuli yayiyobe Ishau.”

² Nohobene Yakobo wambile ku bakalupashi lwendi naku nimwabo aba bekalile nendi hamo ngayi, “Fumishenu banyambi bashenge aba muli nabo, liyeleshenu enu bamwine, pe vwalenu bivwalo bya kuyela.

³ Tuli na kuya ku Mbetele, oku nikazikila Nyambi kaala ka mamanya ou wanyavwile ha shikati sha makalikiza wami na nou wekalile hamo na nami oku nimwako nayilenga.”

⁴ Nohobene bapanine kuli Yakobo banyambi nimwabo bashenge aba bekalile nabo, kami na tupatamatu nimwato otu twekalile ku matu wabo. Wabivumbikile mu nceto ya mutondo wa Telimbini ou wekalile hahepi na Shekemu.

⁵ Ha kufunzuka kwa Yakobo na bana bendi babalume, bantu bekalile mu minzi hahepi bekalile na bowa shikuma wa Nyambi, kami kaliha babakonkele.

⁶ Pe Yakobo wezile na bantu bendi nimwabo ku Luzi, munzi watumbiwile kami ngayi Mbetele, mu litunga lya Kenaani.

⁷ Wazikileko kaala ka mamanya, pe watumbile mbalila lizina lya Nyambi wa Mbetele, ndaba Nyambi waliholwele kukwendi oho atinine yayiyendi.

⁸ Niho Ndembola, shibeleki sha Lambeka, afwile pe wafundiwile mu nceto ya mutondo wa Oka ku mabukubuku a Mbetele. Niho bawutumbile ngayi, “Oka wakulilila.”

⁹ Oho Yakobo afumine ku Meshopotamiya, Nyambi waliholwele kami kukwendi, pe wamutandalishile.

¹⁰ Nyambi wambile kukwendi ngayi, “Lizina lyobe Yakobo ngoboni kufuma hano lizina lyobe likatumbiwa Ishalela.” Nohobene Nyambi wamutumbile ngayi Ishalela.

¹¹ Niho Nyambi ambile kukwendi ngayi, “Ami nengi Nyambi Mpandashilanga. Wikale na bana babengi. Matunga akatutika mumwobe, pe ukenga nkaka bamyene.

¹² Nikakupana litunga elye napanine kuli Abulahama na Ishaki, pe kami nikalipanika ku bazukulyobe bakahemuwa kumbili.”

¹³ Niho Nyambi amushiyile kufuma ha mwanya haya ambilenga nendi.

¹⁴ Yakobo wemikile limanya lya shanukisho ku mbalila kuya ambilenga nendi na kuyitilaho waine na mazi a olive.

¹⁵ Watumbile lizina lya mbalila iyo ngayi Mbetele ndaba Nyambi wambwele nendi kuyo.

Lufu lwa Lakele

¹⁶ Bafumine ku Mbetele, kami oho bashili kwakutali na Efulata, shikati sha Lakele sha kumine sha kubeleka. Wayendukile pe wakolele shikuma.

¹⁷ Oho kukola kwendi kwanenehele shikuma, mboshwa wambile kukwendi ngayi, “Hinga wutina ndaba mbututu nengi wa mulume kami.”

¹⁸ Ngoboni oho shilolo Lakele atule moyo, watumbile mwanendi ngayi Mbenoni, ngoboni tatiyendi wamutumbile ngayi Mbenjamani.

¹⁹ Oho Lakele afwile, wafundiwile kunkumo ya nzila yikuya ku Efulata, hano niyo Mbetelehema.

²⁰ Yakobo wemikileko limanya lya shanukisho ha shinzimbi shendi, kami elye limanya lyaha shinzimbi sha Lakele niko lili nihano.

²¹ Niho Ishalela akatukile, pe wemikileko munkungwa mu nciza ya kapeshi ka Mingindala Enda.

Bana ba Yakobo babalume

²² Oho Ishalela azikile mu litunga liyo, Lubena waloyanine na Mbiliha, umo ha bakaza tatiyendi bakwinginina. Yakobo wayuvwile ha shuma eshe pe wapilamine shikuma. Yakobo wabelekele bana babalume likumi na babili.

²³ Bana ba Leya babalume bengile Lubena mwana Yakobo wa mweli na Shimiyoni na Levi na Yunda na Ishaka na Zembuloni.

²⁴ Bana ba Lakele babalume bengile Yoshefwa na Mbenjamani.

²⁵ Bana ba Mbiliha ndungo ya Lakele babalume bengile Ndani na Nafwitali.

²⁶ Bana ba Zilipa ndungo ya Leya babalume bengile Ngandi na Asha. Aba nibo bana babalume ekalile nabo Yakobo mu Meshopotamiya.

Lufu lwa Ishaki

²⁷ Yakobo wezile kuli Tatiyendi Ishaki ku Mamele, oku batumbile ngayi ku Kiliyataba hinge Hembuloni, oku ekalilenga Abulahama na Ishaki.

²⁸ Oho Ishaki wekalakale na myaka 180,

²⁹ wafwile wakaliwanine na bantu bendi mukalunga. Wakulumpalile shikuma, pe bana bendi ba Ishau na Yakobo bamufundile.