Shitatiko 32 - Libuka Lya Kuyela

Yakobo ukuliwahishila kuliwana na Ishau

¹ Yakobo, aha ayilenga ha nzila yendi, mangeloyi a Nyambi alihanganine nendi.

² Oho Yakobo abamonene wambile ngayi, “Bano bakanzita ba Nyambi.” Nohobene watumbile lizina lya mbalila iyo ngayi Mahanayima.

³ Niho Yakobo atumine miluwe kuli yayiyendi Ishau mu litunga lya Sheya elye lyatumbiwile kami ngayi Endoma.

⁴ Wabatongwezele ngayi, “Kashimikenu kuli hekulyami Ishau ngayi, ami mukamulimo wobe Yakobo wakwombatala, nekalilenga na Lambani pe niho nehalile ha kuboka kukuma na ku shikati shino.

⁵ Nahete zingombe na bambongolo na matanga a bambelele na bampongo na bandungo babalume naba babambuyama. Nili na kukutumina lizu hekulyami, mu kulumbeza ngayi unyakeko.”

⁶ Oho bamiluwe babokele kuli Yakobo, bambile ngayi, “Twayile kuli yayiyobe Ishau, kami uli mu nzila kwiza mu ku kushimbawila. Ukwiza na balume myanda yinaa.”

⁷ Yakobo watinine shikuma na kulikekula, watapulwile bantu aba ekalile nabo na matanga a bambelele bendi na bampongo na zingombe na makamela mu tunzunga tubili.

⁸ Wahanganikile ngayi, “Ndi Ishau ukwiza na kulwisha kanzunga kakutatika, bamina kampe ba kutwesha kupanza.”

⁹ Niho Yakobo walombelele ngayi, “Nyuvwe, obe Nyambi ya tate Abulahama na tate Ishaki. Obe Nyambi ya Ngula, wantongwezele ngayi, ‘Boka ku litunga lyobe naku bawushinda wobe, pe nikendesha shiwahe byuma nimwabyo kukwobe.’

¹⁰ Kaliha nafwanina kuwana eze nceshe na kwoloka oku nimwako unahololo kukwami ami mukamulimo wobe. Oho nazabukilenga Yondana nendele mabokoboko ndele tuhu muwana mu liboko, haya ninakuboka na tunzunga tubili.

¹¹ Nikunyepa kukwobe ngayi undamwine kuli yaya Ishau, ndaba nili na bowa ngayi ukwiza mu kutulwisha na kulobesha nimwetu kumo na bakazami hamo na batwanuke.

¹² Ngoboni obe wambile ngayi, ‘Mwa shikuma nikakwendeshela shiwahe byuma byobe nimwabyo, kami nika kupanika bazukulu babengi shikuma bakubula kutwesheka kulabiwa. Bakenga babengi ngonehe lihekelela lya ku liwate.’ ”

¹³ Nohobene walanganine uyo wushiku. Oho kwashile, Yakobo wahatile bimuna ku matanga wendi ba kupanika yayiyendi Ishau.

¹⁴ Bampongo ba bankaziwa ba myanda yibili na babikungwe makumi abili na bambelele ba bankaziwa myanda yibili na babikungwe makumi abili,

¹⁵ na makamela akuyamwisha makumi ahatu na bana babo na zingombe za bitole makumi anaa na zingombe na bankunzi likumi ba bambongolo.

¹⁶ Wapanikile litanga na litanga ku umo na umo ha bakamilimo bendi ngayi bawalame, pe wambile kukwabo ngayi, “Twaminenu kumbili yami na ku shiya mwanya mukati ka litanga na litanga.”

¹⁷ Walayile mukamulimo wakutatika ngayi, “Oho yaya Ishau akamihangana na kumipula ngayi, ‘Kati hekulyenu yani? Mu kuya kuti? Yani waheta aba bimuna bali kumbili yenu?’

¹⁸ Uku fwanina kukumbula ngayi, ‘Binengi bya mukamulimo wobe Yakobo ou ulinakwiza munyima yetu.’ ” Pe yinengi ntupu yikwiza kuli hekulyendi Ishau.

¹⁹ Kami walayile mukamulimo wendi wawubili na wawuhatu nohobene naku nimwabo bakonkelenga matanga ngayi, “Ebye nibyo mu ku fwanina kwamba kuli Ishau oho mu kumuhangana.

²⁰ Mu ku fwanina kwamba ngayi, ‘Ingoi, mukamulimo wobe Yakobo uli munyima yetu.’ ” Yakobo wahanganikile ngayi, “Kampe nikamutekenyesha na bishemo ebye bikuya kumbili yami, oho tukaliwana kampe ukanyatila.”

²¹ Bishemo byayilengaho kumbili yendi, pe walanganine wushiku uyo mu munkungwa.

Yakobo ukulikwata mu kapumpo na lingeloyi ku Peniweli

²² Wa wuya wushiku bene Yakobo wakatukile, washimbile bakazendi babili na bandungo ba bakazendi babili na bana bendi balikumi na umo, pe wazabukile Mushinzi wa Yamboki ha mwaba.

²³ Oho abazabwishile, niho kami azabwishile nimwabyo biya ahetele.

²⁴ Pe washalile kuyo ninkayendi. Niho kwezile mulume walikwatile nendi mu kapumpo kutwala ku kusha kwa mutena.

²⁵ Oho uya mulume amonene ngayi kupitakana mu yiya ngunga wufwako walyatile Yakobo mu ntungi, pe ntungi yendi yashonkonokele mukatobola.

²⁶ Pe uya mulume wambile ngayi, “Ndehe niyenga, ndaba mutena uli na kututika.” Ngoboni Yakobo wakumbwile ngayi, “Kukuleha nifwako ngayi uye hantu unantandalishi.”

²⁷ Wamwipwile ngayi, “Kati lizina lyobe obe yani?” Wakumbwile ngayi, “Ami Yakobo.”

²⁸ Pe uya mulume wambile ngayi, “Lizina lyobe kukatumbiwa kami ngayi Yakobo lifwako, ndaba unalu ngunga na Nyambi kami unalu na bantu pe unapitakana, nohobene lizina lyobe likatumbiwa Ishalela.”

²⁹ Yakobo wambile ngayi, “Nikukunyepa ngayi untongweze kami nobe lizina lyobe.” Ngoboni wakumbwile ngayi, “Shumangani ukwipwila lizina lyami?” Niho atandalishile Yakobo.

³⁰ Niho Yakobo atumbile mbalila iyo ngayi Peniyelu, ndaba wambile ngayi, “Namono Nyambi lupala na lupala, kami nishili kuyoya.”

³¹ Yakobo wakatukile ha kututika kwa mutena kufuma ku Penuwele, kami washunkutilenga ndaba ya ntungi yendi.

³² Eshe nisho shuma hinga lelo bazukulya Ishalela babulanga kulya makana amu ntungi, ndaba aha ha makana niho alyatiwilile Yakobo.