Shitatiko 10 - Libuka Lya Kuyela

Bihemunwino bya bana ba Nowa

¹ Ebye nibyo bihemunwino bya bana ba Nowa, bengile Shemu na Hamu na Yafweti. Aba bahatu babelekele bana oho libazi lyapitakale.

² Bana ba Yafweti bengile Ngomela na Mangongi na Mendiya na Yabani na Tumbalu na Mesheki na Tilashi. Aba bengile bankaka za bantu aba batumbile matunga mazina wabo.

³ Bana ba Ngomela bengile Ashikenazi na Lifwati na Tongama.

⁴ Bana ba Yabani bengile ba Elishahi na Tashishi na Kitimu na Londanimu.

⁵ Nibo bengile batata bantu bazika ha shibumbo naha bikuli bya liwate. Aba nibo bana ba Yafweti bekalilenga mu mishobo yabo ya kulitapulula na matunga akulitapulula, kanzunga na kanzunga kambilenga lulimi lwako.

⁶ Bana ba Hamu bengile Kushi na Engepita na Limbiya na Kenaani, aba bengile bankaka za bantu batumbile matunga mazina wabo.

⁷ Bazukulya Kushi bengile ba Shemba na Habila na Shambita na Lama na Shambitika. Bana ba Lama bengile ba Shemba na Ndendani.

⁸ Kushi wa belekele Nimulondi, ou wengile muntu wakutatika hano hanci mu ka kulwa wa ngovu.

⁹ Niye wengile shibinda wamunene ku meho a Nyambi. Eshe nisho shuma bantu bambilenga ngayi, “Nyambi ya Ngula mwanga akwingishe wamunene ngonehe shibinda Nimulondi.”

¹⁰ Ha kutatika wene wendi washimbile hamo na Mbambelu na Eleki na Akandi zinkena nimwazo eze zihatu na Kalina zekalile mu litunga lya Shina.

¹¹ Oho afumine mu litunga liyo, wayile ku Ashiliya niko akazikile zinkena za Neniva na Lehomboti Ila na Kala na

¹² Leshena lukena olwe luli mukati ka Neniva na lukena lwalunene lwa Kala.

¹³ Bana ba Engepita bengile bantu ba ku Lundimu na Anamimi na Lehambimi na Nafutuhima,

¹⁴ Patuluzi na Kashiluhimu na bantu ba Kafwitola, niko kwa fumine Bafwilishitina.

¹⁵ Bana ba Kenaani babalume bengile Shindoni wa mweli na Heti. Aba bengile bankaka za bantu aba batumbile matunga mazina wabo.

¹⁶ Kenaani wengile kami nkaka ya Bayembushi na Baamoli na Bangilingashi,

¹⁷ na Bahivi na Baakite na Bashina,

¹⁸ na Alibanditi na Bazamaliya na Bahamati. Kunyima yanebye mishobo nimwayo ya Bakenaani yahanyine nimwako,

¹⁹ hantu zinginza za Bakenaani za kumine kubalika ku mabukubuku a Shindoni kukuma naku Ngela na hahepi na Ngaza naku mushamuko kukuma ku Shondoma na Ngomola na Andima na Zemboyima hahepi na Lasha.

²⁰ Aba nibo bana ba Hamu, bekalile mu mishobo yabo na matunga wabo akulitapatapa, pe lupashi na lupashi lwambilenga lulimi lwabo.

²¹ Shemu ou wengile yaya Yafweti, niye wengile tata bahebelu nimwabo.

²² Bana ba Shemu bengile Elamu na Ashula na Alipakishandi na Lundi na Alamu.

²³ Bana ba Alamu bengile ba Uzi na Hula na Ngeta na Mashi.

²⁴ Alipakishandi wengile tata Shela, Shela wengile tata Emba.

²⁵ Emba wabelekele bana babili umo watumbiwile ngayi Pelengi ndaba ha shikati shendi bantu ba hanci balitapatapile. Wamina watumbiwile ngayi Yokitani.

²⁶ Yokitani wabelekele Alimondandi na Shelefi na Hazalamabeta na Yela,

²⁷ na Handolamu na Uzalu na Ndikila,

²⁸ na Ombalu na Ambimayele na Shemba,

²⁹ na Ofwila na Habila na Yombambu, nimwabo aba bengile bana ba Yokitani.

³⁰ Litunga omu bazikile lyanenehele kubalika ku Mesha kukakuma naku Shefwa ku binkanda bya ku mushamuko.

³¹ Aba nibo bana ba Shemu, bayo bekalilenga mu mishobo na matunga abo a kulishiyashiya, kanzunga na kanzunga kambilenga lulimi lwako.

³² Bantu aba nimwabo bengile bazukulya Nowa na mu shihemunwino shabo na mishobo yabo. Kunyima ya libazi, mikoka nimwayo ya hano hanci yatutikile kuli bana ba Nowa babalume.