Nyimbo 92 - Libuka Lya Kuyela

Lwimbo lwa kuyemeza

Lwimbo lwaha Mutena wa ku katala

¹ Shinengi shashiwahe kukambilila kuli Nyambi ya Ngula, kwimbila nyimbo za kuyemeza obe Wakukangana,

² na kwimbila shishemo sha mwaya myaka ku lumenemene, na kulunga kwobe ku wushiku,

³ ha kambuli kakashe na kambuli kakanene kakulemiwa na nyimbwa likumi, kali na mushumina wa maleenda.

⁴ Obe Nyambi ya Ngula na milimo yobe ya ngovu, unantangalishi, nikwimbila na ku wahilila ndaba yanebye unatende.

⁵ Obe Nyambi ya Ngula, milimo yobe yayinene shikuma, na bihanganiko byobe bya kunonka shikuma.

⁶ Shihulahuli kutwesha kulimuka wufwako, wakuyeba kutwesha ku yuvwishisha wufwako ngayi,

⁷ bakawubi bakavwakuka ngonehe nyawe, na bakakutenda byabibi bakatangama, ngoboni bakalobeshiwa mwaya myaka.

⁸ Ngoboni, Obe Nyambi ya Ngula, uli wamunene mwaya myaka.

⁹ Obe Nyambi ya Ngula, tukulimuka ngayi bamalamo bobe bakaloba, na bakawubi nimwabo bakapanzana.

¹⁰ Ngoboni Obe unancumishi shikuma ngonehe ngombe ya lishaka, unangwabishi mazi amapya.

¹¹ Namono kuloba kwa bamalamo bami, kami nayuvwu kulila kwa bakakuluwa ba kundwisha.

¹² Bakulunga bakatangama ngonehe mitondo ya minkomona, bakakula ngonehe mutondo wa shinda waku Lembanoni.

¹³ Banafweke ngo mitondo ya kuniwa mu Litala lya Nyambi ya Ngula, eye yikutamina mu Litala lya Nyambi yetu.

¹⁴ Yikuyima mikabo hinge oho yili na myaka yayingi shikuma, yikuneneha na kutama.

¹⁵ Aba bantu bakamba ngayi, “Nyambi ya Ngula wa kupwisha. Niye limanya lyami, mumwendi mowa byabibi.”