Shitatiko 33 - Libuka Lya Kuyela

Yakobo ukuliwana na Ishau

¹ Yakobo wamonene Ishau heza hamo na bantu bendi myanda yinaa, nohobene watapulwile batwanuke mukati ka Leya na Lakele na bandungo ba bakazendi babili.

² Watwamikile bakazendi babili bakwinginina kumbili na bana babo, niho Leya na bana bendi munyima yabo, pe Lakele na Yoshefwa nibo bengile bamamaninino.

³ Yakobo wayile kumbili yabo na kulamba hanci bikati mutanu na bibili hantu oho akumine hahepi na yayiyendi.

⁴ Ngoboni Ishau wetukilileko na kumushimbawila, wamubumbatilile pe wamuzupezele. Pe balilile.

⁵ Oho Ishau atilaminine wamonene bambuyama na batwanuke wepwile ngayi, “Bayani aba bantu uli nabo?” Yakobo wakumbwile ngayi, “Aba, hekulu, banengi bana aba Nyambi anapaniki mukamulimo wobe mu nceshe zendi.”

⁶ Niho bandungo ba bakazendi bezile kwakwipi na bana babo na kulamba.

⁷ Niho Leya na bana bendi bezile. Ku mamaninino Lakele na Yoshefwa bezile na kulamba.

⁸ Ishau wepwile ngayi, “Haya ukutontolola bishini na uya muhoko wamina nalihangana nawo?” Yakobo wakumbwile ngayi, “Mwanga unyakeko, hekulyami.”

⁹ Ngoboni Ishau wambile ngayi, “Nili nabyo binankonkana mukonzo wami, tenteka ebye ulinabyo.”

¹⁰ Yakobo wambile ngayi, “Byo hekulu, ndi unanyakako, pe tambula bishemo byami ebye napana. Haya namono lupala lwobe kami unantambulu shiwahe, kukwami shinengi ngo namono lupala lwa Nyambi.

¹¹ Hekulu tambula bishemo ebye nakuletele. Nyambi wakanyuvwililenga nceshe na kumpanika nimwabyo ebye nashinganga.” Wazaminine na kumukandamika hantu noho atambwile.

¹² Niho Ishau ambile ngayi, “Tukatukenu, haya tuyenunga ha mukala wetu. Ami nikatwamina kumbili yenu.”

¹³ Ngoboni Yakobo wakumbwile ngayi, “Hekulyami, obe ukulimuka ngayi batwanuke ba kupopa, kami niku fwanina kuhanganika bambelele na zingombe na bana babo. Kami ndi tukazendesha shibi mutena umo, matanga nimwawo pe akafwa.

¹⁴ Hekulyami twamina kumbili yami, pe nika kukonka shashishe shashishe, ngo omu nikutweshela na bimuna na batwanuke pe nika kuwana mu litunga lya Sheya mu Endoma.”

¹⁵ Pe Ishau wambile ngayi, “Shashiwahe boni nishiye bantu bami bamo kukwobe.” Ngoboni Yakobo wakumbwile ngayi, “Osho ku shingiwa shifwako, nikushinga tuhu ngayi hekulu unyakeko.”

¹⁶ Nohobene Ishau wabokele wawuya mutena ku Endoma.

¹⁷ Ngoboni Yakobo wayile ku Shukota oku alizikilile litala na bishawashawa bya bimuna bendi. Osho nisho shuma batumbilile mwanya uya ngayi Shukota.

¹⁸ Yakobo wakumine shiwahe ku lukena lwa Shekemu mu litunga lya Kenaani ha kuboka kwendi kufuma ku Meshopotamiya. Wazikile munkungwa wendi hahepi na lukena.

¹⁹ Walandile mbalila iyo kuli bazukulya Hamole, tata Shekemu na mwanda umo wa muwayawaya wa shiliva.

²⁰ Wazikileko kaala ka mamanya kakulemeshela Nyambi pe washitumbile ngayi Elohe, Nyambi wa Ishalela.