Ombandiya 1 - Libuka Lya Kuyela

¹ Eshe nisho shimono sha muluwe Ombandiya, Nyambi ya Ngula akwamba, ha litunga lya Endoma. Tunayuvwu lizu lya Nyambi ya Ngula, kami unatumu ntumwana mukati ka mikoka ngayi, “Lishakashakenu. Tuye tukalwishe litunga lya Endoma.”

Nyambi ukashushula Endoma

² Nyambi ya Ngula ukwamba kuli Endoma ngayi, “Mona nika kushepesha mukati ka mikoka. Muntu nimwendi ukakukana.

³ Kuliyemeza kwobe kunakwongeze. Kembi ka lukena lwobe ka mamanya. Munzi wobe wazikiwa hayilu ya mapili. Pe wambanga mu mutima wobe ngayi, ‘Kati yani ukutwesha kumpashwila hanci?’

⁴ Hinge ndi ukwikala hayilu, ngonehi haya atendelanga ngonga lihwa, hinge ndi lihwa lyobe likekala hamo na nyenye, hingebene kuyo nika kupashwila hanci. Eshe nisho anamba Nyambi ya Ngula.

⁵ Ndi bezi bezile kukwobe, na makombe bakeza kukwobe wushiku, kati bakayiba na kubula ku shiyaho bimo ndi? Tawee! Ukekala mu makando! Kati bakakubuya mikabo ya shinyanca, bakabuya nimwayo na kubula ku shiyako yayishe ndi?

⁶ Monenu litunga lya Ishau eshe liku monekalamo, nisho banapukulu na wuheti wendi nimwawo.

⁷ Bashikonzi bobe banakwongeze, ba kutandilakale kunkumo ya litunga lyobe. Bahoni bobe wakinka mutima bakakuvwima kanyimbwa, ngoboni kuka kalimuka ufwako.”

⁸ Nyambi ya Ngula ukwamba ngayi, kati hashikati osho kukalobesha bantu bangana bamu Endoma, na bantu ba ku yuvwishisha bekala mu mapili a Ishau nifwako ndi?

⁹ Bantu ba kukanca ba ku Temani bakatampwa, pe bantu nimwabo ba ku lipili lya Ishau bakazihiwa.

Milandu ya kushushuliwa kwa Endoma

¹⁰ “Ndaba ya mishunga unatende hali kawushinda wobe Yakobo, ukayeneshiwa, kami ukazihiwa mwaya myaka.

¹¹ Wemanine kunkumo ha mutena uyo, oho bamalamo bamuyinginine na kupokola mapangati endi, Wengile wamubi ngonehe obo bantu, obo bafumine kwashenge, aba bashimbile wuheti wa Yelushalema, na kulitapilao.

¹² Ngoboni kaliha wafwaninine kutangalila ha mutena wa makando akawushinda wobe, kaliha wafwaninine ku wahilila ha mutena wakuloba kwa Yunda, kaliha wafwaninine kuliyemeza shikuma ha mutena wa malwa abo.

¹³ Kaliha wafwaninine kwingina mu lipangati lya bantu bami ha mutena wa malwa wendi, kaliha wafwaninine kutangalila ha kuyanda kwendi ha mutena wa malwa wendi, kaliha wafwaninine kupukula wuheti wendi ha mutena wa malwa wendi.

¹⁴ Kaliha wafwaninine kwimana ha mahambanzila, ngayi ukanishe bantu bakushinga kupanza, kaliha wafwaninine kukwata baya ba kupanza na kubapana ku bamalamo, shikati sha malwa wabo.”

Nyambi ukayata mikoka

¹⁵ “Mutena wa Nyambi ya Ngula, uli hahepi ha matunga nimwao. Ngonehe watenda, shikatendiwa kukwobe kami, ntendelo yobe yikaboka ha mutwe wobe obemwine.

¹⁶ Bantu bami banwininine munkomoki ya yayilulu ya kushushula kwami ha lipili lya kuyela, ngoboni matunga anamuzinguluku bakanwa nabo munkomoki ya yayilulu ya kushushula, bakanwamo nimwabo, pe bakaloba.

¹⁷ Ngoboni ha lipili lya Ziyoni hakashala bamo baya bakapanza, pe likenga lipili lya kuyela, niho ba litala lya Yakobo bakakona litunga lyabo.

¹⁸ Bantu ba litala lya Yakobo bakenga mundilo, pe baka litala lya Yoshefwa bakenga mulangi, kami ba litala lya Ishau bakenga ngo ntende bakabahokesha peluu! Ku ba litala lya Ishau kowa ukapuluka, ndaba Nyambi ya Ngula unamba.

¹⁹ ‘Baya bazika mu Nengembu bakakona lipili lya Ishau. Baya bazika mu zimbuwa bakakona mu litunga lya Bafwilishitina, bakakona kami litunga lya Efulemu hamo na lya Shamaliya, pe Mbenjamani ukakona Ngiliyande.

²⁰ Bantapwa ba Ishalela ba bakenaani, bakaboka ku litunga lyabo, pe bakakona kami litunga lya Fonisha kukakuma naku Shefwalandi, na bantampwa ba Yelushalema aba bali mu Shandishi, bakakona minzi ya mu Nengembu.

²¹ Bakakupulwisha bakakankalala ku lipili lya Ziyoni, bakalela lipili lya Ishau, Nyambi ya Ngula niye mwene!”