Nyimbo 85 - Libuka Lya Kuyela

Lilombelo lya kulombelela ku mwena

Ku mukakwimbilisha nyimbo. Lwimbo lwa bana ba Kola.

¹ Obe Nyambi ya Ngula, wengile wa nceshe ku litunga lyobe, unatangamishi kami bazukulya Yakobo.

² Unayatili wubi wa bantu bobe, na kufwika milandu yabo.

³ Unalibelululu kukupilama kwobe, unalehe kupilama kwobe kwakunene.

⁴ Obe Nyambi mupulwishi, tutangamishe kami ngonehe twekalile mwaka, hinga utupilamina.

⁵ Kati ukatupilamina mwaya myaka ndi? Kati ukapilamina shikati nimwasho mikoka nimwayo ndi?

⁶ Kati ufwako kuka tu shumankanisha kami, ngayi bantu bobe bakawahilile mumwobe ndi?

⁷ Obe Nyambi ya Ngula, tumoneshe shishemo shobe, pe utupulwishe.

⁸ Nikayuvwilila kunebye akamba Nyambi ya Ngula. Ndaba ukamba bya ku mwena ku bantu bendi ba kuyela mitima, ndi bafwako kuboka ku zinzila zabo zazibi.

⁹ Mwa shikuma, Nyambi unaliwahishili kupulwisha obo ba kumutina, kami wuwahe wendi ukekala mu litunga lyetu.

¹⁰ Shishemo sha mwaya myaka na kwoloka bikaliwana. Kulunga na ku mwena bikalibumbatila.

¹¹ Bantu bendi bakenga ba kupwisha hano hanci, pe Nyambi mu kulunga kwendi ukupenza hanci kufuma muyilu.

¹² Mwa shikuma, Nyambi ya Ngula ukatupana byabiwahe, kami litunga lyetu likaleta bya kuteza byabingi.

¹³ Kulunga kukatwamina ku meho a Nyambi ya Ngula, na kumuwahishila nzila.