Nyimbo 96 - Libuka Lya Kuyela

Nyambi mwene wamunene

¹ Yimbilenu kuli Nyambi ya Ngula lwimbo lwalupya! Yimbilenu kuli Nyambi ya Ngula, enu bantu ba hano hanci nimwaho.

² Yimbilenu kuli Nyambi ya Ngula, na kuyemeza lizina lyendi. Shimikilenu ncango za ziwahe ngayi u na tupulwishi.

³ Bilikenu wuwahe wendi ku matunga, na milimo yendi yayinene ku bantu nimwabo.

⁴ Nyambi ya Ngula wamunene. Nafwanini ku yemeziwa shikuma, uku fwanina kulemeekiwa shikuma kupitakana ba nyambi nimwabo.

⁵ Ba nyambi nimwabo ba matunga amina banengi tuhu tunankishi, ngoboni Nyambi ya Ngula niye walengele mayilu.

⁶ Wuwahe na maleema bya mu zinguluka, ngovu na wuwahe byekala mu litala lyendi.

⁷ Yemezenu Nyambi ya Ngula, enu bantu nimwenu hano hanci, yemezenu wuwahe na ngovu zendi.

⁸ Yemezenu Nyambi ya Ngula, wuwahe wa lizina lyendi. Letenu zintupu, pe mwize mwingine mu Litala lyendi.

⁹ Lambenu ku meho a Nyambi ya Ngula, ku wuwahe wendi na ku yela nimwako, hano hanci nimwaho kankenu kumbili yendi.

¹⁰ Ambenu ku matunga nimwawo ngayi, “Nyambi ya Ngula, niye Mwene. Kaye kanashumu mu mwanya wako, pe kowa ukutwesha kukahenyesha. Ukayata bantu mukupwisha.”

¹¹ Bya muyilu bitangale, bya hanci hano biwahilile! Nobe liwate nkwancana, na byuma nimwabyo bya kulengiwa uli nabyo!

¹² Mafuba atangalale na nimwabyo byekalamo. Mitondo ya mu lishaka yiwulumwine na ku wahilila,

¹³ ku meho a Nyambi ya Ngula, oho akeza na kuyata hano hanci. Ukayata kano kaye nimwako mu kulunga na bantu mu kupwisha.