Nyimbo 86 - Libuka Lya Kuyela

Lilombelo lya kuyavwa

Lilombelo lya Ndavita

¹ Obe Nyambi ya Ngula, tengeka litu lyobe pe unkumbule, nili wakuyanda na kushepwa.

² Lama wumi wami, ami wakwoloka kukwobe, ndamwine ami mukamulimo wobe kami na kulupili mumwobe, ndaba uli Nyambi yami.

³ Nyamizize obe Mwene, oho nikulilila kukwobe mutena nimwawo.

⁴ Obe Mwene, tangalisha ami mukamulimo wobe, ndaba nalombelanga kukwobe.

⁵ Obe Mwene, uli wamuwahe kukwetu na mukakuyatila, wenzala na shishemo sha mwaya myaka, ku nimwabo ba kulombela kukwobe.

⁶ Obe Nyambi ya Ngula, tengeka litu lyobe ku lilombelo lyami, yuvwa kulila kwami kwakushinga kuyavwiwa.

⁷ Na kwihananga ha bikati bya makando, pe wakumbulanga malombelo wami.

⁸ Obe Mwene, kowa nyambi wakufweka, kowa mulimo wakufweka ngonehi wobe.

⁹ Matunga nimwawo walengele akeza na ku shintama kukwobe, na kuyemeza lizina lyobe.

¹⁰ Uli wamunene kami watendanga byuma bya kukomokesha, obe tuhu Nyambi ninkayobe.

¹¹ Obe Nyambi ya Ngula, ndongeshe eshe ukushinga ngayi nitende, pe nikakwombatala mu kupwisha, ndongeshe ku kutendela milimo na mutima wami nimwawo.

¹² Nikakuyemeza na mutima wami nimwawo, obe Nyambi, nikayemeza lizina lyobe mwaya myaka.

¹³ Shishemo shobe shashinene kukwami. Unalamwini wumi wami kufuma ku kalunga ka bafu.

¹⁴ Obe Nyambi, bakakuliyemeza bali na kwiza na kundwisha, likunge lya bantu banguma bakushinga kunziha. Bantu aba babula kutwala mitima yabo kukwobe.

¹⁵ Obe Mwene, Nyambi wa nceshe na shishemo, wehalanga kupilama, kami wenzala na shishemo sha mwaya myaka na kwoloka.

¹⁶ Futulukila kukwami na kunyamiziza, ncumishe na ku ndamwina, ndaba na kutendelanga milimo ngonehe mawa atendele.

¹⁷ Obe Nyambi ya Ngula, moneshe shilimukisho sha kuyamiziza kwobe, ngayi obo banzimba bakayeneshiwe, ndaba bakamona ngayi unanyavwa na kunyinkalika shiwahe.