Nyimbo 81 - Libuka Lya Kuyela

Lwimbo lwa shimbo

Kumukakutwaminina nyimbo. Kuya na kwimbila kwa Ngititi. Lwimbo lwa Ashafwi.

¹ Bilikizenu ndaba ya ku wahilila kuli Nyambi, nyala zetu! Yimbilenu nyimbo za kuyemeza Nyambi wa Yakobo.

² Hangwizenu lwimbo na kumbeta kancingili, mbetenu tuhanzi twatunene na tuhanzi twatushe.

³ Shibenu zimpandula za shimbo, ha kutelama kwa ngonda, na ha kukoma kwendi.

⁴ Zengile ndayano mu Ishalela, zafumine kuli Nyambi wa Yakobo.

⁵ Wazipanine ku bazukulya Yoshefwa, oho bafuminenga mu litunga lya Engepita. Nayuvwile lizu lya wuyeni hilyamba ngayi,

⁶ “Nafumishile miziho ha bifuzi byenu, namileheshele miziho ya mashintina.

⁷ Oho mwekalile mu makando, mwanyihanine, pe namilamwinine. Namikumbwile hinga naholama mu makumbi akumbyazeka. Namyezekele ku kaheloke ka Melimba.”

⁸ Nyuvwililenu enu bantu bami, oho nikumishuza. Enu Baishalela, shinga mu kunyuvwilila.

⁹ Kaliha mu ku fwanina kwikala na banyambi bashiyeni hakati kenu, hinge kulemesha banyambi bashenge.

¹⁰ Ami Nyambi ya Ngula Nyambi yobe. Ou wakufumishile mu litunga lya Engepita. Ndi ukwinga wakukulupiliwa nika kutandalisha.

¹¹ “Ngoboni bantu bami kaliha banyuvwile, Ishalela kaliha wanyombatalile.

¹² Nohobene nabalehele ngayi bakonke mitima yabo yayikalu, na kutenda mwaya bifungo byabo.

¹³ Eshe nashinga ngayi bantu bami banyuvwilile, eshe nashinga ngayi Ishalela anyombatale.

¹⁴ Pe nikakoma bamalamo babo wanguwangu na kulwisha bamalamo babo na liboko lyami.”

¹⁵ Obo banzimba bakalamba kukwami na bowa. Ku shushuliwa kwabo kukenga kwa mwaya myaka.

¹⁶ Nikamilela na loto yayiwahe shikuma, na kumikutisha na wushi wamu lishaka.