Shitatiko 29 - Libuka Lya Kuyela

Yakobo ukukuma ku munzi wa Lambani

¹ Niho Yakobo anungileko kuya ha mukala wendi ku litunga lya bantu ba ku mushamuko.

² Abazumukile tuhu wakuma ku lishima lya ku mabuyishilo a bambelele na matanga ahatu a bambelele hinga alangana hanci kunkumo yalyo. Matanga anwinenga mu lishima olyo, lyekalile na limanya lyalinene hayilu yalyo.

³ Shikati nimwasho oho matanga nimwawo akungulukilenga balishani ba bambelele bandumwinenga limanya hayilu ya lishima naku nwishawo. Niho babwesheleho limanya mu mwanya walyo kami.

⁴ Yakobo wepwile balishani ngayi, “Enu bawushinda wami mu kufuma kuti?” Bamukumbwile ngayi, “Tukufuma ku Halani.”

⁵ Wabepwile ngayi, “Mukulimuka Lambani muzukulya Nahole wa mulume ndi?” Bamukumbwile ngayi, “Ingoi, twamulimuka.”

⁶ Wepwile ngayi, “Uli shiwahe ndi?” Bamukumbwile ngayi, “Uli shiwahe, mona mwanendi wa mbuyama Lakele uyo unakwiza na litanga lyendi.”

⁷ Yakobo wambile ngayi, “Oho kushili mwaana kami shikati shilolo shikume sha kwingiza matanga, shumangani mu kubula kuzinwisha na kuzibwesha ku mabuyishilo?”

⁸ Bamukumbwile ngayi, “Kutwesha kutenda noho tufwako hantu matanga nimwawo ana kunguluku hamo, kami hantu limanya linandumukuko, nihoboni tunwishe matanga.”

⁹ Oho Yakobo ekalile na kwamba nabo, Lakele wakumine na litanga lya tatiyendi, ndaba niye wa abuyishilenga.

¹⁰ Oho Yakobo amonene Lakele na litanga lya kanyantu kendi Lambani, wayile ku lishima, wandumwineko limanya, pe wanwishile bambelele.

¹¹ Niho Yakobo azupezele Lakele pe watatikile kulila ndaba ya ku wahilila.

¹² Yakobo watongwezele Lakele ngayi, “Ami mwana Lambeka kami nili kawushinda wa batatiyobe.” Niho Lakele etukile mu kutongweza batatiyendi.

¹³ Oho Lambani ayuvwile lushango lwa mwipa wendi Yakobo, wetukile na kumushimbawila. Wamubumbatilile na kumuzupeza, kami wamutwalile mu litala. Yakobo watongwezele Lambani nimwabyo biya byamonekele.

¹⁴ Niho Lambani ambile ngayi, “Mwa shikuma uli wami, waha mutima na mukeza wami.” Yakobo wakekalile kuyo ngonda ya nzimba.

Yakobo ukutendela milimo Lambani ngayi ayeke Lakele na Leya

¹⁵ Lambani wambile kuli Yakobo ngayi, “Kaliha wafwanina kutenda nahiya milimo ndaba ngayi obe unengi kawushinda wami. Ncuungu ngani ukushinga ngayi nikuyumbile?”

¹⁶ Lambani wekalile na bana ba bambuyama babili, wamukulwane watumbiwile Leya, wakanuke Lakele.

¹⁷ Leya wengile wakulenkuka meho, ngoboni Lakele wengile wamuwahe shikuma.

¹⁸ Yakobo washingile Lakele niho ambile ngayi, “Nikakutendela milimo myaka mutanu na yibili ndi ukwitabila ngayi niyeke Lakele.”

¹⁹ Lambani wakumbwile ngayi, “Shikwinga shuma shashiwahe ngayi nimupane kukwobe kupitakana ku muntu washenge, twikale nimwetu hamo.”

²⁰ Yakobo watendele milimo myaka mutanu na yibili ngayi ayeke Lakele, kami shikati shamonekele kukwendi ngo matena amashe tuhu, ndaba niye wamuhakile.

²¹ Niho Yakobo ambile kuli Lambani ngayi, “Shikati shinakumu, mpanike mwanobe ngayi mwanga niyeke.”

²² Nohobene Lambani wapingile shimbo sha shifupawenga na kwihanako bantu nimwabo ba ku mbalila iyo.

²³ Ngoboni wushiku wuyo mumwanya wa Lakele, Lambani wahingishilemo Leya na kumuleta kuli Yakobo, pe balanganine wulili umo.

²⁴ Pe Lambani wapanine Zilipa ndungo wendi wa mbuyama kuli Leya kwinga ndungo wendi.

²⁵ Oho kwashile lumenemene Yakobo wawanine ngayi wengile Leya, wepwile Lambani ngayi, “Shumangani unatende nehe kukwami? Nka na kutendelanga milimo ngayi niyeke Lakele. Shumangani boni unanyongezele?”

²⁶ Lambani wakumbwile ngayi, “Kaliha shenga shiheka kuno sha ku yekiwisha kanuke ku maluwo na ku shiya mukulwane.

²⁷ Tatila hantu shunda ya shimbo sha maluwo yina mana, pe nika kupanika Lakele, ndi ukantendela milimo myaka mutanu na yibili yamina.”

²⁸ Yakobo wetabilile, pe oho shunda ya shimbo sha maluwo yamanine, Lambani wamupanikile mwanendi Lakele kami kwinga mukazendi.

²⁹ Pe Lambani wapanine ndungo yendi wa mbuyama Mbiliha kuli Lakele kwinga ndungo wendi.

³⁰ Nohobene Yakobo walanganine wulili wumo na mukazendi Lakele kami, pe wamuhakile shikuma kupitakana Leya. Pe watendelele milimo Lambani myaka mutanu na yibili yamina.

Bana ba Yakobo

³¹ Nyambi ya Ngula oho amonene ngayi Leya kaliha uli na maluwo, pe wamupanine luhemo shawangu. Ngoboni Lakele wengile mumba.

³² Leya wemitile, pe wabelekele mwana wa mulume. Niho amutumbile ngayi Lubena ndaba wambile ngayi, “Nyambi ya Ngula namono makando wami.” Haya mwa shikuma mukokwami ukahaka.

³³ Pe wemitile kami, wabelekele mwana wamina wa mulume. Niho amutumbile ngayi Shimiyoni ndaba wambile ngayi, “Nyambi ya Ngula unampaniki mwana wa mulume kami, ndaba unayuvwu ngayi kaliha nahakiwi ku maluwo.”

³⁴ Pe wemitile kami, wabelekele mwana wa mulume wamina. Niho amutumbile ngayi Levi ndaba wambile ngayi, “Haya shikati shino nikuwana maluwo kuli mukokwami ndaba namubelekele bana bahatu.”

³⁵ Pe wemitile kami, wabelekele mwana wa mulume wamina. Niho amutumbile ngayi Yunda ndaba wambile ngayi, “Shikati shino nikayemeza Nyambi ya Ngula.” Niho luhemo lwendi lwemanine.