Shitatiko 20 - Libuka Lya Kuyela

Abulahama na Ambimeleki

¹ Abulahama watuntukile wafumine ku Mamele, wayile ku litunga lya Nengembu pe wazikile mukati ka Kandeshi na Shula, niho kami atuntukile ku Ngela,

² kuyo akatongwezele bantu ngayi Shala nengi mpanzami. Ambimeleki mwene wa Ngela wayile mu kushimba Shala.

³ Nyambi waliholwele kuli Ambimeleki mu mulo wushiku uyo, pe wambile ngayi, “Ukushinga kufwa, ndaba Shala nengi mukaza muntu.”

⁴ Ngoboni Ambimeleki kaliha walanganine nendi, pe wambile ngayi, “Obe, Hekulu, ami mulandu nifwawo. Kati ukalobesha bantu bakulunga ndi?

⁵ Kati kaliha Abulahama wambile ngayi, ‘Nengi mpanzami’? Na Shala kami shuma shimo ndi? Pe natende shuma eshe na shikeketima shashiwahe kami nabulu Kubipisha.”

⁶ Niho Nyambi ambile kukwendi mu mulo ngayi, “Ee, nikulimuka ngayi washitenda na shikeketima shashiwahe, ndaba ya neshe nakukanishi kutenda wubi kukwami pe niho nabulu kukwitabila ngayi umukwate.

⁷ Ngoboni hano, bwesha ou mbuyama kuli mukokwendi. Ndaba ou mulume nengi muluwe pe ukakulombelela ngayi mwanga ukabule kufwa, ngoboni nikukutongweza ngayi ukafwa hamo na ba lupashi lwobe ndi kumubwesha wufwako.”

⁸ Oho kwashile lumenemene Ambimeleki, wehanine bandungo bendi nimwabo, pe wabatongwezele byuma nimwabyo byatendiwile kukwendi mu mulo, pe bantu batinine shikuma.

⁹ Niho Ambimeleki ehanine Abulahama na kumwipula ngayi, “Kati bishini ebye unatende kukwetu? Kati bishini ebye nakubipishilile ngayi ulete malamo amanene hahami naku wene wami? Shuma eshe unatende kukwami kaliha shafwanina kutendiwa.”

¹⁰ Ambimeleki wepwile ngayi, “Kati shumangani watendela nahiyo?”

¹¹ Abulahama wakumbwile ngayi, “Nahanganikile ngayi kampe kuno kowa muntu wakutina Nyambi, pe bakanziha na kuyekako mukazami.

¹² Ngoboni kami, kwamba kupwisha wenga mwana batate ngoboni kaliha mwana bamawa, pe niho haya namuyekele.

¹³ Nohobene oho Nyambi amufumishile ku litala lya batate, niho nambile kukwendi ngayi, ‘Ukutwesha ku monesha nceshe zobe kukwami na kwamba oku nimwako tukuya ngayi ami nengi mpanzobe.’ ”

¹⁴ Niho Ambimeleki abweshele Shala kuli Abulahama. Wamupanikile na matanga a bambelele na zingombe na bandungo babalume naba bambuyama.

¹⁵ Ambimeleki wambile kuli Abulahama ngayi, “Mona, litunga lyami lyalinene, zika nimwako oku ukushinga kuzika.”

¹⁶ Wambile kami kuli Shala ngayi, “Mona, nilinakupanika mpanzobe likulukazi lya muwayawaya wa shiliva, sha ku monesha aba uli nabo kuno nimwabo ngayi uli wakubula mulandu.”

¹⁷ Nohobene Abulahama walombelelele Ambimeleki, pe Nyambi washinkwilile luhemo lwa Ambimeleki, washinkwilile na luhemo lwa mukaza Ambimeleki na bandungo nimwabo babambuyama, ngayi batweshenga kubeleka.

¹⁸ Ndaba Nyambi ya Ngula washinkile luhemo lwa bantu nimwabo bamu litala lya Ambimeleki ndaba ya Shala mukaza Abulahama.