Nyimbo 98 - Libuka Lya KuyelaNyambi Kalela wa Kaye Lwimbo 1 Yimbilenu lwimbo lwalupya kuli Nyambi ya Ngula, ndaba unatende byuma bya kukomokesha. Na ngovu na nyala zendi za kuyela, unakomo nimwabyo. 2 Nyambi ya Ngula wabilikile kukona kwendi, waholwele kulunga kwendi ku matunga nimwawo. 3 Niye wanukile shikulupisho shendi sha kwoloka na shishemo sha mwaya myaka ku Baishalela. Bantu nimwabo kuti na kuti banamono kukona kwa Nyambi yetu. 4 Bilikizenu na ku wahilila kuli Nyambi ya Ngula, enu ba hano hanci nimwenu, muyemezenu na nyimbo na ku wulumwina tunkelenkele. 5 Yimbilenu nyimbo za kuyemeza kuli Nyambi ya Ngula. Mbetenunga nyimbo ha tumbuli. Na kwimbila nyimbo na maleenda. 6 Shibenu zimpandula na ncengo za bikungwe, na kuwulumwina tunkelenkele kuli Nyambi ya Ngula, Mwene yetu. 7 Haya obe liwate, nkwancana, hamo na bibumbwabumbwa nimwabyo bilimo, obe Kaye, wahilila hamo na naba bazikamo nimwabo. 8 Enu mishinzi kambililenu na maboko wenu, enu mapili yimbilenu nyimbo za ku wahilila 9 kuli Nyambi ya Ngula, ndaba ukwiza na kuyata hanci. Ukayata mikoka yaha kaye mu kulunga na kupwisha. |
Libuka Lya Kuyela © Bible Society of Zambia, 2020.
Bible Society of Zambia