Shitatiko 15 - Libuka Lya Kuyela

Kulimama kwa Nyambi na Abulama

¹ Kunyima yanebye lizu lya Nyambi ya Ngula lyezile kuli Abulama mushimonekesho ngayi, “Abulama hinga wutina. Ami nengi likebo lyobe na ncuungu yobe yikenga yayinene.”

² Ngoboni Abulama wambile ngayi, “Obe mwene Nyambi ya Ngula, ami bana nifwabo, pe ncuungu yobe yika nyavwa bishini? Ncwana yami ndele Eliyeza waku Ndamashika.

³ Shilolo umpane bana, nohobene umo ku bandungo bami ukakona wuheti wami.”

⁴ Nyambi ya Ngula niho ambile ngayi, “Ou ndungo yobe Eliyeza kukakona wuheti wobe wufwako, mwanobe wakulibelekela niye ukenga ncwana.”

⁵ Nyambi ya Ngula wamututwishile ha munkanda na kumutongweza ngayi, “Tilamina kuyilu, ezeka kulaba nyenye, ndi ukutwesha kuzilaba. Pe bazukulyobe bakenga babengi ngonehe eze nyenye.”

⁶ Abulama wakulupilile Nyambi ya Ngula, pe ndaba ya kukulupila Nyambi ya Ngula wamutambwile kwinga wakulunga.

⁷ Nyambi ya Ngula niho ambile kukwendi ngayi, “Ami Nyambi ya Ngula, ou wakufumishile ku Ule mu Mbambiloni ngayi mwanga nikupane litunga lino linge likona lyobe.”

⁸ Ngoboni Abulama wambile ngayi, “Obe Mwene Nyambi ya Ngula, nikalimuka nahiti ngayi likenga lyami?”

⁹ Nyambi ya Ngula wambile ngayi, “Ndetele namani wa shitole wa myaka yihatu na mpongo wa myaka yihatu na shikungwe wa mbelele wa myaka yihatu na litela na mwana nkilimba.”

¹⁰ Niho Abulama aletele ebye bimuna nimwabyo kuli Nyambi na kubiketola hakati, pe wayakile bimamo mu kuliyahikiza shimo na shamina mu mihoko yibili, ngoboni kaliha waketwile tuyoni.

¹¹ Makubi oho ezile mu kutulila hanebye bimamo, Abulama wawatukishileho.

¹² Oho mutena wayilenga mu kulela, Abulama wekalile mutulo twa ngonzi, kami bowa na mutentu byezile hahendi.

¹³ Nyambi ya Ngula wambile kuli Abulama ngayi, “Bazukulyobe bakenga bayeni mu litunga lya bashenge, bakenga bandungo kuyo kami bakayandishiwa mu myaka 400.

¹⁴ Ngoboni ni ka shushula litunga liya bakatendela milimo, ku nyima ya nebye bakafuma mu litunga liyo baka shimbamo na wuheti wawingi.

¹⁵ Ngoboni obe ukayoya shikati shashitali, pe ukafwa mu ku mwena. Ukafundiwa hinga wakembala shikuma.

¹⁶ Mu mukoka wawunaa bazukulyobe bakaboka kuno, ndaba kukatanda nifwako Baamoli hantu banabipishi shikuma ngayi bashushuliwe.”

¹⁷ Oho mutena walelakale, kami kwengakale mincimpwe, hohobene kwamonekele nyungu ya mundilo hamo na mumuni wakungelema, pe byapitile mukati ka bimamo bya tuya tuyamana.

¹⁸ Ha mutena uyo Nyambi ya Ngula walimamine na Abulama ngayi, “Nikukulupisha ngayi nikupana litunga elye nimwalyo ku bazukulyobe, kubalikila ku nginza ya Engepita kutwala naku Mushinzi wawunene wa Yufuleti,

¹⁹ litunga lya Bakenaani na Bakenezi na Bakandimonati,

²⁰ na Bahita na Bapelizi na Balefwayima,

²¹ na Baamoli na Bakenaani na Bangilingashi na Bayembushi.”