Shitatiko 16 - Libuka Lya Kuyela

Hangali na Ishamaele

¹ Shalai mukaza Abulama kaliha wamubelekelele bana, ngoboni wekalile na ndungo yendi wa mbuyama wa Kaengepita na lizina lyendi Hangali.

² Shalai wambile kuli Abulama ngayi, “Nyambi ya Ngula unanyumini kubeleka. Nikushinga ngayi ulale na ndungo yami kampe ukambelekelako mwana.” Pe Abulama wetabilile.

³ Nohobene Shalai wapanikile Hangali kukwendi kwinga mukazendi wakwinginina. Eshe shatendiwile oho Abulama wekalakale na myaka likumi mu litunga lya Kenaani.

⁴ Abulama walalile na Hangali, pe Hangali wemitile. Oho Hangali amonene ngayi wemitakale, waliyemezele na kuhandula hekulyendi Shalai.

⁵ Niho Shalai ambile kuli Abulama ngayi, “Unengi mulandu wobe ngayi Hangali ahandule. Amimwine nakupanikile ndungo yami, pe oho anamono ngayi unemiti niho ali na kuhandula. Nikehana Nyambi ya Ngula kwinga mukakuyata mukatiketu, obe na nami.”

⁶ Abulama wambile ngayi, “Mona, osho shili kukwobe obemwine, niye wenga ndungo yobe, kami uli mu ngovu zobe. Utende ngonehe ukushinga kutenda nendi.” Niho Shalai wekalikile Hangali mu shimpihi, pe wetukile.

⁷ Lingeloyi lya Nyambi lyawanine Hangali ku kaheloke mu libelelengwa ha nzila ya kuya ku Shula,

⁸ pe lyambile ngayi, “Hangali, ndungo ya Shalai unakufuma kuti kami unakuya kuti?” Niye wambile ngayi, “Nikutina hekulyami Shalai.”

⁹ Niho lingeloyi lya Nyambi ya Ngula lyambile kukwendi ngayi, “Boka kuli hekulyobe Shalai ukalishishe kukwendi.”

¹⁰ Niho lyambile kami ngayi, “Nikakupanika bazukulu babengi ngayi bakabule kutwesheka kulabiwa.

¹¹ Niho lingeloyi lya Nyambi ya Ngula lyambile kuli Hangali ngayi, uli na livumo, uli hahepi na kubeleka mwana wa mulume, pe ukamutumba lizina ngayi Ishimaele, ndaba Nyambi ya Ngula unayuvwu makando akulila kwobe.

¹² Ngoboni mwanobe ukayoya ngonehe mutinkwe wamu lishaka, ukalwisha bantu nimwabo, kami bantu bakamulwisha. Ukekala kwakutali na bawushinda wendi nimwabo.”

¹³ Hangali watumbile Nyambi ya Ngula ou ambilenga nendi ngayi, “Nyambi ou wamonanga,” ndaba wambile ngayi, “Haya ninamono ou wamonanga.”

¹⁴ Nisho shuma shiya bantu bakutumbila lishima lya mukati ka Kandeshi na Mbelendi ngayi, “Lishima lya Wakuyoya, ou Wamonanga.”

¹⁵ Hangali wabelekelele Abulama mwana wa mulume, niho amutumbile ngayi Ishimaele.

¹⁶ Abulama wekalile na myaka 86 oho Hangali amubelekelele Ishimaele.