Shitatiko 28 - Libuka Lya Kuyela

¹ Niho Ishaki ehanine Yakobo na kumutandalisha, pe oho amanishile kumushangwisha, wamwambilile ngayi, “Hinga uyeka mbuyama waku bambuyama ba ku Kenaani.

² Katuka, yanga ku Meshopotamiya, ku munzi wankaka yobe Mbetuwele tata mandiyobe. Ukayekeko kankanga umo ku bana ba bambuyama ba kanyantu kobe Lambani.

³ Nyambi Mpandashilanga mwanga atandalishe maluwo wobe na kukupana bana babengi, ngayi mwanga ukenge tata mikoka yayingi.

⁴ Mwanga akutandalishe hamo na bazukulyobe ngonehe atandalishile Abulahama, kami mwanga ukakome litunga lino, elye Nyambi apanikile Abulahama.”

⁵ Ishaki wafunzulwe Yakobo kuya ku Meshopotamiya, kuli Lambani, mwana Mbetuwele wa mulume wa Kaalemiya. Lambani wengile mpanza Lambeka, manda Ishau na Yakobo.

Ishau ukuyeka mbuyama wamina

⁶ Ishau walimukile ngayi Ishaki unatandalishi Yakobo na kumufunzula kuya ku Meshopotamiya mu kuyekelako mbuyama. Walimukile ngayi oho amutandalishile, wamwambilile ngayi hinga akayeka mbuyama waku Kenaani.

⁷ Ishau wamonene ngayi Yakobo unombatala tatiyendi na mandiyendi, kami wayakale ku Meshopotamiya.

⁸ Nohobene Ishau, oho ayuvwile ngayi tatiyendi Ishaki kushinga bambuyama ba Kenaani wufwako,

⁹ niho ayile kuli Ishimaele mwana Abulahama wa mulume, pe wakayekele mwanendi Mahalati, mpanza Nebayoti.

Mulo wa Yakobo ku Mbetele

¹⁰ Yakobo wafumine ku Mbelishemba wayile kulwa Halani.

¹¹ Ha kulela kwa mutena wakumine ku mbalila yimo na kutulilako. Walanganine hanci na kuya mutulo hinga ahamina ha limanya.

¹² Walotelo na ku mona kakandamisho kakufuma hanci na kukuma kuyilu na mangeloyi a Nyambi hi akandama na ku shuluka.

¹³ Nyambi ya Ngula wemanine kunkumo yendi, wambile ngayi, “Ami Nyambi ya Ngula, Nyambi wa Abulahama na Ishaki. Elye litunga aha unalangana nikalipanika kukwobe naku bazukulyobe.

¹⁴ Pe bazukulyobe bakenga ngonehe lihekelela lya hanci. Bakanenehesha litunga lyabo ku zimbalila nimwazo, kami kupitila mumwobe na bazukulyobe mikoka nimwayo ya hano hanci nikayitandalisha.

¹⁵ Nikekala nobe na kukulama nimwako oku ukaya, nika kubwesha kami ku litunga lino. Kukakushiya nifwako hantu noho nikatenda nimwabyo biya naku kulupishile.”

¹⁶ Niho Yakobo apindukile ha tulo, pe wambile ngayi, “Mwa shikuma Nyambi ya Ngula ulikuno, uli ha mwanya unobene, ngoboni ami kaliha nalimukile.”

¹⁷ Watinine shikuma pe wambile ngayi, “Mbalila yino ya kutinisha shikuma. Yiku fwanina kwinga Litala lya Nyambi ya Ngula, yiku fwanina kwinga menginino akuyilu.”

¹⁸ Niho Yakobo apindukile lumenemene. Watolele liyo limanya a haminine na kuliyimika kwinga limanya lya shanukisho. Niho ayitilileho mazi.

¹⁹ Watumbile lizina lya mbalila iyo ngayi Mbetele ngoboni ha kutatika lizina lya munzi wuyo lyatumbiwile ngayi Luzi.

²⁰ Niho Yakobo alibezele kuli Nyambi ya Ngula ngayi, “Ndi ukekala na nami na kundama ha mukala nikuya na kumpana byakulya na bivwalo,

²¹ kami ndi ni kuboka shiwahe ku munzi wa batate, obe ukenga Nyambi yami.

²² Limanya elye ninemiki kwinga limanya lya shanukisho likenga litala lyobe, pe nika kupanika sha wu likumi ku nimwabyo biya ukampana.”