Shitatiko 31 - Libuka Lya Kuyela

Yakobo ukushila kuli Lambani

¹ Yakobo wayuvwile ngayi bana ba Lambani babalume bali na kwamba ngayi, “Yakobo unashimbi byuma nimwabyo biya byengile bya tatiyetu. Pe kami unashimbi wuheti nimwawo uya ahetele tatiyetu.”

² Kami wamonene ngayi shishemo sha Lambani shinamana kaliha ngonehe shekalile mwaka.

³ Niho Nyambi ya Ngula ambile kuli Yakobo ngayi, “Bokanga tuhu ku litunga lya batatizobe naku bawushinda wobe. Nami nikekala nobe.”

⁴ Nohobene Yakobo watumine lizu kuli Lakele na Leya mu kuliwana nendi ku mabuyishilo oku kwekalile matanga wendi.

⁵ Pe wambile ngayi, “Nikulimuka ngayi tatiyenu ku moneka shishemo kukwami wufwako ngonehe mwaka, ngoboni Nyambi ya batate uli hamo na nami.

⁶ Nenu mu kulimuka ngayi natendelelenga milimo tatiyenu na ngovu zami nimwazo.

⁷ Ngoboni wanyongezele na kutambashana zincuungu zami bikati bya likumi. Ngoboni Nyambi ya Ngula kaliha wamwitabilile ngayi antende shibi.

⁸ Hinge ndi Lambani wambile ngayi, ‘Bampongo ba minkululu bakenga zincuungu zobe,’ niho litanga nimwalyo lyahemene bana ba minkululu.

⁹ Mu nzila eye Nyambi unafumishi matanga a bimuna kuli tatiyenu nawampaniki.”

¹⁰ Ha shikati sha kulikandama nalotele, pe namonene ngayi, “Babikungwe ba bampongo baya bakandaminenga bengile ba minkululu na ba kubalanga naba mankenca.

¹¹ Niho Lingeloyi lya Nyambi lyambile kukwami mu mulo ngayi, ‘Obe Yakobo.’ Nakumbwile ngayi, ‘Ami wuno.’

¹² Pe wambile kukwami ngayi, ‘Yimbula meho wobe umone, babikungwe ba bampongo nimwabo baya ba kukandama banengi ba minkululu na ba kubalanga naba mankenca. Nahololo ebye ndaba namono nimwabyo biya ali na kutenda Lambani kukwobe.

¹³ Ami nili Nyambi ou waliholwele kukwobe ku Mbetele oku wafungwilile limanya lya shanukisho na kuyitilaho mazi, oku walibezelele mbeza kukwami. Haya liwahishe, ubokenga ku litunga lyobe oku wahemuwilile.’”

¹⁴ Niho Lakele na Leya bakumbwile ngayi, “Kowa shuma shinashalako kukwetu sha kukona kuli tatiyetu.

¹⁵ Unatufutulu ngo bakakwenda, watulandishile, pe kami haya napanzanishi mali nimwawo aha zinyutu zetu.

¹⁶ Wuheti nimwawo ou Nyambi anayangulu tatiyetu unengi wetu na banabetu. Tenda nimwasho eshe anakutongweze Nyambi.”

¹⁷ Niho Yakobo wakatukile, wayakile bana bendi na bakazendi ha makamela.

¹⁸ Pe washimbile matanga nimwawo a bimuna na nimwabyo biya awanine mu Meshopotamiya, mu kuboka kuli tatiyendi Ishaki mu litunga lya Kenaani.

¹⁹ Lambani wayile mu kusheha bambelele bendi, pe ha shikati osho abulileko, Lakele wayibile banyambi bamu litala lya tatiyendi.

²⁰ Pe Yakobo wongezele Lambani Kaalemiya na kubula kumutongweza ngayi uli na kuya.

²¹ Washimbile byuma nimwabyo ebye ekalile nabyo, pe wakatukile na kuya. Wazabukile mushinzi wa Yufuleti, pe wayile ku litunga lya binkanda lya Ngiliyande.

Lambani ukukonka Yakobo

²² Oho kwapitile matena ahatu Lambani bamutongwezele ngayi Yakobo unashili.

²³ Washimbile bawushinda wendi hamo nendi na kukonka Yakobo ha matena mutanu na abili, hantu noho bakamuwanine mu litunga lya binkanda lya Ngiliyande.

²⁴ Mu mulo ku wushiku wuyo, Nyambi wezile kuli Lambani Kaalemiya na kwamba kukwendi ngayi, “Keya, hinga wambila Yakobo mazu amabi.”

²⁵ Haya Yakobo watendele ntanda yendi mu litunga lya binkanda, kami Lambani watendelelele ntanda yendi na bawushinda wendi mu litunga lya binkanda lya Ngiliyande.

²⁶ Lambani wambile kuli Yakobo ngayi, “Shumangani wanyongezela na kushilisha bana bami ba bambuyama ngo bantapwa banakwatiwi mu nzita?

²⁷ Shumangani unabembuluku kunyongeza na kubula kuntongweza? Shinga wantongweza, shinga na ku shindikiza na kwimbila nyimbo na kumbeta tuncingili na tumbuli.

²⁸ Kaliha wetabila ngayi nizupeze bazukulyami na kulilaya na bana bami. Ebye unatende bya wuleya.

²⁹ Nili na ngovu za kukulemeka, ngoboni haya wushiku unamana Nyambi ya batatiyobe wancuza ngayi, ‘Mona, hinga wambila Yakobo mazu amabi hinge amawahe.’

³⁰ Nikulimuka ngayi obe washila ndaba wekala na shitima sha kuboka kukwenu, hayaboni shumangani wayibila banyambi bami?”

³¹ Yakobo wakumbwile Lambani ngayi, “Ndaba nekala na bowa niho nahanganika ngayi obe ukunyanga bana bobe.

³² Ngoboni ndi ukuwana ngayi kuno kuli umo uli na banyambi bobe ukazihiwa. Bano bantu betu banengi bapaki. Shinga byuma byobe na kushimbaho shobe.” Yakobo kaliha walimukile ngayi Lakele nayibi banyambi batatiyendi.

³³ Pe Lambani wenginine muntanda ya Yakobo na ku shinga. Niho ayile muntanda ya Leya namu ntanda ya bandungo ba bambuyama babili, ngoboni kaliha wawaninemo banyambi bendi. Niho ayile kami mu ntanda ya Lakele.

³⁴ Lakele washimbile banyambi bamu litala lya tatiyendi na kubayaka mu mpamba ya ku shipona sha kamela. Lambani washingashingile mu ntanda nimwayo ngoboni kaliha wabawanine banyambi bendi.

³⁵ Lakele wambile kuli Tatiyendi ngayi, “Hinga umpilamina hekulyami, shiya nabulu kutwesha kwimana ku meho wobe, ndaba ngayi natini mundilo.” Lambani wazembokele ngoboni kaliha wawanine banyambi bamu litala lyendi.

³⁶ Niho Yakobo apilamine na kwambila Lambani ngayi, “Kati mulandu ngani nili nawo? Nabipishi bishini bina kupana ngovu za kunkonka kuno?

³⁷ Haya unashingi shingi mu byuma byami nimwabyo haya wuheti ngani wamu litala lyobe unawanamo? Shitutwishile ha munkanda oku bantu bobe na bantu bami ba kutwesha ku shimona, kami shashiwahe bayate ngayi wuti kukwetu ou nengi wa kupwisha.

³⁸ Nekala nobe, hano yengakale hi myaka makumi abili. Bambelele bobe na bampongo bobe kaliha bakwanga kuhema, kami shilolo nilyeho shikungwe umo wakufuma mu litanga lyobe.

³⁹ Oho mbelele aliwilenga ku tunzama twalishaka, ami kaliha nabatwalilenga kukwobe mu kuku monesha ngayi kaliha mulandu wami, ngoboni nabahingishilengamo amimwine. Obe washingile ngayi nihingishemo nimwasho shiya shayibiwile ku mwaana hinge ku wushiku.

⁴⁰ Bikati nimwabyo nafwilenga ku ntukumina ya mwaana na mashika ku wushiku. Kaliha natweshelenga kulala.

⁴¹ Shengile nahiya ha myaka nimwayo nekalilenga nobe. Nakutendelele milimo myaka likumi na yinaa ha bana bobe ba bambuyama na myaka mutanu na umo ha matanga wobe. Hinge noho watambashanine zincuungu zami bikati bya likumi.

⁴² Shinga Nyambi ya batate, ou Nyambi wa Abulahama, ou atina Ishaki, shinga wabulile kwikala hamo na nami, shinga wantandile tuhu mwaka mabokoboko. Ngoboni Nyambi wamonene makando wami na mulimo ou natende, pe wushiku walelo unakuyata.”

Kulimama mukati ka Yakobo na Lambani

⁴³ Lambani wakumbwile Yakobo ngayi, “Bambuyama aba banengi bana bami na bana bobe banengi bami na matanga awa anengi wami. Pe nimwabyo ebye uku mona binengi byami. Ngoboni haya nikutenda nahiti ku bana bami aba, hinge ku bana bobe?

⁴⁴ Shashiwahe haya tuyenga tuliyuvwashane na nami na kubungika mushiinzi wa mamanya ukatwanukishenga kulimama kwetu.”

⁴⁵ Niho Yakobo emikile limanya lya shanukisho.

⁴⁶ Yakobo watongwezele bantu bendi ngayi bakungule mamanya na kuwabungika mushiinzi. Niho balililile byakulya hahepi na mushiinzi wa mamanya.

⁴⁷ Lambani wawutumbile ngayi Yenga Shahanduta, na lizina lya Ngalindi.

⁴⁸ Lambani wambile ngayi, “Ou mushiinzi wa mamanya ukenga wakutwanukisha wubili wetu.” Nisho shuma shatumbiwilile iya mbalila ngayi, “Ngalinde.”

⁴⁹ Lambani kami wambile ngayi, “Nyambi ya Ngula apenze meho hahetu aha tuli na kulitapa umo na wamina.” Nohobene mwanya watumbiwile ngayi Mizipa.

⁵⁰ Lambani wawezelele na kwamba ngayi, “Ndi ukayandisha bana bami ba bambuyama, hinge ndi ukayeka bashenge, hinge ndi ami ku shilimuka nifwako, ngoboni anuka ngayi Nyambi uli na kutumona.”

⁵¹ Niho Lambani ambile kuli Yakobo kami ngayi, “Ano niwo mamanya nabungiki mukatiketu, kami lino linengi limanya lya shanukisho.

⁵² Wubili wabyo na mushiinzi na nelye limanya binengi wupaki. Kukakiluka mushiinzi ou kwiza mu kukulwisha nifwako, kami obe kukakiluka ou mushiinzi kwiza mu kundwisha wufwako.

⁵³ Nyambi wa Abulahama na Nahole ukayata mukatiketu.” Niho Yakobo abezele mbeza mu lizina lya Nyambi ou alemeshelenga tatiyendi Ishaki.

⁵⁴ Wazihile shimuna, owe atupwile kwinga nkombela ha lipili, pe wehanine bawushinda wendi nimwabo kukulya. Aha bamanishile kulya, balanganine ha lipili wushiku nimwawo.

⁵⁵ Oho kwashile lumenemene, Lambani wazupezele bazukulyendi na bana bendi ba bambuyama na kubatandalisha na kubashalisha, pe wabokele ku munzi wendi.