Shitatiko 24 - Libuka Lya Kuyela

Bakuhuhwila mukazi Ishaki

¹ Haya Abulahama wengile kakulukazi shikuma, pe Nyambi ya Ngula wamutandalishilenga mu byuma nimwabyo.

² Niho Abulahama ambile ku mukamulimo wendi wamukulwane, ou wengile mukulwane ku byuma nimwabyo ekalile nabyo ngayi, “Yaka liboko lyobe mukati ka bilama byami pe ulibeze.

³ Nikushinga unkulupishe na mbeza kuli Nyambi ya Ngula, Nyambi wa muyilu na hanci, ngayi ukabule kuyekela mwanami mbuyama wa litunga lino lya Kenaani.

⁴ Uku fwanina kuboka ku litunga lyami, mukati ka bawushinda wami na kuyekelako mwanami Ishaki mbuyama.”

⁵ Ngoboni mukamulimo wepwile ngayi, “Nahiti ndi mbuyama kwitabila wufwako kwiza nendi ku litunga lino? Kati nikabweshe mwanobe ku litunga oku wafumine ndi?”

⁶ Abulahama wambile ngayi, “Byo, hinga ukabwesha mwanami kuyo.

⁷ Nyambi ya Ngula, Nyambi wa muyilu, ou wamfumishile ku munkanda wa batate na kumfumisha ku litunga lya bawushinda wami, kami wankulupishile ngayi ukapanika litunga lino bazukulyami. Niye ukatuma lingeloyi lyendi kumbili yobe, pe obe ukayekelako mwanami mbuyama.

⁸ Ngoboni ndi mbuyama kaliha uketabila kwiza nendi, obe ukashoboloke ku kulupisha okwe. Ngoboni hinge byuma bikaluhe nahiti, obe kaliha uku fwanina ku bweshelako mwanami.”

⁹ Nohobene mukamulimo wayakile liboko lyendi mu bilama bya hekulyendi Abulahama, pe walibezele kutenda ngonehe niye amunyepele.

¹⁰ Niho mukamulimo ashimbile makamela likumi a hekulyendi na minyemvu yayingi ya ndando. Pe wakatukile na kuya ku munzi wa Nahole ku Meshopotamiya.

¹¹ Oho akumine wamfunkamishile makamela hanci ku lishima ha munkanda wa munzi. Shengile shikati sha mazolo oho bambuyama batutikanga ha munkanda na kutekula mema.

¹² Niho alombelele ngayi, “Obe Nyambi ya Ngula, Nyambi ya hekulyami Abulahama, nikukunyepa ngayi ntandalishe lelo na ku monesha nceshe zobe za mwaya myaka kuli hekulyami ha kulama shikulupisho shobe kukwendi.

¹³ Mona, ami nili kuno ku lishima oku bali na kwiza batunkanga bamu munzi mu kutekula mema.

¹⁴ Nikamba kuli umo wabo ngayi, ‘Tula taha ntesho yobe hanci, umpeko mema ninwe.’ Ndi ukwamba ngayi, ‘Nwamo, pe nikanwisha makamela wenu kami,’ ou mwanga enge niye unahatili ndungo yobe Ishaki. Ndi eshe shiku moneka nikalimuka ngayi unamoneshe nceshe zobe kuli hekulyami.”

¹⁵ Oho shilolokale amanishe kulombela, Lambeka wakumine na ntesho yendi ya mema ha shifuzi. Wengile mwana Mbetuwele wa mbuyama. Ou wengile mwana Milika, mukaza Nahole mukonzo wa Abulahama.

¹⁶ Wengile kankanga wamuwahe shikuma wabula kulimuka mulume, wakunkulukile ku lishima, wenzalishile ntesho yendi na mema, pe wafumine ku lishima.

¹⁷ Niho mukamulimo amwitukilile na kumuhangana pe wambile ngayi, “Mpindileko taha mema mu ntesho yobe, ninwe.”

¹⁸ Wambile ngayi, “Nwamo hekulyami.” Pe wanguwangu wafumishile ntesho yendi ha mafuzi, pe wayikwatile mu liboko oho anwinenga.

¹⁹ Oho uya mukamulimo amanishile kunwa, Lambeka wambile ngayi, “Nikutekwila kami makamela wobe mema, hantu anamanishi kunwa.”

²⁰ Wanyankupile kupingwila ntesho yendi mu linkuluba lyanwinanga bimuna, pe wetukilile kami ku lishima na kutekula mema amengi hantu noho anwishile makamela wendi nimwawo.

²¹ Mulume wamupenzelenga umwe, ngayi amone ndi Nyambi ya Ngula wamutandalishakale.

²² Oho Lambeka amanishile kunwisha makamela, uya mukamulimo watolele kambalamunwe ka ngolinde ka ndando yayinene pe wakayakile ku muzulu wendi na makaya abili ku maboko wendi.

²³ Pe wambile ngayi, “Ntongweze taha kati tatiyobe yani? Kuwuli mwanya ku litala lya tatiyobe ngayi ami na bantu bami tulanganeko uno wushiku ndi?”

²⁴ Lambeka wambile kukwendi ngayi, “Ami tate Mbetuwele, mwana Milika na Nahole.

²⁵ Kuwuli mwila wawingi na byakulya ku litala lyetu, kami kuwuli mwanya wakutulila.”

²⁶ Niho mukamulimo wa Abulahama ashinkamine na kulemesha Nyambi ya Ngula,

²⁷ pe wambile ngayi, “Yemezenu Nyambi ya Ngula, Nyambi wa hekulyami Abulahama, ou unalama shishemo shendi sha mwaya myaka na kwoloka kuli hekulyami. Nyambi ya Ngula unantwaminini shiwahe wahe ku litala lya hekulyami.”

²⁸ Niho kankanga etukilile ku litala lya mandiyendi na ku shimika lushango nimwalwo.

²⁹ Lambeka wekalile na mpanzendi lizina lyendi Lambani, pe wetukilile ha munkanda na kuya ku lishima kuya kwekalile mukamulimo wa Abulahama.

³⁰ Oho Lambani amonene kambalamunwe kakumuzulu na makaya ku maboko a mpanzendi, kami wayuvwile Lambeka hamba ebye amutongwezele mukamulimo wa Abulahama, wayile ku lishima na kumushimbawila, pe wakamuwanine hinga emana ku kamela yendi.

³¹ Lambani wambile kukwendi ngayi, “Tuyenga ku munzi, obe muntu wakutandalishiwa kuli Nyambi ya Ngula. Kaliha wafwanina kwimana ha munkanda? Ami nakuwahishilakale mwanya mu litala lyami, kami kuwuli mwanya wa makamela obe.”

³² Pe mukamulimo wa Abulahama wenginine mu litala, Lambani washobwele makamela na ku wapana ntende na mwila wakubalisha. Niho aletele mema ku mukamulimo wa Abulahama na bantu bendi akuyowela ku mawulu wabo.

³³ Oho baletele byakulya mukamulimo wa Abulahama wambile ngayi, “Kulya nifwako hantu nashimikili lushango lwami.” Lambani wambile ngayi, “Haya, amba tuyuvwe.”

³⁴ Niho atatikile kwamba ngayi, “Ami nili mukamulimo wa Abulahama.”

³⁵ Nyambi ya Ngula unatandalishi hekulyami shikuma na kumwingisha wakuheta. Unamupana matanga a bambelele na bampongo na nawa a zingombe na shiliva naya ngolinde, hamo na bandungo babalume na naba babambuyama na makamela na bambongolo.

³⁶ Shala, mukaza hekulyami, wamubelekelele mwana wamulume oho niye wakulumpalakale. Hekulyami unamupaniki byuma nimwabyo ebye aheta.

³⁷ Hekulyami wanyambilile ngayi nilibeze na lubeza lwa kwombatala ndayano zendi wambile ngayi, “Hinga ukayekela mwanami mbuyama waku litunga lya Kenaani. Omu nili na kwikala.

³⁸ Ngoboni yanga ku bakatate na bawushinda wami, ukamuhatileko mbuyama.”

³⁹ Pe ami nambile kuli hekulyami ngayi, “Haya shikekala nahiti uya mbuyama ndi wufwako kwitabila kwiza nendi.

⁴⁰ Ngoboni niye wambile kukwami ngayi, ‘Nyambi ya Ngula ou nikwombatala shikati nimwasho ukatuma lingeloyi lyendi hamo na nobe na ku kutweshesha. Pe ukayekela mwanami mbuyama waku bawushinda wami na waku ba lupashi lwa batate.

⁴¹ Ukenga wakushoboloka kulubeza lwobe ndi ukaya ku bawushinda wami, baka kana pe ukashoboloka ku lubeza lwobe.’”

⁴² Oho nezi ku lishima lelo nanyepe ngayi, “Obe Nyambi ya Ngula, Nyambi wa hekulyami Abulahama, haya ntandalishe kunebye nikutenda.

⁴³ Nili kuno ku lishima, oho akwiza kankanga nikamulomba mema akunwa mu ntesho yendi.

⁴⁴ Ndi ukwitabila na kupana kami mema ku makamela wami, mwanga enge mbuyama ou unahata kwinga mukaza mwana hekulyami.”

⁴⁵ Oho shilolokale nimanishe kulombela kwa wumwee, Lambeka wezile na ntesho yendi ha shifuzi, pe wakunkulukila ku lishima mu kutekula mema. Niho nambile kukwendi ngayi, “Mpeko taha mema ninwe.

⁴⁶ Wanguwangu wafumisha ntesho ha shifuzi shendi pe wamba ngayi, ‘Nwamo, pe nikanwisha makamela wobe kami.’ Niho nanwa nanwisha na makamela.

⁴⁷ Niho namwipwile ngayi, ‘Tatiyobe kati yani?’ Pe wankumbulwe ngayi, ‘Nili mwana Mbetuwele, mwana Nahole na Milika.’ Niho nayaka kambalamunwe ku muzulu wendi na makaya ku maboko wendi.”

⁴⁸ Niho nashungumana na kulemesha Nyambi ya Ngula, pe na yemeza Nyambi ya Ngula, Nyambi wa hekulyami Abulahama, ou unantwaminini shiwahe na kundeta kuli kawushinda wa hekulyami, okwe nawana mwanendi wa mbuyama ngayi enge mukaza mwana hekulyami.

⁴⁹ Ndi ukwitabila ku monesha nceshe hekulyami, osho shili kukwobe, haya ntongweze kupwisha. Ndi unakana, amba noho ngayi mwanga nihanganike mwa kutendela.

⁵⁰ Niho Lambani na Mbetuwele bakumbwile ngayi, “Ndaba eshe shambo shinafumu kuli Nyambi ya Ngula, etu, kutwesha ku shiketula tufwako.

⁵¹ Mona, Lambeka uno, mushimbe muyenga. Shashiwahe enge mukaza mwana hekulyobe, ngonehe anamba Nyambi ya Ngula.”

⁵² Oho mukamulimo wa Abulahama ayuvwile mazu wabo, wafunkamine hanci na kulemesha Nyambi ya Ngula.

⁵³ Niho atutwishile ndando ya shiliva na ngolinde na bya kuliyenga bya bivwalo bya kupana Lambeka. Kami wapanine ntutu ya shishemo ya ndando yayinene kuli yayiyendi na kuli bamandiyendi.

⁵⁴ Niho mukamulimo wa Abulahama na bantu bendi balile na kunwa na kwonzelako wushiku. Oho bapindukile ku lumenemene wambile ngayi, “Nyintabilishenu niboke kuli hekulyami.”

⁵⁵ Ngoboni bamandiyendi na mpanzendi bambile ngayi, “Shashiwahe Lambeka ashale kuno nanetu matena akulingana hinge matena likumi, niho akaye.”

⁵⁶ Ngoboni mukamulimo wa Abulahama wambile kukwabo ngayi, “Hinga munyihalisha ndaba Nyambi ya Ngula unatandalishi nzila yami. Ndehenu niye kuli hekulyami.”

⁵⁷ Niho bakumbwile ngayi, “Lehenu taha twihane kankanga, tuyuvwe eshe akwamba.”

⁵⁸ Niho behanine Lambeka bambile kukwendi ngayi, “Ukushinga kuya na nowu mulume ndi?” Pe wakumbwile ngayi, “Ingoi, nikuya.”

⁵⁹ Nohobene bafunzwile Lambeka na shibeleki shendi ngayi bayenga na mukamulimo wa Abulahama na bantu bendi.

⁶⁰ Pe batandalishile Lambeka na mazu awa ngayi, “Obe mpanzetu, mwanga winge manda makulukazi a makulukazi. Bazukulyobe mwanga batambule zinkena za bamalamo babo.”

⁶¹ Niho Lambeka naba tunkanga bendi baliwahishile kukandama ha makamela na kuya na mukamulimo wa Abulahama.

⁶² Ishaki oho wafumakale ku “Lishima lya Wakuyoya, ou wamonanga” lyamu libelelengwa, wazikilenga ku mwanya waku Nengembu mu litunga lya Kenaani.

⁶³ Ishaki wakatukile shikati sha mazolo kuya ku mfuba na kwenda, pe wamonene makamela hieza.

⁶⁴ Oho Lambeka amonene Ishaki, wahulukile ha kamela yendi,

⁶⁵ niho epwile mukamulimo wa Abulahama ngayi, “Uya mulume yani uli mu mfuba uli na kutushimbawila?” Wakumbwile ngayi, “Niye hekulyami.” Pe Lambeka washimbile likwiza, walifwikile ku lupala lwendi.

⁶⁶ Mukamulimo wa Abulahama watongwezele Ishaki nimwabyo biya atendele.

⁶⁷ Niho Ishaki wengizile Lambeka mu ntanda muya ekalilenga Shala mandiyendi kwinga mukazendi. Wahakile lambeka, nohobene wabengezekiwile ha kufwa kwa mandiyendi.