Nyimbo 90 - Libuka Lya Kuyela

Libuka lya wunaa Bya Nyambi na Muntu

Lilombelo lya Moshesha muntu wa Nyambi

¹ Hekulu, Obe shipata shetu ku bihemunwino nimwabyo.

² Oho shilolo ulenge mapili, hinge kulenga hano hanci na kaye, wengile Nyambi wa mwaya myaka. Kami ukenga Nyambi wa mwaya myaka.

³ Wabweshanga bantu ku lukungu, wambanga ngayi, “Bokenu enu bana ba bantu.”

⁴ Ndaba likulukazi lya myaka unengi mutena umo kukwobe, unengi ngo mutena wa nzona unapiti, hinge ngo bikati bya kulingana bya shikati sha wushiku.

⁵ Wamanishanga wumi wa bantu shawangu, bakufweka ngo mulo. Banafweke ngo mwila wukuzobela kulumenemene

⁶ wa kulanga na kuyaka ntemo, pe ku mazolo zikulebuka na kuyuminina.

⁷ Tunalobeshiwi na kupilama kwobe, tunatampwa na wukali wobe.

⁸ Obe wulimuka wubi wetu nimwawo, hiwulimuka na wubi wetu tukwezeka kuholeka.

⁹ Ndaba matena wetu nimwawo anapiti mu nceto ya wukali wobe, myaka yetu yinamana ngonehi muuku.

¹⁰ Matena akuyoya kwetu enga myaka makumi mutanu na abili. Ndi tuli na ngovu tukutwesha kukuma ku myaka makumi mutanu na ahatu, ngoboni hinge noho yenga myaka ya litengela na makando, wumi wetu wa matena amashe, wamananga wanguwangu.

¹¹ Yani ukulimuka ngovu za wukali wobe? Ndaba kupilama kwobe kwaleteshanga bantu kukutina.

¹² Tulongeshe kulaba matena wetu, ngayi mwanga twikale na ngana.

¹³ Bweshamo mutima, Obe Nyambi ya Ngula. Wukali wobe ukashimba shikati sha kukuma hati? Yikala na nceshe na bakamilimo bobe.

¹⁴ Tuholwele shishemo shobe sha mwaya myaka, ngayi mwanga twimbile na kutangala kulumenemene ku matena etu nimwawo.

¹⁵ Tutangalishe matena amengi, kwezekesha na aya watuyandishile mu myaka yayingi oho watumoneshele malwa.

¹⁶ Mwanga milimo yobe yimoneke ku bakamilimo bobe, na maleema obe akamoneke ku bana babo.

¹⁷ Obe Nyambi ya Ngula, Nyambi yetu, Utuyamizize na kutundalishila nimwabyo tukutenda. Ingoi, tangamisha milimo yetu nimwayo.