Nyimbo 83 - Libuka Lya Kuyela

Lilombelo lya kukoma bamalamo

Lwimbo lwa Ashafwi

¹ Obe Nyambi, hinga umwena nee. Hinga utulumana, hinga umwena hulutuu.

² Mona, bamalamo bobe bali mu mushunga, nanobo ba kuzimba ba na kufutulukili.

³ Bali na bifungo bya ku shoshoka bya kubeba bantu bobe, bakushinga kulwisha aba wakinga.

⁴ Bakwamba ngayi, “Yekenu, tulobeshe litunga lyabo, ngayi lizina lya Ishalela likavulamiwe mwaya myaka.”

⁵ Banaliyuvwashana nimwabo lizu limo, na kulikwata shikonzi sha kukulwisha.

⁶ Bantu ba Endoma na Baishimaele, na ba ku Mowambi na Bahangali,

⁷ na ba ku Ngembalu na Baamoni, na Amaleki, na ba ku Fwilishitiya na Tile.

⁸ Baashiliya kami banalifungili nabo mu kuyavwa Baamoni na Bamowambi bazukulya Lote.

⁹ Obe Nyambi, batende ngonehe watendele Bamindiyani, na Bashishela na Bayambini ku mushinzi wa Kishoni,

¹⁰ aba balobeshiwile ku Endola, kami mituntu yabo yafutukile wilo wa hanci.

¹¹ Tenda ku bakakubatwaminina ngonehe watendele kuli Olembu na Zeembu, koma batulela babo nimwabo ngonehe watendele kuli Zemba na Zalimuna,

¹² aba bambile ngayi, “Tukulishimbila litunga lya Nyambi kwinga lyetu.”

¹³ Obe Nyambi yami, bafukumune ngo lukungu lwa kakundukundu, ngonehe muzungu ukupepuka na mpepo.

¹⁴ Ngonehe mundilo wahokeshanga lishaka, ngonehe milangi ya mundilo yikulasheka ha mapili,

¹⁵ nohobene batande na nkuli yobe na ku batinisha na mpepo yobe yayikali.

¹⁶ Obe Nyambi ya Ngula, bayuvwishe lisheni, mwanga bashinge lizina lyobe.

¹⁷ Mwanga bayuvwe lisheni na kutinishiwa mwaya myaka, mwanga bafwe lufu lwa ku shampuka kwakunene.

¹⁸ Mwanga balimuke ngayi obe ninkayobe, lizina lyobe Nyambi ya Ngula. Obe Wakukangana hano hanci nimwaho.