Nyimbo 94 - Libuka Lya Kuyela

Nyambi mukakuyata nimwabo

¹ Obe Nyambi ya Ngula, Obe Nyambi mukakushushula, monesha wukali wobe.

² Obe wayatanga bantu nimwabo, haya yeka upane bakakuliyemeza binabafwanini.

³ Obe Nyambi ya Ngula, kati bakuluwa bakatangala shikati sha kukuma hati? Kati bakawahilila shikati sha kukuma hati?

⁴ Kati bakakutenda byabibi baka liyemeza kanga, kuliyemeza ha milandu yabo?

⁵ Bakulyatilila bantu bobe, Obe Nyambi ya Ngula, na kuyandisha bantu bobe ba kuhatiwa.

⁶ Bakuziha bamfwile na mapukwenda aba bazika nabo mu litunga lyabo, ba kuziha na banginga.

⁷ Bakwamba ngayi, “Nyambi ya Ngula kutumona ufwako, Nyambi wa Yakobo kutosha ufwako.”

⁸ Enu bantu bakubula ngana mukayeba shikati sha kukuma hati, mukalilongesha mutena ngani?

⁹ Nyambi watopekele matu, kati kutwesha kuyuvwa ufwako ndi? Ou walengele meho, kati kutwesha ku mona ufwako ndi?

¹⁰ Ou washuzanga matunga, kati kutwesha kubashushula ufwako ndi? Ou mukaku longesha bantu, kati ngana ufwazo ndi?

¹¹ Nyambi ya Ngula walimuka bihanganiko bya bantu, halimuka ngayi byenga byowa.

¹² Obe Nyambi ya Ngula, uli na mfuywezi, muntu ou ukushuza, ou uku longesha ndayano zobe.

¹³ Ukumukatalisha ku matena a makando, hantu kunakabiwi liteke ngayi mukawubi awilemo.

¹⁴ Nyambi ya Ngula kukafutamina bantu bendi ufwako, hinge kukashiya obo benga bendi.

¹⁵ Nyatilo ya kwoloka yikawaniwa ku bakulunga, kami bakwoloka nimwabo bakayikonka.

¹⁶ Kati yani ukanyimanina ha kulwisha bakuluwa? Kati yani wemanine kumbalila yami ha kulwisha bakakutenda byabibi?

¹⁷ Shinga ndi Nyambi ya Ngula kaliha wanyavwile, shinga nayile mwaka mu kalunga.

¹⁸ Oho nahanganikile ngayi, “Nili na kuwa,” na nceshe zobe za mwaya myaka wanyavwile.

¹⁹ Shikati osho nimwasho naliyakatile na kulikekula, kubengezeka kwobe kwawahilishile moyo wami.

²⁰ Kati batulela bakawubi, ba kutwesha kwinga shikonzi na nobe, aba bayatanga byambo na shihota ndi?

²¹ Aba ba kubeba bantu bakulunga, na kupana mulandu wa lufu ku bantu bakubula mulandu.

²² Nyambi ya Ngula niye shipata shami, Nyambi yami limanya lya kuholamina.

²³ Nyambi ukabashushula ndaba ya kuluwa kwabo, na kubalobesha ndaba ya wubi wabo. Nyambi ya Ngula, Nyambi yetu ukabalobesha.