Shitatiko 23 - Libuka Lya Kuyela

Shala ukufwa pe Abulahama ukulanda shinzimbi

¹ Shala wekalile na myaka 127.

² Niho afwilile mu Hembuloni mu litunga lya Kenaani, Pe Abulahama wamulilile shikuma ha lufu lwendi.

³ Niho Abulahama ashiyile mwanya na mutuntu wa mukazendi, pe wayile ku Bahita. Wambile kukwabo ngayi,

⁴ “Ami nili lipukwenda kuno nazika mukati kenu. Ndandishenuko limvu kwa kufunda, ngayi nitweshe ku fundako mukazami.”

⁵ Bahita bakumbwile Abulahama ngayi,

⁶ “Yuvwa taha obe hekulu, etu tukukupenza ngo mukakututwaminina wa ngovu, funda mukazobe ku shinzimbi sha kupitakana wuwahe tuli nasho. Nimwetu tuku wahilila kukupana shinzimbi ngayi utweshe kumufundamo, kowa wakukukanisha.”

⁷ Niho Abulahama akatukile kuya mu ku shintama kumbili ya Bahita,

⁸ pe wambile kukwabo ngayi, “Ndi munetabili ngayi nifunde mukazami kuno hekulu nyepelenu kuli Efweloni mwana Zohali wa mulume,

⁹ ngayi andandisheko Linzolongoma lya Makapela, elye lili kunkumo ya mfuba yendi. Mu nyepenu alindandishe na ndando ya nzimba kuno ku meho wenu, nohobene nitweshe kuheta limvu lya kufundanga.”

¹⁰ Efweloni wekalile mukati ka Bahita, niho akumbwile Abulahama oho bahita nimwabo bayuvwako, ku mbalila ya shikungulukilo ku lipangati lya lukena ngayi,

¹¹ “Yuvwilila hekulyami, nika kupana mfuba na linzolongoma liya lilimo. Nikukupanalyo ku meho a bawushinda wami, ngayi utweshe kufundamo mukazobe.”

¹² Niho Abulahama ashintaminine hambili ya Bahita,

¹³ na kwamba kuli Efweloni, bantu nimwabo hibayuvwako, ngayi, “Nikushinga ngayi uyuvwilile shiwahe, ami nikulanda mfuba nimwayo. Tambula ndando yami, pe nikafundamo mukazami.”

¹⁴ Efweloni wakumbwile Abulahama ngayi,

¹⁵ “Hekulyami, nyuvwilile mfuba yina fwanini mu ndando ya 400 ya muwayawaya wa shiliva. Ngoboni eshe shumangani mukatiketu ami na nobe? Fundamo mukazobe.”

¹⁶ Abulahama wetabilile, pe wapanikile ndando eye ashingile Efweloni, bantu nimwabo hibayuvwako, 400 ya muwayawaya wa shiliva, kufwanikiza na shipimisho batendelenga bakakulandisha.

¹⁷ Eye niyo nzila ya wuheti ou wengile wa Efweloni ku Makapela, ku mushamuko wa Mamele wafutukile kwinga wa Abulahama na kufungilako mfuba na linzolongoma elye lyekalilemo na mitondo nimwayo yamu mfuba noku kwakumina zinginza zayo.

¹⁸ Bahita nimwabo aba bekalile kuyo ku shikungulukilo balimukile ngayi wuheti wa Abulahama.

¹⁹ Niho Abulahama afundile mukazendi Shala mu linzolongoma lya mu mfuba ya Makapela ku mushamuko wa Hembuloni mu litunga lya Kenaani.

²⁰ Nohobene mfuba na linzolongoma lyekalilemo, obyo byengilenga bya Bahita, byafutukile kwinga wuheti wa Abulahama na limvu lya kufundangamo.