Shitatiko 1 - Libuka Lya Kuyela

Shambo sha kulenga kwa kaye

¹ Ha kutatika Nyambi walengele liyilu na kaye.

² Kaye kabulukile shifwekesha na kwinga ha mukungulu, pe mincimpwe yafwikile, kami moyo wa Nyambi wendelenga hayilu ya mema.

³ Niho Nyambi ambile ngayi, “Kwikale liyeye,” Pe liyeye lyamonekele.

⁴ Nyambi wamonene ngayi liyeye lyengile lyaliwahe, niho atapulwile liyeye ku mincimpwe.

⁵ Niho Nyambi atumbile liyeye ngayi “Mwaana” na mincimpwe ngayi “Wushiku.” Kumazolo kwalelele na lumenemene kwashile, ou niwo wengile mutena wakutatika.

⁶ Niho Nyambi ambile ngayi kwikale mwanya ngayi utapulule mema ngayi ekale muzimbalila zibili, pe eshe shatendiwile.

⁷ Nohobene Nyambi watendele mwanya watapulwile mema amu nceto yawo na mema hayilu yawo. Eshe shatendiwile.

⁸ Pe watumbile mwanya ngayi, “Liyilu” kumazolo kwalelele na lumenemene kwashile, ou niwo wengile mutena wawubili.

⁹ Nyambi niho ambile ngayi, “Haya mema ali mu nceto ya liyilu alikungwile hamo kumbalila yimo ngayi lukandwa mwanga lumoneke.” Pe eshe shatendiwile.

¹⁰ Nyambi watumbile lukandwa ngayi, “Hanci,” na mema awa alikungwile hamo wa watumbile ngayi, “Liwate.” Nyambi wamonene ngayi eshe shengile shashiwahe.

¹¹ Niho Nyambi ambile ngayi, “Limvu limeneshe mishobo nimwayo ya byuma bya kumena hanci, biya byayimanga mpeka na biya byayimanga mikabo.” Pe eshe shatendiwile.

¹² Nohobene limvu lyameneshele mishobo nimwayo ya byuma bya kumena hanci, biya byayimanga mpeka nanebye byayimanga mikabo, pe Nyambi wamonene ngayi eshe shengile shashiwahe.

¹³ Kumazolo kwalelele na lumenemene kwashile. Ou wengile mutena wawuhatu.

¹⁴ Nyambi niho ambile ngayi, “Haya kwikale zimuni muyilu za kutapulula mwaana ku wushiku, binge bilimukisho bya ku monesha kutatika kwa bikati,

¹⁵ zikamunike muyilu mu kupana liyeye hanci.” Pe eshe shatendiwile.

¹⁶ Nohobene Nyambi watendele zimuni zibili zazinene, mutena kwikala na ngovu ku mwaana na Ngonda kwikala na ngovu ha wushiku, pe walengele kami na nyenye.

¹⁷ Wayakile mimuni mu mbimbayilu ya ku munika hanci,

¹⁸ mu kutwamina mwaana na wushiku na kutapulula mwaana ku mincimpwe. Nyambi wamonene ngayi eshe shengile shashiwahe.

¹⁹ Ku mazolo kwalelele lumenemene kwashile, ou wengile mutena wawunaa.

²⁰ Niho Nyambi ambile ngayi, “Haya mema atutwishe matanga a mishobo ya bibumbwabumbwa bya kuyoya, haya mbimbayilu kami mwanga mutukenga matanga a tuyoni.”

²¹ Nohobene Nyambi walengele batuyamana babanene bamu liwate na bibumbwabumbwa nimwabyo bya kuyoya mu mema na tuyoni twa mishoboshobo. Pe Nyambi wamonene ngayi eshe shengile shashiwahe.

²² Niho Nyambi atandalishile byuma nimwabyo bya kuyoya mu mema ngayi, “Hemununenu muvule ngayi mwinzalishe liwate na tuyoni ngayi tuvule hanci.”

²³ Kumazolo kwalelele lumenemene kwashile. Ou wengile mutena wa mutanu.

²⁴ Niho Nyambi ambile ngayi, “Hanci hekale mishobo nimwayo ya tuyamana, bimuna na tuyamana twa lishaka, hamo na byuma nimwabyo bya kulikoka hanci.” Pe eshe shatendiwile.

²⁵ Nohobene Nyambi walengele tuyamana na bimuna, hamo na byuma nimwabyo bya kulikoka hanci. Nyambi wamonene ngayi eshe shengile shashiwahe.

²⁶ Niho Nyambi ambile ngayi, “Tutendenu muntu mushifwekesha shetu, ou ukenga ngonehe etu. Ou ukekala na ngovu ha zinci na tuyoni na tuyamana nimwato twa lishaka na bimuna na bya kulikoka nimwabyo hanci.”

²⁷ Nohobene Nyambi walengele muntu mu shifwekesha shendi, pe mushifwekesha shendi wabalengele mulume na mukazi.

²⁸ Nyambi wabafuywele pe wambile ngayi, “Hemenu, mwanga muvule, yinzalishenu hano hanci nimwaho na kulilela. Nikamipana ngovu ha zinci, tuyoni na tuyamana nimwato twa lishaka.”

²⁹ Nyambi wambile ngayi, “Monenu namipaniki mbuto nimwayo ya mishobo wa mpeka na mishobo nimwayo ya mitondo ya mikabo ngayi mulye,

³⁰ ngoboni kutuyamana na tuyoni nimwato na bya kulikoka hanci, hamo na byuma bya kuyoya nimwabyo na biwahishili mwila na mabizi kwinga bya kulya byabo.” Pe eshe shatendiwile.

³¹ Nyambi watilamine ha byuma nimwabyo biya alengele, niho amonene ngayi byabiwahe shikuma. Kumazolo kwalelele na lumenemene kwashile. Ou wengile mutena wa mutanu na umo.