Shitatiko 25 - Libuka Lya Kuyela

Bazukulya Abulahama bamina

¹ Abulahama wayekele mbuyama wamina, lizina lyendi Ketula.

² Wamubelekelele Zimilani na Yokishani na Mendani na Mindiyani na Ishimbaki na Shuwa.

³ Yokishani wengile tata Shemba na Ndendani, pe bana ba Ndendani bengile ba Ashulimi naba Letushimi naba Leumime.

⁴ Bana ba Mindiyani bengile Efwa na Efwila na Hanoki na Ambinda na Elinda. Aba nimwabo bengile bazukulya Ketula.

⁵ Abulahama washiyililile Ishaki nimwabyo biya ahetele,

⁶ ngoboni oho shilolokale afwe wapanine bishemo kuli bana bendi babalume baya bamubelekelele bakazendi bakwinginina. Pe wabatandile kuya mu kuzika ku litunga lya ku mushamuko kwakutali na mwanendi Ishaki.

Lufu na Kufundiwa kwa Abulahama

⁷ Abulahama wekalile na myaka 175,

⁸ pe wafwile oho hinga enga kakulukazi shikuma.

⁹ Bana bendi ba Ishaki na Ishimaele bamufundile mu linzolongoma lya Makapela, mu mfuba iya yengilenga ya Efweloni mwana Zohali wa mulume wa Kahita, ku mushamuko wa Mamele.

¹⁰ Yengile mfuba iya Abulahama alandile ku Bahita, wubili wabo Abulahama na mukazendi Shala bafundiwile kuyo.

¹¹ Oho Abulahama wafwakale Nyambi watandalishile mwanendi Ishaki ou wekalile kwakwipi na “Lishima lya Wakuyoya ou Wamonanga.”

Bazukulya Ishimaele

¹² Aba nibo bazukulu ba Ishimaele, mwana Abulahama, ou amubelekelele Hangali wa Kaengepita ndungo ya Shala.

¹³ Awa niwo mazina a bana ba Ishimaele babalume omu balikonkelele. Mweli wa Ishimaele wengile Nebayoti, niho Kenda na Andimbelu na Mimbushama,

¹⁴ na Mishima na Nduma na Masha,

¹⁵ na Handandi na Tema, Yetula na Nafwishi na Kendema.

¹⁶ Awa niwo mazina a bana ba Ishimaele babalume na minzi yabo na zimbalila za minkungwa yabo. Nibo bengile bamyene balikumi na babili.

¹⁷ Ishimaele wekalile na myaka 137 oho afwile.

¹⁸ Bazukulya Ishimaele bazikile mukati ka litunga lya Habila na Shula ku mushamuko wa Engepita na nzila ya kuya ku Ashiliya, kwakutali na bazukulya Abulahama bamina.

Kuhemuwa kwa Ishau na Yakobo

¹⁹ Ou niwo mukoka wa Ishaki mwana Abulahama. Abulahama wabelekele Ishaki,

²⁰ Ishaki wekalile na myaka makumi anaa oho ayekele mukazendi Lambeka, mwana Mbetuwele wa Kaalemiya waku Meshopotamiya na mpanzendi Lambani.

²¹ Ishaki walombelele kuli Nyambi ya Ngula mukazendi Lambeka, ndaba Lambeka wengile mumba. Pe Nyambi ya Ngula wakumbwile malombelo wendi niho Lambeka,

²² wemitile bambuyu. Pe oho shilolokale bahemuwe balinyakwelenga umo na wamina mu livumo lyendi. Lambeka wambile ngayi, “Kati shumangani eshe sha kufweka nehi shikuholoka kukwami?” Niho akepwile kuli Nyambi ya Ngula amutongweze mwa kutendela.

²³ Nyambi ya Ngula wambile kukwendi ngayi, “Mu livumo lyobe muli matunga abili, ukabeleka bantu babili bakalwila likona. Umo ukenga wakushuma kupitakana wamina, pe wamukulwane ukatendela milimo wa kanuke.”

²⁴ Shikati shendi sha kubeleka oho sha kumine, pe wabelekele bambuyu.

²⁵ Wakutatika kuhemuwa wengile wakufubila, pe lutu lwendi nimwalwo lwengile ngo shikobelo sha wushako nohobene niye watumbiwile ngayi Ishau.

²⁶ Oho mukonzo wendi ahemuwilenga, liboko lyendi lyakwatile shikuma ku ncinzino ya Ishau, nisho shuma amutumbilile lizina Yakobo. Ishaki wekalile na myaka 60 oho bahemuwile.

Ishau Ukulandisha Likona lya wukulwane

²⁷ Batwanuke oho ba kulilenga, Ishau wengile shibinda wawunongi, muntu wa mashaka, ngoboni Yakobo niye wengile muntu waku mwena ou wekalilenga ha munzi.

²⁸ Ishaki wahakile shikuma Ishau, ndaba walilenga nyama ya tuyamana otu Ishau abuyilenga, ngoboni Lambeka wahakileko Yakobo.

²⁹ Mutena umo oho Yakobo atelekelenga likampu lya manyanta a kufubila, Ishau wezile kufuma mu kuyomba mu lishaka.

³⁰ Pe wekalile na nzala shikuma. Niho ambile kuli Yakobo ngayi, “Ami nili na nzala shikuma, mpeko bimo ku nobyo bya kufubila” (Eli lizina lya Ishau linalifweke na lizina lya mu Shihebelu likutumbiwa ngayi Endoma.)

³¹ Ngoboni Yakobo wambile ngayi, “Umpanike taha likona lyobe lya wukulwane, niho nikakupanike ebye.”

³² Ishau wambile ngayi, “Shashiwahe, ami nili hahepi na kufwa. Likona lyami likantendela wuwahe ngani?”

³³ Yakobo wambile ngayi, “Ha kutatika libeze taha ngayi ukampanika likona lyobe.” Pe Ishau walibezele na kulandisha likona lya wukulwane wendi kuli Yakobo.

³⁴ Niho Yakobo apanine Ishau mankende na likampu lya manyanta. Walile na kunwa, niho akatukile na kuya. Nisho Ishau akendele likona lya wukulwane wendi.