Shitatiko 3 - Libuka Lya Kuyela

Kubipisha kwa Muntu

¹ Hakati ka bibumbwabumbwa biya alengele Nyambi ya Ngula, liyoka wengile wa kushoshoka shikuma. Liyoka wepwile mukazi ngayi, “Kati mu kupwisha Nyambi unamikanishi kulya ku mikabo ya ku mitondo nimwayo yili muno mu mfuba ndi?”

² Mukazi wakumbwile liyoka ngayi, Tukutwesha kulya mikabo yaku mitondo nimwayo ya mu mfuba,

³ ngoboni Nyambi ya Ngula wambile ngayi, “Hinga mukalya ku mukabo wa mutondo uli mukati ka mfuba, hinge kukwatako.” Ndi tukutenda noho pe tukafwa.

⁴ Ngoboni liyoka wakumbwile uya mukazi ngayi, “Eshe kaliha sha kupwisha, kukafwa mufwako.

⁵ Ndaba walimukile ngayi mutena mwakalyako, meho wenu akatona, pe mukafweka nehe Nyambi mukalimuka byabiwahe na byabibi.”

⁶ Oho mukazi amonene ngayi uya mutondo wengile wawuwahe kami na mikabo yawo ku lyayo yiku fwanina kwinga yayiwahe, wabalikile kwikala na nyumwa ya ku lyako, ngayi ekale wangana. Niho abuyile mikabo yawo pe walile. Niho apanineko mikabo yimo mukokwendi pe naye kami walile.

⁷ Oho balile tuhu, bekalile na ngana kami balimukile ngayi bekalile muhelengwa. Nohobene batungile mabizi a mutondo wa mukuyu na kuwanikawo hamo pe niho bavwalile.

⁸ Ku mazolo mulume na mukazendi bayuvwile Nyambi ya Ngula henda mu mfuba, pe nibo baholamine mukati ka mitondo kutina abamona.

⁹ Ngoboni Nyambi ya Ngula wehanine uya mulume ngayi, “Kati ulikuti?”

¹⁰ Mulume wakumbwile ngayi, “Nakuyuvwu mu mfuba, niho natini na kuholama ndaba nili muhelengwa.”

¹¹ Nyambi ya Ngula wamuyipwile ngayi, “Yani nakutongweze ngayi uli muhelengwa? Kati unali ku mukabo uya nakutongwezele ngayi hinga ulyako ndi?”

¹² Mulume wakumbwile ngayi, “Mbuyama ou wampanine ngayi ekale hamo na nami wampanika mukabo wa mutondo, pe nalya.”

¹³ Niho Nyambi ya Ngula epwile mukazi ngayi, “Shumangani unatendele eshe?” Pe mukazi wakumbwile ngayi, “Liyoka wanyongeza niho nalya.”

Nyambi ukwamba bya ku shushula

¹⁴ Niho Nyambi ya Ngula ambile ku liyoka ngayi, “Ndaba unatende eshe haya ukashushuliwilasho, haya tuyamana nimwato obe ninkayobe unatambulu shikuto eshe. Ku balika hano kwenda kwobe ukalikokanga na livumo, kami ukalyanga limvu mu matena akuyoya kwobe nimwako.

¹⁵ Nikayaka nzimbo mukatikobe na mukazi, pe mbuto yendi na mbuto yobe bakalizimba, mbuto yendi yika cancola mutwe wobe, na nobe ukamuhumina ku ncinzino yendi.”

¹⁶ Niho Nyambi ya Ngula ambile kuli mukazi ngayi, “Nikavulisha makando wobe ha kwimita, kami ukayuvwanga kukola ha kubeleka. Mu wukalu ou nimwawo ukashinga mukokwobe, kami niye ukekala na ngovu hahobe.”

¹⁷ Niho Nyambi ya Ngula ambile kuli Andama ngayi, “Ndaba unayuvwilili mukazobe, pe unali mukabo ou nakutongwezele ngayi hinga ulya, ndaba ya neshe unatende, limvu likukutiwa, ukatenda milimo ya kukwangisha shikuma, mu kuyoya kwobe nimwako ngayi, mwanga limvu likatutwishe byakulya bya kukulingana.

¹⁸ Likamenesha nyawe na mihongela kami obe ukalyanga mikabo ya mu lishaka.

¹⁹ Mukutenda milimo ya kukwangisha shikuma na kutengela, niho ukalye byakulya, hantu noho wakaboka, ku limvu oku wafumine, watendiwile ku limvu, pe ukaboka ku limvu kami.”

²⁰ Andama watumbile mukazendi ngayi, “Eva,” ndaba ukenga manda bantu nimwabo.

²¹ Niho Nyambi ya Ngula atendelele Andama na mukazendi, bivwalo bya kutenda ha myayi pe wabavwalikile.

Andama na Eva ba kubatanda mu mfuba

²² Niho Nyambi ya Ngula ambile ngayi, “Haya muntu unafutuku kwinga ngonehe etu, ndaba unalimuku byabiwahe na byabibi, ngoboni ku fwanina kwitabilishiwa kulya ku mukabo waku mutondo uya ukupana wumi ngayi ayoyenga mwaya myaka wufwako.”

²³ Niho Nyambi ya Ngula amutandile mu mfuba ya Endeni, kuya mu kulima limvu oku afumine.

²⁴ Niho Nyambi ya Ngula abatandilile ku mushamuko wa mfuba ya Endeni, wayakileko Likelumbi na mpoko ya mukwale ya mulangi wa mundilo eye yekalile na kuzinguluka nimwako mwako, kulama nzila ya ku mutondo wa wumi.