Shitatiko 18 - Libuka Lya Kuyela

Shikulupisho sha mwana wa mulume kuli Abulahama

¹ Nyambi ya Ngula waliholwele kuli Abulahama ku mitondo ya kutulila ya Oka yaku Mamele. Abulahama aha ekalile ku shipana sha ntanda yendi ha shikati sha mwaana shikuma,

² oho ayimbwile meho wendi wamonene balume bahatu hinga bemana nahiyo. Oho abamonene wetukilileko na kubashimbawila. Pe wafunkamine hanci na kulamba.

³ Wambile ngayi, “Hekulyami, ndi una wahilili na nami, pe hinga mupitilila munzi wami, ndaba nili hano kumitendela milimo.

⁴ Lehenu taha nilete mema muyowele ku mawulu wenu, mutweshe kukatala mu nceto ya mutondo.

⁵ Nikamiletela byakulya ngayi mwanga bimipane ngovu ha mukala wenu. Munezi ha munzi wami lehenu nimitekeshe.” Baya balume bahatu bambile ngayi, “Shashiwahe, tenda ngonehe unamba.”

⁶ Nohobene Abulahama wanyankupilile mu ntanda pe wambile kuli Shala ngayi, “Nyankupisha, shimba zimpamba zihatu za muhunga wobe wa loto wawuwahe, wuvubewo mankende.”

⁷ Abulahama niho etukilile ku litanga wakahatileko namani uya wengile wa muboto na kushuwa, pe wamupanine ku mukamulimo ou wanyankupishile ku muziha na kumuteleka.

⁸ Niho atolele lukaki na mahwe, hamo na nyama, pe wabitulile kumbili yabo. Oho balilenga wemanine hahepi nabo mu nceto ya mutondo.

⁹ Niho bamwipwile ngayi, “Mukazobe Shala ulikuti?” Pe wakumbwile ngayi, “Uli mu ntanda.”

¹⁰ Umo wanaba bayeni wambile ngayi, “Mwaka ou ukwiza ku shikati shinobene. Shala mukazobe ukabeleka mwana wa mulume.” Shala wekalile ku shipana sha ntanda ha muyuvwilila. Shala wekalile kunyima yendi ha muyuvwilila.

¹¹ Abulahama na Shala bengile batukulukazi shikuma, kami Shala oho wafumakale ku nciza ya munzi.

¹² Pe Shala wahepele mu mutima wendi na kwamba ngayi, “Ami nka na kulumpala kale, kami mukokwami wengakale kakulukazi, kati ami nafwanini kwikala kami na likwilu ndi?”

¹³ Nyambi ya Ngula wambile kuli Abulahama ngayi, “Kati shumangani Shala anahepe na kwamba ngayi, ‘Mwa shikuma ami nikutwesha kubeleka mwana oho na kulumpala kale ndi?

¹⁴ Kati kuli shuma sha kwangananga kuli Nyambi ya Ngula ndi? Mwaka ou ukwiza ku shikati shinobene, nikaboka kukwobe, pe mukazobe Shala ukabeleka mwana wa mulume.’”

¹⁵ Ndaba Shala wekalile na bowa, waliyawilile na kwamba ngayi, “Kaliha ninahepe.” Ngoboni Nyambi ya Ngula wambile ngayi, “Byo, nisho unatende, unahepe.”

Abulahama ukulambilila lukena lwa Shondoma

¹⁶ Niho balume bahatu bayile ku mwanya oku batweshele kutilamina Shondoma, kami Abulahama wayile nabo mu kubashindikiza.

¹⁷ Nyambi ya Ngula walyambashanine ngayi, “Kukalimbila Abulahama shuma eshe nikushinga kutenda nifwako

¹⁸ Bazukulyendi ukenga mushobo wawunene wa ngovu, pe mumwendi nikafuywela matunga nimwao.

¹⁹ Namuhata ngayi mwanga ambilenga bana bendi na ba lupashi lwendi ba kumbili ngayi bombatale ndayano zami mukutenda bya kulunga na kupwisha. Nohobene nikamutendela nimwabyo biya namukulupishile.”

²⁰ Niho Nyambi ya Ngula ambile ngayi, “Kuli shihepwa shashinene ku Shondoma na Ngomola, ndaba wubi wabo unengi wawunene shikuma.

²¹ Nafwanina ku shulukila hanci mu ku mona ndi eshe shihepwa nayuvwu shinengi sha kupwisha.”

²² Niho balume babili bakatukile bayile ku Shondoma, ngoboni Nyambi ya Ngula washalile na Abulahama.

²³ Abulahama wahenyenene kuli Nyambi ya Ngula na kumwipula ngayi, “Kati mwa shikuma obe ukuya na kulobesha bakulunga na bakuluwa ndi?

²⁴ Ku mona ndi ku bali bantu 50 bakulunga mu munzi, kati ukalobesha munzi nimwawo ndi? Kati kukawutetelela ngayi mwanga ukapulwishe 50 wufwako ndi?

²⁵ Mwa shikuma kukalobesha bantu bakulunga hamo nanaba bakuluwa wufwako. Shiya shinengi shashikalu, kutwesha kutenda noho wufwako. Ndi ukutenda noho pe bakulunga baka shushuliwila hamo na bakuluwa. Shinengi shashikalu, mukakuyata wa hano hanci nimwaho watendanga na kupwisha.”

²⁶ Nyambi ya Ngula wambile ngayi, “Ndi nikuwana bantu bakulunga 50 mu Shondoma, nikatetelela munzi nimwawo ndaba ya naba 50.”

²⁷ Abulahama wambile kami ngayi, “Hekulu nyatile ha kukanca kwami shiya nikwonzela kwamba nobe, obe Mwene. Ami nili muntu tuhu, kami ku fwanina kwamba shuma shimo nifwako.

²⁸ Ngoboni hekulu ndi kukawaniwa bantu 45 bakulunga hakati ka bantu 50? Kati ukalobesha bantu nimwabo ndaba ya bantu mutanu babulukuho ndi? Nyambi ya Ngula wambile ngayi kukalobesha uya munzi nifwako ndi nika wanamo bantu bali 45 bakulunga.”

²⁹ Abulahama wambile kami kuli Nyambi ya Ngula ngayi, “Haya ndi ukawana bantu bali 40 bakubula milandu shikekala nahiti? Nifwako kuka balobesha ndaba ya naba bantu 40.”

³⁰ Abulahama niho ambile ngayi, “Hekulu hinga upilama nafwanina kwamba kami, haya ndi kuli tuhu bantu 30? Nifwako kuka balobesha ndaba ya naba bantu 30.”

³¹ Abulahama wambile ngayi, “Hekulu nyatilenu ha kukanca kwami shiya nikwonzela kwamba kukwobe. Haya ndi bantu 20 nibo bakawaniwaho tuhu? Nifwako kuka wulobesha ndaba ya naba bantu 20.”

³² Abulahama wambile ngayi, “Hekulu, hinga upilama nishili kwamba shikati shimo taha nahiti ndi bantu 10 nibo ba ku waniwaho?” Nifwako kuka wulobesha ndaba ya naba bantu 10.

³³ Nyambi ya Ngula wayile oho amanishile kwambola na Abulahama naniye wabokele ku munzi wendi.