Nyimbo 88 - Libuka Lya Kuyela

Lilombelo lya kuyavwa

Ku mukakwimbilisha. Lwimbo lwa bana ba Kola. Kwezekesha na Mahalati na Lenoti. Kwimbila kwa Hemani wa ka Ezila.

¹ Obe Nyambi ya Ngula, mupulwishi wami, nikulilila kukwobe wushiku na mwaana.

² Yuvwa lilombelo lyami, tengekela litu lyobe kukulila kwami.

³ Wumi wami unenzala na makando, pe nili na kushinga kufwa.

⁴ Nafweke ngonehe bamo aba bakushinga kufwa, nyala zami nimwazo zinamana.

⁵ Nafweke ngo muntu banashiyi mukati ka bafu, nafweke ngo mutuntu unatuntumana mukati ka bafu, nafweke ngo bantu banavulamiwi, aba banaketukili ku kuyavwiwa kwobe.

⁶ Unanyumbili mu liteke lyalitali shikuma, mu mincimpwe ya ku shipa shikuma.

⁷ Wukali wobe unandemene, unankupulu na mankanyi wobe nimwawo.

⁸ Unengishi bahoni bami ngayi bamfutamine, nengakale shuma sha kutinisha kukwabo. Nashinkiwili mukati pe kutwesha kupanza nifwako.

⁹ Meho wami akuzininika ndaba ya makando. Nikwihana ha mutena ha mutena kukwobe, Obe Nyambi ya Ngula, pe nikukatula maboko wami kukwobe mu malombelo.

¹⁰ Kati ukutendela bikomokesho bantu ba kufwa ndi? Kati bantu ba kufwa ba kutwesha ku shanguka na kukuyemeza ndi?

¹¹ Kati shishemo shobe shikatoyiwa mu kalunga ka bafu, hinge kwoloka kwobe kukafutuka Kuloba ndi?

¹² Kati bikomokesho byobe bikalimukiwa mu mwanya uya wa mincimpwe, hinge wuwahe wobe mu litunga lya kuvulamiwa ndi?

¹³ Obe Nyambi ya Ngula, nikulilila kukwobe ngayi unyavwe, nikulombela kukwobe lumenemene na lumenemene.

¹⁴ Obe Nyambi ya Ngula, kati shumangani unampenzeshele mongo? Kati shumangani ukuholekela lupala lwobe kukwami?

¹⁵ Ku balika kuwanuke wami, namono malwa akukokela ku lufu, na kwanga na muziho wa kashushwilo kobe.

¹⁶ Wukali wobe unankupulu, unandobeshe na bya kutinisha byobe.

¹⁷ Mwapita mutena nimwawo bikunzinguluka ngonehe libazi, bikubumbilila kuzimbalila nimwazo.

¹⁸ Unengishi bahoni na bandambo bami ngayi bamfutamine, kami aba bandimuka bananciyi ninkayami mu mincimpwe.