Nyimbo 80 - Libuka Lya Kuyela

Lilombelo lya kulombelela litunga lya Ishalela ngayi libokelemo

Ku mukakwimbilisha. Makandu aku kulimama. Lwimbo lwa Ashafwi

¹ Obe mulishani wa Ishalela, tubangwile matu wobe, ukutwaminina bantu ba Yoshefwa ngo litanga lya bambelele. Obe wekalanga ha makelumbi bibumbwabumbwa bya kulifweka na mangeloyi ha litanda.

² Liholole obemwine ku mushobo wa Efulemu na Mbenjamani na Manashe. Tumoneshe nyala zobe, pe yeka utupulwishe.

³ Tubweshemo, Obe Nyambi, na lupala lwobe lwa ku wahilila pe tukapuluka.

⁴ Obe Nyambi ya Ngula, Obe Nyambi wa Makunge, ukashimba shikati sha kukuma hati hinga wapilamina malombelo a bantu bobe?

⁵ Unatupana makando ngayi tulye ngonehe byakulya, na kutupana nkomoki yayinene ya mihozi ngayi tunwe ngonehe mema.

⁶ Walehelele matunga yatuzinguluka ngayi balwishe litunga lyetu, wetabilishile bamalamo betu ngayi batuhandule.

⁷ Tubweshemo, Obe Nyambi wa Makunge. Lupala lwobe lutupenze na nceshe ngayi mwanga tupuluke.

⁸ Twengile ngonehe mukolobozi wa shinyanca uya wafumishile mu Engepita. Watandile bantu bamu Kenaani, pe niho wawushangilemo.

⁹ Wawahishile mbalila ya kuwu shanga, mipishi yawo yahalabila ku nceto ya limvu pe wahanyine mu litunga nimwalyo.

¹⁰ Mapili afwikiwile na mumvulu yalyo. Myahi yayinzikile mitondo byabinene bya shinda.

¹¹ Myahi yawo yakakumine ku liwate lya Menditeleniya, yakakumine naku mushinzi wa Yufuleti.

¹² Shuma ngani unashandwele kembi kawo? Haya bakakupita mu nzila ba kutwesha kubuya mikabo yawo.

¹³ Bangulube bamu lishaka ba kuwulobesha, tuyamana twamu lishaka tukulileleshawo.

¹⁴ Obe Nyambi wa Makunge, boka kukwetu. Penza kukwetu oko kuyilu uli fulankane bantu bobe.

¹⁵ Yeka upulwishe mukolobozi wa shinyanca, uya watampikile na liboko lyobe lya shilyo, mwana wa mulume uya walilelelele Obe mwine.

¹⁶ Bamalamo betu banawatete na kuhokesha na mundilo. Haya balobeshe na wukali wobe.

¹⁷ Kinga na kulama bantu aba wahatile, litunga liya washumishile obe mwine ngayi likulemeshe.

¹⁸ Pe kuka kufutamina kami tufwako, tuyoyeshe pe mwanga tukakuyemezenga.

¹⁹ Obe Nyambi ya Ngula, Nyambi wa Makunge tubweshe mwamwaka. Lupala lwobe lutupenze na nceshe ngayi mwanga tupuluke.