Nyimbo 9 - Libuka Lya Kuyela

Kukambilila kuli Nyambi ha kupwisha kwendi

Ku mukakwimbilisha. Lwimbo lwa Ndavita

¹ Obe Nyambi ya Ngula, nika kuyemeza na mutima wami nimwawo. Nikashimika byuma bya kukomokesha unatende.

² Nikembila na kutangala ndaba yanobe. Nika kwimbilila nyimbo za kuyemeza lizina lyobe, Obe Wakukangana.

³ Oho bamalamo bami bashintulukilenga, bapukazalilenga na kuwa hanci na kuloba ku meho wobe.

⁴ Obe unengi wamuwahe na kupwisha ku nyatilo yobe, uli ha litanda unanyata mu kunyamiziza na kupwisha.

⁵ Unapana mulandu bakamatunga na kulobesha bakuluwa. Bakavulamiwa mwaya myaka.

⁶ Bamalamo betu banalobeshiwi peluu. Unalobeshe minzi yabo, bantu bafwako kami kuka banuka.

⁷ Nyambi ya Ngula niye mwene mwaya myaka, unawahishi litanda lyendi mu kuyatisha.

⁸ Ukulela kaye mu kulunga, wayatanga bantu mu kupwisha.

⁹ Nyambi ya Ngula niye shipata sha bakakuyandishiwa, niye kami shipata sha kutinina ha shikati sha makando.

¹⁰ Obo balimuka lizina lyobe bakukulupila mumwobe, ndaba ngayi kukafutamina bantu bakwiza kukwobe ufwako.

¹¹ Yimbilenu nyimbo za kuyemeza Nyambi ya Ngula ou wekala mu Ziyoni. Shimikilenu mikoka nimwayo ebye anatende.

¹² Nyambi ya Ngula wanukanga bakakuyanda, kuvulama kulila kwabo ufwako, kami washushulanga ba kubatenda shibi.

¹³ Obe Nyambi ya Ngula, nyuvwileko nceshe. Mona makando ba ku monesha aba bamalamo. Obe Nyambi ya Ngula, Obe ukutwesha ku ndamwina ku lufu,

¹⁴ ngayi mwanga nikatweshe kwimana kumbili ya bantu ba mu Ziyoni, naku batongweza byuma nimwabyo biya niku kuyemezela. Nikatangala ndaba unandamwini.

¹⁵ Bakamatunga banawili mu linkwina elye bakabile nibo bamwine. Mu lunyimbwa olwe bamanyikile nibo bamwine banafumo.

¹⁶ Nyambi ya Ngula unalihololo niye mwine, na nyatilo ya kupwisha. Bakuluwa banafu mu milimo ya maboko wabo.

¹⁷ Bakuluwa bakaya ku kalunga, bantu nimwabo baya banakana Nyambi.

¹⁸ Ngoboni ba kuyanda, Nyambi ufwako kuka bavulama shikati nimwasho, pe bantu ba kushepwa bafwako kuka bashiya.

¹⁹ Obe Nyambi ya Ngula, katuka, hinga witabila bantu ngayi bakukome. Leha bakamatunga ngayi beze kumbili yobe na kuyatishiwa.

²⁰ Obe Nyambi ya Ngula, batinishe na ku bayuvwisha bowa, mwanga balimuke ngayi nibo banengi tuhu bantu.