Shitatiko 17 - Libuka Lya Kuyela

Mukanda wenga shilimukisho sha kulimama

¹ Abulama oho ekalile na myaka 99, Nyambi ya Ngula waliholwele kukwendi, pe wambile ngayi, “Ami Nyambi Mpandashilanga. Nyombatale, kami utendenga bya kupwisha.

² Nikalimama na nobe kami nika kupanika bazukulu babengi.”

³ Niho Abulama ashungumanine manungo hanci na kulamba, pe Nyambi wambile ngayi,

⁴ “Okwe niko kulimama kwami na nobe, nikukukulupisha ngayi ukenga nkaka ya matunga.

⁵ Lizina lyobe kukatoyiwa kami ngayi Abulama lifwako, ngoboni ngayi Abulahama, Elye nilyo likenga lizina lyobe ndaba nikakwinga tata matunga.

⁶ Nikakupana bazukulu babengi kami bamo kukwabo bakenga bamyene. Ukekala na bazukulu babengi nibo bakafutuka matunga.

⁷ “Nikalama kulimama kwami kukwobe naku bazukulyobe naku bihemunwino bya kumbili ngayi kwinge kulimama kwa mwaya myaka. Nikenga Nyambi yobe na Nyambi wa bazukulyobe.

⁸ Nikakupanika bana babengi na bazukulyobe litunga lino lya Kenaani omu uli na kwikala ngo lipukwenda. Litunga nimwalyo lya Kenaani likenga lyobe mwaya myaka, pe Ami nikenga Nyambi yabo.”

⁹ Niho Nyambi ya Ngula ambile kuli Abulahama ngayi, “Obe kami uku fwanina kwitabila kulama kulimama kwami, obe na bazukulyobe na bihemunwino bya kumbili.

¹⁰ Oku niko kulimama kwami munafwanini kulama ngayi balume nimwabo hakati kenu banafwanini kuya ku mukanda.

¹¹ Ku balika hano mu ku fwanina kuya ku mukanda, shikenga shilimukisho sha kulimama kwami na nenu.

¹² Mutwalenga banabenu ku mukanda oho mwana uli na matena mutanu na ahatu kufuma kukuhemuwa. Mutwale banabenu ku mukanda kubihemunwino nimwabyo, mwana hinge ndungo hinge wabula kuhemuwa ku lupashi lwenu.

¹³ Muntu na muntu unafwanini kuya ku mukanda, muntu nimwendi wahemuwila mu litunga lino hinge ndi wakulandiwa na mali pe eshe shikenga shilimukisho ha zinyutu zenu sha ku monesha ngayi kulimama kwami nanenu kunengi kwa mwaya myaka.

¹⁴ Mulume nimwendi unabulu kuya ku mukanda, kukahanganikiwa kwinga umo wa bantu bami wufwako, ndaba unabulu kulama kulimama kwami.”

¹⁵ Niho Nyambi ya Ngula ambile kuli Abulahama ngayi, “Obe ku fwanina kami kukehana mukazobe ngayi Shalai wufwako, kufuma lelo ukamutumba ngayi Shala.

¹⁶ Nikamufuywela, kami nikamupana mwana wa mulume kukwendi. Nikamufuywela, kami ukenga manda matunga, kami mukati ka bazukulyendi mukafuma bamyene.”

¹⁷ Niho Abulahama ashinkamine manungo hanci na kulamba, ngoboni watatikile kuhepa oho ahanganikile ngayi, “Kati muntu ukutwesha kwikala na mwana oho uli na myaka 100 ndi? Kati Shala uli na myaka 90 ukutwesha kwikala na mwana ndi?”

¹⁸ Abulahama wambile kuli Nyambi ngayi, “Shumangani unabulu kuleha Ishimaele kwinga ncwana yami?”

¹⁹ Ngoboni Nyambi ya Ngula wambile ngayi, “Byo, mukazobe Shala ukakubelekela mwana wa mulume pe ukamutumba ngayi Ishaki. Nikashumisha kulimama kwami nendi kwinga kulimama kwa mwaya myaka ku bazukulyendi.

²⁰ Ngoboni bya Ishimaele nayuvwu kunyepa kwobe, nohobene nikamifwuywela na kumupana bana babengi na bazukulu babengi. Ukenga tata bamyene likumi na babili, kami nikatenda mushobo wawunene ku bazukulyendi.

²¹ Ngoboni nikashumisha kulimama kwami kuli mwanobe Ishaki, ou Shala mukazobe aka kubelekela mwaka ukwiza.”

²² Oho Nyambi amanishile kwamba na Abulahama, pe wamushiyile.

²³ Niho Abulahama ashimbile Ishimaele mwanendi wa mulume na bandungo nimwabo bahemuwilile mu litala lyendi, hinge balandiwile na mali, balume nimwabo bamu litala lya Abulahama, pe wabatwalile ku mukanda ngonehe amutongwezele Nyambi.

²⁴ Abulahama wekalile na myaka 99 oho ayile ku mukanda.

²⁵ Ishimaele wekalile na myaka 13 oho ayile ku mukanda.

²⁶ Nimwabo Abulahama na Ishimaele bayile ku mukanda ha mutena umo,

²⁷ hamo na bandungo nimwabo ba Abulahama.