Shitatiko 21 - Libuka Lya Kuyela

Kuhemuwa kwa Ishaki

¹ Nyambi ya Ngula watandalishile Shala ngonehe amukulupishile.

² Shala wemitile na kubelekela Abulahama mwana wa mulume oho wakulumpalakale. Kanuke wahemuwile hashikati shiyo Nyambi atoyele ngayi nisho akahemuwa.

³ Abulahama wamutumbile lizina ngayi Ishaki.

⁴ Niho Abulahama atwalile mwanendi Ishaki ku mukanda oho ekalile na matena mutanu na ahatu. Ngonehe Nyambi amutongwezele.

⁵ Abulahama wekalile na myaka 100 oho mwanendi Ishaki ahemuwile.

⁶ Shala wambile ngayi, “Nyambi unandetele ku wahilila na mahepo. Nimwendi ou ukayuvwako ukahepeshako.”

⁷ Niho atwalilileho kwamba ngayi, “Yani watweshele kwamba kuli Abulahama ngayi Shala ukayamwisha? Ngoboni namubelekele mwana wa mulume oho wakulumpalakale.”

⁸ Kanuke Ishaki wakulile, pe ha mutena uya ahumukile, Abulahama wapingile shimbo shashinene.

Hangali na Ishimaele ba kutandiwa

⁹ Mutena umo Ishimaele ou abelekele Hangali wa Kaengepita kuli Abulahama walihengamininenga na Ishaki mwana Shala.

¹⁰ Shala wabamonene niho ambile kuli Abulahama ngayi, “Tanda ou mbuyama wa ndungo na mwanendi, ndaba ou mwana mbuyama wa ndungo ku fwanina kukona shitapilo sha wuheti wobe wufwako, ou akakona mwanami Ishaki.”

¹¹ Eshe shayandishile shikuma Abulahama ku mutima ndaba na Ishimaele wengile mwanendi.

¹² Ngoboni Nyambi wambile kuli Abulahama ngayi, “Hinga ulikekula ndaba ya ndumbana wobe na hali ndungo wa mbuyama wobe. Tenda eshe nimwasho akukutongweza mukazobe Shala ndaba muli Ishaki nimo ukawana bazukulu na ku kulupishile.

¹³ Nikapana bana babengi kami kuli mbuyama wa ndungo, ngayi mwanga benge litunga, kami na niye unengi mwanobe.”

¹⁴ Oho kwashile lumenemene Abulahama wapanikile byakulya kuli Hangali na mpamba ya kwinzala ya mema. Wamutwikileyo ha shifuzi shendi, wamupanikile na mwana naku mu mfunzula. Hangali wayile na kuyambangila mu libelelengwa lya Mbelishemba.

¹⁵ Oho mema nimwawo amumaninine, washiyile kanuke mu nceto ya lipukumuna.

¹⁶ Niho Hangali akekalilile ha kantabule ha kushinga kulingana mamita 100 nanaha hekalile kanuke, ndaba walyambashanine ngayi, “Kushinga ku mona eshe akufwa mwanami nifwako.” Oho ushili kwikala kuyo Hangali watatikile kulila.

¹⁷ Nyambi wayuvwile kulila kwa kanuke, pe lingeloyi lya Nyambi kuyilu lyambile ngayi, “Obe Hangali, kati bishini shikukuyandisha? Hinga ulikekula. Nyambi unayuvwu kulila kwa kanuke.

¹⁸ Katuka, umupindule na kumumwenesha. Nikatenda mushobo wawunene ha bazukulyendi.”

¹⁹ Niho Nyambi atoneshele meho a Hangali pe wamonene lishima lya mema. Wayile na kwinzalisha mpamba na mema pe wanwishilemo kanuke.

²⁰ Nyambi wekalile na kanuke oho akulilenga, pe wazikile mu libelelengwa lya Palani na kwinga shibinda wawunongi.

²¹ Mandiyendi wamuyekelele mbuyama waku Engepita.

Kuliyuvwashana mukati ka Abulahama na Ambimeleki

²² Ha shikati shiyo Ambimeleki na Fwikole mukulwane wa bakanzita bendi bayile kuli Abulahama, bambile kukwendi ngayi, “Nyambi uli hamo na nobe mu byuma nimwabyo ukutenda.

²³ Haya libeze kukwami mu lizina lya Nyambi ngayi wufwako kunyongeza na bana bami hinge bazukulyami, nengi wakulunga kukwobe nohobene nkulupishe ngayi ukenga wakulunga kukwami na litunga lino unaziki.”

²⁴ Abulahama wambile ngayi, “Nikukulupisha kutenda noho.”

²⁵ Ngoboni Abulahama walinyengele kuli Ambimeleki bya lishima elye ba muyangwile bakamilimo ba Ambimeleki.

²⁶ Ambimeleki wambile ngayi, “Kulimuka ou watendele eshe nifwako, kaliha wantongwezele haneshe, pe kami eshe nisho shikati sha kutatika kushiyuvwa.”

²⁷ Niho Abulahama ashimbile bamo bambelele na zingombe na kupanika Ambimeleki, kami wubili wabo baliyuvwashanine.

²⁸ Abulahama watapulwile bana babambelele mutanu na babili kufuma mu litanga lyendi.

²⁹ Ambimeleki wepwile Abulahama ngayi, “Kati eshe shuma shikutontolola bishini, hanaba bana babambelele unatapululu?”

³⁰ Abulahama wakumbwile ngayi, “Eshe shikutontolola ngayi hanaba bana babambelele mutanu na babili ukushimba kukwami, kwinga wupaki ngayi ami nakabile elye lishima.”

³¹ Nohobene mbalila iyo yatumbiwile ngayi Mbeleshemba.

³² Aha bamanishile kuliyuvwashana ku Mbelishemba, Ambimeleki na Fwikole mukulwane wa bakanzita bendi babokele ku litunga lya Fwilishitina.

³³ Niho Abulahama atampikile mutondo wa Tamalishika mu Mbelishemba na kulemesha Nyambi ya Ngula, Nyambi wa mwaya myaka.

³⁴ Abulahama wazikile shikati shashitali mu litunga lya Fwilishitina.