Shitatiko 11 - Libuka Lya Kuyela

Kapeshi kaku Mbambiloni

¹ Ha kutatika, bantu ba hano hanci nimwabo bekalile na lulimi lumo kami bambilenga mazu amo.

² Oho bantu bayambangilile ku mushamuko, bawanine mbuwa mu litunga lya Shina, niho bazikilemo.

³ Balyambashanine umo na wamina ngayi, “Yekenu, Tubumbe mashintina na kuwayoha.” Pe bekalile na mashintina kupitakana mamanya, baliyavwishile lingongwe lya ku kwatisha mashintina hamo kupitakana ntiti.

⁴ Niho bambile ngayi, “Haya, tuyenu tu li zikilenu munzi uli na kapeshi kakatali kakakuma muyilu, ngayi mwanga tuye mpupo na kutina tupanzanina hano hanci nimwaho.”

⁵ Ngoboni Nyambi ya Ngula, wezile hanci mu ku mona munzi na kapeshi ebye batendele aba bantu.

⁶ Pe Nyambi ya Ngula wambile ngayi, “Haya ndi bantu aba banengi bamo kami bakwamba lulimi lumo, eshi shinengi mabalikilo tuhu shanebye bakatenda, haya shikenga shawangu kutenda ebye bakafunga kami kowa ebye bikakwangana.

⁷ Nohobene, tuyenu hanci tukaluwishe lulimi lwabo ngayi mwanga babule kuliyuvwashana mukati kabo.”

⁸ Niho Nyambi ya Ngula abapanzanishilile hanci nimwaho, pe baya bantu balehelesho kuzika uya munzi.

⁹ Uya munzi bawutumbile ngayi Mbambelu, ndaba kuyo niko Nyambi ya Ngula aluwanganishile zindimi za bantu nimwabo. Kami niko abapanzanishilile hano hanci nimwaho.

Bazukulya Shemu

¹⁰ Aba nibo bazukulya Shemu, munyima ya myaka yibili ya libazi, Shemu oho ekalile na myaka 100 wabelekele mwana wa mulume, lizina lyendi Alipakishandi.

¹¹ Kunyima yanebye wekalile kami myaka 500, pe wabelekele bana babalume naba bambuyama.

¹² Alipakishandi wekalile na myaka 35, wabelekele mwana wa mulume lizina lyendi Shela,

¹³ Alipakishandi oho ekalile na myaka 403 wabelekele kami bana babalume naba bambuyama.

¹⁴ Shela oho ekalile na myaka 30, wabelekele mwana wa mulume lizina lyendi Emba.

¹⁵ Shela wekalile na myaka 403 pe kami wabelekele bana babalume na babambuyama.

¹⁶ Emba oho ekalile na myaka 34, wabelekele mwana wa mulume lizina lyendi Pelengi.

¹⁷ Emba wekalile na myaka 430 pe kami wabelekele bana babalume naba babambuyama.

¹⁸ Pelengi wekalile na myaka 30, wabelekele mwana wa mulume lizina lyendi Leu.

¹⁹ Pelengi oho ekalile na myaka 209 pe kami wabelekele bana bamina babalume naba bambuyama.

²⁰ Leu wekalile na myaka 32, wabelekele mwana wa mulume lizina lyendi Shelungi.

²¹ Leu oho ekalile na myaka 207, pe kami wabelekele bana babalume na babambuyama.

²² Shelungi wekalile na myaka 30, wabelekele mwana wa mulume lizina lyendi Nahole.

²³ Shelungi oho ekalile na myaka 200, pe kami wabelekele bana babalume naba bambuyama.

²⁴ Nahole wekalile na myaka 29, pe wabelekele mwana wa mulume lizina lyendi Tela.

²⁵ Nahole oho ekalile na myaka 119, pe kami wabelekele bana babalume na babambuyama.

²⁶ Tela oho ekalile na myaka 70, wabelekele Abulama, Nahole na Halani.

Bazukulya Tela

²⁷ Aba nibo bazukulya Tela. Tela wabelekele Abulama, Nahole na Halani. Halani wabelekele Lote.

²⁸ Halani wafwililile mu munzi wendi wakuhemuwila wa Ule waku Mbambiloni. Wafwile oho Tela tatiyendi ushili kuyoya.

²⁹ Abulama wayekele Shalai, pe Nahole wayekele Milika mwana Halani, ou wengile kami tata Ishika.

³⁰ Shalai kaliha wekalile na bana ndaba wengile mumba.

³¹ Tela wakatukile na mwanendi Abulama, hamo na muzukulyendi Lote na mukowendi mukaza Abulama, pe bafumine ku munzi wa Ule mu litunga lya Mbambiloni na kuya ku litunga lya Kenaani. Ngoboni bayile ku Halani na kuzikako.

³² Tela wafwile ku Halani hinga ekala na myaka 205.