Shitatiko 30 - Libuka Lya Kuyela

¹ Oho Lakele amonene ngayi luhemo ufwalwo lwa kubeleka na Yakobo bana, wayuvwililile yayiyendi lihungu, pe wambile kuli Yakobo ngayi, “Mpane bana, ndelewa nikafwa.”

² Yakobo wapilaminine Lakele wambile ngayi, “Kutwesha kushimba mwanya wa Nyambi nifwako. Niye unashinki luhemo lwobe.”

³ Lakele wambile ngayi, “Ndungo yami ou Mbiliha, lala nendi, ngayi atweshe kumbelekelako mwana. Mu nzila eye mwanga nikawane bana kupitila mumwendi.”

⁴ Nohobene wamupanikile ndungo yendi Mbiliha pe Yakobo walalile nendi.

⁵ Mbiliha wemitile, wabelekelele Yakobo mwana wa mulume.

⁶ Niho Lakele amutumbile ngayi Ndani ndaba wambile ngayi, “Nyambi unanyimanini. Unayuvwu malombelo wami, pe unampana mwana wa mulume.

⁷ Mbiliha ndungo ya Lakele wemitile kami, wabelekelele Yakobo mwana wa mulume wawubili.”

⁸ Niho Lakele amutumbile ngayi Nafwitali ndaba, “Nalu ngunga ya wunyambi na yaya, ngoboni namupitakana.”

⁹ Oho Leya amonene ngayi luhemo lwendi lunemana, pe wapanikile ndungo yendi Zilipa kuli Yakobo kwinga mukazendi.

¹⁰ Niho Zilipa abelekelele Yakobo mwana wa mulume.

¹¹ Niho Leya amutumbile ngayi Ngandi, ndaba wambile ngayi, “Nili wakutandala.”

¹² Zilipa wabelekelele Yakobo mwana wa mulume wawubili.

¹³ Niho Leya amutumbile ngayi Asha, ndaba wambile ngayi, “Nili waku wahilila, pe haya bambuyama bakantumba ngayi wakutandala.”

¹⁴ Ha shikati sha kuteza loto, Lubena wayile ku mafuba wakawanineko Mandileki pe wawuletele kuli mandiyendi Leya. Lakele wambile kuli Leya ngayi, “Mpeko ku wanga wa mwanobe wa maluwo.”

¹⁵ Ngoboni Leya wakumbwile ngayi, “Kati shinengi shuma shashiwahe kukwobe ha kunyangula mukokwami ndi? Haya ukushinga kami kunyangula mandileki.” Lakele wambile ngayi, “Ndi ukumpanika mandileki, pe ukutwesha kulala na Yakobo wushiku walelo.”

¹⁶ Oho Yakobo ezilenga kufuma ku mfuba mazolo, Leya wayile na kumushimbawila, pe wambile ngayi, “Uku fwanina kulala kukwami wushiku walelo ndaba na kuyumbili na mandileki ya mwanami.” Nohobene wakalalile nendi wushiku wuyobene.

¹⁷ Nyambi wakumbwile lilombelo lya Leya. Niho emitile, pe wabelekelele Yakobo mwana wa mulume wa mutanu,

¹⁸ ou atumbile ngayi Ishaka, ndaba Leya wambile ngayi, “Nyambi unampana ncuungu, ndaba napaniki ndungo yami kuli mukokwami.”

¹⁹ Pe Leya wemitile kami, wabelekelele Yakobo mwana wa mulume wa mutanu na umo.

²⁰ Niho amutumbile ngayi Zembuloni, ndaba wambile ngayi, “Nyambi unampaniki shishemo shashiwahe. Haya mukokwami ukanyakako ndaba namubelekele bana babalume mutanu na umo.”

²¹ Ha kukotoka wabelekele mwana wa mbuyama, ou atumbile ngayi Ndayina.

²² Niho Nyambi ya Ngula anukile Lakele, wakumbwile lilombelo lyendi, pe washinkwilile luhemo lwendi.

²³ Wemitile, wabelekele mwana wa mulume, pe wambile ngayi, “Nyambi unamfumishi lisheni ha kumpana mwana wa mulume.”

²⁴ Niho amutumbile ngayi Yoshefwa, Nyambi ya Ngula mwanga ampane mwana wa mulume wamina.

Yakobo na Lambani bakuliyuvwashana

²⁵ Oho Yoshefwa wahemuwakale, Yakobo wambile kuli Lambani ngayi, “Ndehe niyenga kukwetu.

²⁶ Mpanike bakazami aba natendelenga kukwobe milimo na bana bami, pe nikaya. Ndaba ukulimuka milimo eye na kutendela.”

²⁷ Ngoboni Lambani wambile kukwendi ngayi, “Nyintabilishe kwamba eshe nashingishishi mu ku taha namono ngayi Nyambi ya Ngula unantandalishi ndaba yanobe.

²⁸ Ntoyele ncuungu yobe, pe nika kupanikayo.”

²⁹ Yakobo wambile ngayi, “Obe mwine ukulimuka eshe nakutendele milimo, kami naneshe matanga wobe a bimuna anavulu ndaba ami ninawalama shiwahe.

³⁰ Oho shilolo nikume kuno, wekalile na byabishe, ngoboni haya binahanya shikuma, kami Nyambi ya Ngula unakutandalishi oku nimwako ninayinga. Haya ami nikabalika shikati ngani kulishingila bya mu litala lyami?”

³¹ Lambani wepwile ngayi, “Nikakupanika bishini?” Pe Yakobo wakumbwile ngayi, “Kushinga zincuungu zamina nifwako, nikazamina kulama matanga wobe, ndi ukwitabila ebye nikwamba.

³² Lelo nikuya ku matanga wobe nimwawo na kutapulula bana ba bambelele nimwabo ba kushipa naba ba mankenca na nimwabo ba kubalanga hinge bana ba bampongo nimwabo ba mankenca nanaba ba kubalanga. Eze nizo zikenga tuhu zincuungu zami.

³³ Matena a kumbili ukalimuka ngayi nengile muntu wa kupwisha, oho ukeza na kutilamina ha zincuungu zami, ndi ukawana mpongo wakubula mankenca hinge wakubula mabalamabala hinge ndi mbelele wakubula ku shipa, pe ukalimuka ngayi unengi wa kuyiba.”

³⁴ Niho Lambani ambile ngayi, “Shashiwahe shitendiwe ngonehe unamba.”

³⁵ Ngoboni ha mutena uyo Lambani, wafumishile bikungwe bya bampongo na bankaziwa ba mankenca na ba mabalamabala na nimwendi wekalile na lya kutuba, kami wafumishile bambelele nimwabo ba kushipa. Wabiyakile mu maboko a bana bendi.

³⁶ Niho afumine kuli Yakobo na litanga elye, wayile mukala wa matena ahatu. Yakobo walamine matanga ashalileho a Lambani.

³⁷ Niho Yakobo ashimbile myahi ya kubombola ya mipulanga na mitondo yamina ya kuyo, pe wayubwileho makombombo ngayi myahi yikale na minkululu ya kutuba.

³⁸ Wayakile myahi eye kumbili ya mankuluba a mema oku anwininenga matanga. Wa wayakileko, ndaba bimuna balikandaminenga oho bezilenga mu kunwa mema.

³⁹ Oho bampongo balikandaminenga kumbili ya myahi bafumbatilenga na kuhema bana ba minkululu naba mankenca na ba kubalanga.

⁴⁰ Yakobo watapulwile bambelele ku bampongo, pe wabapenzeshele ku ba minkululu naku bimuna ba kushipa ku matanga a Lambani. Mu nzila eye walitendelele litanga lyendi na kubula kubayaka hamo na litanga lya Lambani.

⁴¹ Oho bimuna ba kushuwa balikandaminenga, Yakobo wayakile myahi kumbili yabo ku mankuluba akunwina, ngayi mwanga batweshe kufumbatila mukati ka myahi.

⁴² Ngoboni kaliha wayakilenga kumbili ya bimuna ba kupopa. Nohobene ba kupopa bengile ba Lambani na bangovu bengile ba Yakobo.

⁴³ Mu nzila eye Yakobo wengile wa kuheta shikuma. Wekalile na matanga amengi na bandungo na makamela na bambongolo.