Shitatiko 27 - Libuka Lya Kuyela

Ishaki ukutandalisha Yakobo

¹ Ishaki wakulumpalile na kwinga kashishitwa. Wehanine Ishau mwanendi wa mukulwane, wambile kukwendi ngayi, “Mwanami.” Ishau wakumbwile ngayi, “Ami wuno.”

² Ishaki wambile ngayi, “Ami na kulumpala kale, kami wuluno nifwe.

³ Haya shimba shipando shobe sha mukunzi na mivwi, yanga mu lishaka ukanzihilemo kayamana,

⁴ pe wuntelekele byakulya byabitobe biya na haka na kubindetela. Nikabilye, pe nikutandalishe oho shilolo nifwe.”

⁵ Lambeka wayuvwilengako oho Ishaki ambilenga kuli mwanendi Ishau. Oho Ishau ayile mu lishaka na kuyomba kayamana ka tatiyendi,

⁶ Lambeka wambile kuli mwanendi Yakobo ngayi, “Nayuvwunga tatiyobe hamba kuli Ishau ngayi,

⁷ ‘Ndetele kayamana na kuntelekela byakulya byabitobe. Namanisha kulya nyama nikakutandalishe ku meho a Nyambi ya Ngula oho shilolokale nifwe.’

⁸ Haya, mwanami, nyombatale na kutenda ebi nikwamba.

⁹ Yanga ku litanga na kundetela bana ba bampongo babili ba kushuwa ngayi nikutelekele na kutenda byakulya ebye ahaka tatiyobe.

¹⁰ Obe ukabitwala kuli tatiyobe akalye, pe ukakutandalisha oho shilolokale afwe.”

¹¹ Ngoboni Yakobo wambile kuli Lambeka mandiyendi ngayi, “Hiwulimuka ngayi Ishau wekala na wambo, ngoboni ami nenga wakulembuka lutu.

¹² Kampe ndi batate bakampapatila pe bakalimuka ngayi nili na ku bongeza pe nikaliletela shikuto kupitakana bitandalisho.”

¹³ Bamandiyendi bambile ngayi, “Mwanami, ndi ukakukuta pe shikuto shikekale hahami. Tenda tuhu ngonehe eshe namba pe yanga ukandetele bampongo.”

¹⁴ Niho ayile na kumuletela bana ba bampongo, pe watelekele byakulya byabitobe biya ashingile tatiyendi.

¹⁵ Niho Lambeka atolele bivwalo akowezele bya Ishau byabiwahe mu litala na kubivwika Yakobo.

¹⁶ Wayakile kami myayi ya bampongo ha maboko wendi naku ncingo yendi kwakulembuka.

¹⁷ Pe Lambeka wapanikile Yakobo byakulya byabitobe na linkende ayohele.

¹⁸ Niho Yakobo ayile kuli tatiyendi na kwamba ngayi, “Tate.” Tatiyendi wakumbwile ngayi, “Ami wuno mwanami. Kati obe yani?”

¹⁹ Yakobo wambile kuli Tatiyendi ngayi, “Ami Ishau mwanobe wa mweli natende, ngonehe wantongweza. Haya yikalisha, ulye ku nyama eye nakuletele, ngayi mwanga untandalishe.”

²⁰ Ishaki wambile kuli mwanendi ngayi, “Mwanami unengi nahiti unayiwana shawanguwangu?” Yakobo wakumbwile ngayi, “Ndaba Nyambi ya Ngula, Nyambi yobe, unantandalishi ngayi niyiwane.”

²¹ Niho Ishaki ambile kuli Yakobo ngayi, “Henyena kwakwipi ngayi nikutweshe kukupapatila mwanami. Mwa shikuma obe mwanami Ishau hinge ndi byo?”

²² Yakobo wahenyenene kwakwipi na tatiyendi Ishaki, niho amupapatilile, pe wambile ngayi, “Lizu lyobe likuyuvwanika ngo lizu lya Yakobo, ngoboni maboko wobe akuyuvwanika ngo maboko a Ishau.”

²³ Kaliha walimukile ngayi niye Yakobo, ndaba maboko wendi ekalile na wambo ngo maboko a Ishau. Niho amutandalishile,

²⁴ niho amwipwile kami ngayi, “Kati mwa shikuma obe mwanami Ishau ndi?” Yakobo wakumbwile ngayi, “Amibene.”

²⁵ Ishaki wambile ngayi, “Ncimbileho nyama yimo. Namanisha ku lyayo, niho nikutandalishe.” Yakobo wayiletele kukwendi, kami wamuletelele waine, pe wanwine.

²⁶ Niho tatiyendi ambile kukwendi ngayi, “Henyena kuno mwanami, unzupeze.”

²⁷ Oho ezile mu kumuzupeza Ishaki wayuvwile livumba lya bivwalo byendi, pe wamutandalishile na kwamba ngayi, “Eli livumba lyaliwahe lya mwanami, linengi ngo livumba lya mfuba eye anatandalishi Nyambi ya Ngula,

²⁸ Nyambi mwanga akupane mume wakuyilu, na kwingisha mfuba yobe wilo. Mwanga akupane mbuto yayingi na waine.

²⁹ Bantu nimwabo, bakenge bakamilimo bobe, bantu mwanga bakalambe kumbili yobe, obe mwanga ukenge hekulya bawushinda wobe, pe kami bazukulya bamandiyobe, mwanga bakalambe kumbili yobe. Obo bakakukuta mwanga bakakutiwe, pe obo bakakutandalisha nanibo kami bakatandale.”

Ishau ukulomba mfuywezi za Ishaki

³⁰ Ishaki oho amanishile kutandalisha Yakobo, niho Yakobo ayile. Oho ayile tuhu kunyima Ishau wezile kufuma mu kuyomba.

³¹ Naniye kami watelekele byabitobe na kubileta kuli tatiyendi. Pe wambile ngayi, “Tate, yikalisha, ulye nyama eye nakuletele, ngayi mwanga untandalishe.”

³² Ishaki wamwipwile ngayi, “Kati obeyani?” Ishau wakumbwile ngayi, “Nka ami mwanobe wa mweli, Ishau.”

³³ Niho Ishaki atatikile kukanka shikuma pe wepwile ngayi, “Kati yaniboni ou waziha kayamana na kukaleta kukwami? Ninali oho shilolo wize. Namutandalishi mwaka, kami ukenga wakutandalishiwa mwaya myaka.”

³⁴ Oho Ishau ayuvwile mazu awa, pe walilile shikuma na kukangoka ngayi, “Tate nami ntandalishe.”

³⁵ Ishaki wambile ngayi, “Mukonzowobe unezi na kunyongeza, pe nashimbi bitandalisho byobe.”

³⁶ Ishau wambile ngayi, “Eshe shengakale shikati sha wubili sha kunyongeza. Kaliha shikukomokesha oho atumbiwi ngayi Yakobo. Washimbile likona lyami lya wukulwane, haya kami washimbakale bitandalisho byami. Kati shilolo unciyileko bitandalisho bimina ndi?”

³⁷ Ishaki wakumbwile Ishau ngayi, “Mona namwingishakale hekulyobe, kami namupana bawushinda wendi nimwabo kwinga bandungo bendi namupaniki mbuto na waine, kowa shinashalako mwanami, osho nikutwesha kukutendela.”

³⁸ Ishau wazaminine kulambilila kuli tatiyendi na kwamba ngayi, “Tate, kati wekala tuhu na mfuywezi yimo ndi? Nami kami tate ntandalishe.” Pe Ishau walilile shikuma.

³⁹ Niho Ishaki ambile ngayi, “Wufwako kukatambula mema akufuma muyilu, mafuba wobe afwako kukekala na wilo.

⁴⁰ Pe, ukayoya na mukwale wobe, ngoboni ukatendela milimo mukonzo wobe, Ngoboni noho ukamufutulukila, pe ukashoboloka ku ngovu zendi.”

⁴¹ Niho Ishau azimbile Yakobo, ndaba Yakobo washimbile bitandalisho biya byengile bya Ishau. Pe Ishau wahanganikile ngayi, “Shikati sha kulila lufu lwa batate shili hahepi, kunyima yanebye pe nikaziha Yakobo mukonzowami.”

⁴² Ngoboni Lambeka oho ayuvwile bihanganiko bya Ishau, niho ehanine Yakobo na kumutongweza ngayi, “Yuvwa, yayiyobe Ishau uli na kukufumbila ngayi akuzihe.

⁴³ Haya mwanami, ombatala mazu wami. Yanga hahano kuli mpanzami Lambani ku Halani.

⁴⁴ Ukekaleko kuyo kashikati hantu wukali wa yayiyobe unatulu,

⁴⁵ pe ukavulama ebye unatende kukwendi. Niho nika kutumina muntu kuya mu kukuleta. Shumangani nikayawila nimwenu bana bami mutena umo?”

Ishaki ukufunzula Yakobo kuya kuli Lambani

⁴⁶ Lambeka wambile kuli Ishaki ngayi, “Shili na kunkola kami shinankwangishi ha bakaza ba Ishau ba Bahita. Ndi Yakobo kami ukuyeka umo wa batunkanga ku mushobo owe wa Bahita, shashiwahe shinga ami nifwe tuhu.”