Shitatiko 13 - Libuka Lya Kuyela

Abulama na Lote bakulitapa

¹ Abulama na mukazendi hamo na byuma nimwabyo ahetele bafumine ku Engepita, bayile ku Nengembu, ku mbalila yaku mabukubuku. Pe Lote wayile hamo nabo.

² Abulama wengile muntu wakuheta shikuma. Wahetele bimuna bya bambelele na bampongo na zingombe, ngolinde na shiliva.

³ Niho afumine kuyo, watuntozokele kufuma kumbalila yimo kuya ku mbalila yamina na kukuma ku Mbetele. Wakumine ku munkungwa wendi azikilenga mwaka mukati ka Mbetele na Ayi,

⁴ kuyo ku mwanya akazikile kaala ka mamanya. Niko Abulama alemeshele Nyambi ya Ngula.

⁵ Lote ou wayile hamo na Abulama naniye kami wekalile na matanga a bambelele na bampongo na zingombe hamo na ba lupashi lwendi na bakamilimo bendi.

⁶ Kwabulile mwanya wakubuyishila ngayi bekale hamo, ndaba wubili wabo bekalile na bimuna byabingi shikuma.

⁷ Nohobene kwekalile nkani mukati ka balishani ba Abulama na balishani ba Lote. Ha shikati shiyo Bakenaani na Bapelizi hinga bekala mu liyo litunga.

⁸ Abulama wambile kuli Lote ngayi, “Etu, mu wushinda wetu, pe balishani bobe na balishani bami kaliha banafwanini kulifutulukila.

⁹ Tuye tu li tape, hata mbalila ya litunga eye nimwayo ukushinga. Ndi ukuya kumina pe nami kami nikaya kwamina.”

¹⁰ Nohobene Lote washengezelele na ku mona ngayi tungulungwa nimwato twa mushinzi wa Yondana na kukuma naku Zowa twekalile na mema amengi, ngonehe mfuba ya Nyambi ya Ngula hinge litunga lya Engepita. (Oho shilolokale Nyambi ya Ngula alobeshe zinkena za Shondoma na Ngomola.)

¹¹ Lote walihatilile mikulo nimwayo ya Yondana, kami wayile kupenza ku mushamuko. Eshe nisho balitapile aba bantu babili.

¹² Abulama wazikile mu litunga lya Kenaani, ngoboni Lote wakazikile mukati ka minzi yamu mbuwa. Pe wahenyenene na kuzika munkungwa wendi hahepi na Shondoma.

¹³ Bantu bamu munzi uyo bengile bakuluwa, kami babipishilile Nyambi ya Ngula.

Abulama ukutuntukila ku Hembuloni

¹⁴ Lote oho ayile, Nyambi ya Ngula wambile kuli Abulama ngayi, Upenzesheshe shiwahe ku ncelele naku mabukubuku naku mushamuko naku mponci.

¹⁵ Nikapanika kukwobe naku bazukulyobe litunga nimwalyo liya ukumona, pe likenga lyobe lya mwaya myaka.

¹⁶ Nikakupanika bazukulu babengi, kami kowa muntu ukatwesha kubalaba nimwabo, ou ukutwesha kulaba lihekelela lya hanci niye ukutwesha kubalaba.

¹⁷ Haya katuka yanga na ku mona litunga nimwalyo ndaba na ku kupanikalyo.

¹⁸ Nohobene Abulama, watuntwile munkungwa wendi pe wazikile kwakwipi na mitondo ya ku tulila ya Oka yaku Mamele ku Hembuloni, kuyo niko azikilile Nyambi ya Ngula kaala ka mamanya.